भारतीय कूटनीतिज्ञलाई देश निकाला गरेपछि भारत–क्यानडा सम्बन्ध तनावग्रस्त, के हाे घटना ?

भारतीय कूटनीतिज्ञलाई देश निकाला गरेपछि भारत–क्यानडा सम्बन्ध तनावग्रस्त, के हाे घटना ?

क्यानडाका प्रधानमन्त्री जस्टिन ट्रुडो

A+ A A-

शिख नेताको हत्या आरोपमा भारतका एक कूटनीतिज्ञलाई देश निकाला गरेपछि भारत–क्यानडा सम्बन्धकाे धरातल हल्लिएकाे छ । क्यानडाका प्रधानमन्त्री जस्टिन ट्रुडोले हिजाे संसदमा सम्बोधन गर्ने क्रममा भारत सरकारको एजेन्टले गत जुन महिनामा क्यानडाको ब्रिटिश कोलम्बियामा शिख समुदायका नेता हरदीप सिंह निज्जरको हत्या गरेको बताएका थिए ।

लगत्तै क्यानडा सरकारले यस मामिलामा भारतीय कूटनीतिज्ञलाई निष्कासन गरेको जानकारी दिएकाे छ । क्यानडाका विदेशमन्त्री मेलानी जोलीले भारतीय कूटनीतिज्ञ पवनकुमार राईलाई देश निकाला गरिएको जानकारी दिएकी छन् ।

क्यानडाका प्रधानमन्त्री जस्टिन ट्रुडो र भारतीय प्रधानमन्त्री नरेन्द्र माेदी

भारतीय विदेश मन्त्रालयले भने क्यानडाको आरोपलाई अस्वीकार गर्दै भारत सरकारको संलग्नताको आरोप आधारहिन भएको बताएको छ । पृथकतावादी नेताको हत्या भएको तीन महिनापछि क्यानडाले भारतमाथि यस्ताे आराेप लगाउँदै कूटनीतिज्ञलाई देश निकाला गरेकाे हाे ।

याे घटनाले क्यानडा र भारत दुवै देशमा तरंग फैलाएकाे छ । भारतकाे विदेश मन्त्रालयले विज्ञप्ति जारी गर्दै भनेको छ, 'हामी क्यानडाका प्रधानमन्त्रीले आफ्नो संसदमा दिएको अभिव्यक्तिलाई अस्वीकार गर्छौं ।'

'क्यानडामा हुने कुनै पनि हिंसात्मक कार्यमा भारत सरकारको संलग्नताको आरोप आधारहिन छ । यसलाई पूर्ण रूपमा अस्वीकार गरिन्छ', विज्ञप्तिमा भनिएकाे छ, 'भारत विधिको शासनप्रति दृढ प्रतिबद्धता भएको लोकतान्त्रिक देश हाे ।'

हरदीप सिंह निज्जर

यसै वर्षको जुन १८ मा क्यानडाको ब्रिटिस कोलम्बियास्थित गुरुद्वारा बाहिर निज्जरको गोली हानी हत्या गरिएको थियो । क्यानडाको संसदमा ट्रुडोले भने, 'क्यानडाका एजेन्सीहरूले निज्जरको हत्यामा भारत सरकारको हात हुनसक्ने पक्का गरेको छ ।'

उनले जी–२० सम्मेलनमा पनि प्रधानमन्त्री मोदीसँग यो मुद्दा उठाएको बताएका छन् । 'हाम्रो देशको भूमिमा क्यानडाका नागरिकको हत्यामा विदेशी सरकारको हात हुनु अस्वीकार्य छ र यो हाम्रो सार्वभौमसत्ताको उल्लङ्घन हो', ट्रुडोले भनेका छन्, 'यो लोकतान्त्रिक, स्वतन्त्र र खुला समाजहरू सञ्चालन गर्ने आधारभूत नियमहरूको विरुद्ध हो ।'

प्रकाशित मिति: मंगलबार, असोज २, २०८० १०:५३