एमसीसीको ठेक्का प्रकरणबारे उपप्रधानमन्त्री श्रेष्ठको सोधखोज

उपप्रधानमन्त्री तथा गृहमन्त्री नारायणकाजी श्रेष्ठले मिलेनियम च्यालेञ्ज कर्पोरेशन (एमसीसी) कम्प्याक्टअन्तर्गत एमसीए नेपाललको ठेक्का प्रकरणबारे सोधखोज गरेका छन् । एमसीए नेपालका कार्यकारी निर्देशक खड्गबहादुर विष्टलाई दिउँसो कार्यकक्षमा बोलाएर श्रेष्ठले सोधखोज गरेका हुन् ।

एमसीए नेपालले ठेक्का आह्वान गरेका परियोजनाका लागि अनुमानित लागतभन्दा बढ्ता लागत अनुमानसहित प्रस्ताव परेका थिए । एमसीए नेपालले आह्वान गरेको ठेक्कामा अस्वभाविक लागत प्रस्ताव परेपछि गृहमन्त्री श्रेष्ठले कार्यकारी निर्देशक विष्टसँग छलफल गरेका हुन् ।

श्रेष्ठले विष्टलाई मन्त्रालयमा दिउँसो १ बजे बोलाएर छलफल गरेको बताइएको छ । गृह मन्त्रालय स्रोतका अनुसार एमसीसीअन्तर्गतको परियोजनाका लागि विद्युत् प्रसारण लाइन निर्माणका लागि २२ करोड डलर लागत अनुमानसहित ठेक्का आह्वान गर्दा अस्वभाविक लागतसिहत ५ वटा भारतीय कम्पनीले ३६ करोड ५० लाख डलर प्रस्ताव गरेपछि मन्त्री श्रेष्ठले सोधखोज गरेका हुन् ।

उनले कार्यकारी निर्देशक विष्टसँग अनुमानभन्दा धेरै लागत प्रस्तावित हुनुको कारण मागेका छन् । मन्त्री श्रेष्ठले लागत अनुमानभन्दा निकै नै माथि ठेक्का प्रस्ताव भएपछि के कारणले त्यसो भएको हो भनेर विष्टलाई सोधेका थिए । साथै मन्त्री श्रेष्ठले ५० करोड डलर अमेरिकी सहयोगको परियोजनामा ३६ करोड ५० लाख डलर एउटै ठेक्का प्रस्ताव हुँदा आयोजना उपयोगिता प्रश्न उठ्ने बताएका थिए ।

मन्त्रालयका अधिकारीहरूका अनुसार जवाफमा विष्टले प्रस्तावित लागत उच्च भएकोले ठेक्का सम्झौता गर्न नसकिने बताएका थिए ।

एमसीए नेपालले निर्माण गर्न लागेको ३ सय १५ किलोमिटर लामो प्रसारण लाइनका लागि २२ करोड ६ लाख डलरको अनुमानित लागतमा ठेक्का निकालेको थियो । तर, बोलपत्रमा भने न्यूनतम रकमको प्रस्ताव नै ३६ करोड ५९ लाख डलर रहेको सार्वजनिक भएको थियो ।

एमसीए नेपालले लप्सीफेदी–रातमाटे–न्यु हेटौँडाको १ सय १७ किमी, रातमाटे–न्यु दमौलीको ९० किमी र न्यु दमौली–न्यु बुटवल–न्यु बुटवलबाट भारतको सीमासम्म गरी १ सय ८ किलोमिटर ठेक्का आह्वान गरेको थियो ।

प्रकाशित मिति: सोमबार, असोज १, २०८० २०:०९