ई–सेवा मनी ट्रान्सफरको 'मेरो डिजिटल देश' अभियान असोज १ गतेबाट सुरु, बम्परमा एक जनालाई काठमाडौंमा घर

ई–सेवा मनी ट्रान्सफरको 'मेरो डिजिटल देश' अभियान असोज १ गतेबाट सुरु, बम्परमा एक जनालाई काठमाडौंमा घर

A+ A A-

ई–सेवा मनी ट्रान्सफरले 'मेरो डिजिटल देश' अभियान यस वर्ष पनि सञ्चालन गर्ने भएको छ । यस अभियानअन्तर्गत डिजिटल माध्यमबाट नेपालमा पैसा पठाउनेमध्येका एक भाग्यशाली ग्राहकलाई काठमाडौंमा घर उपहार दिइनेछ ।

संसारका २०० भन्दा बढी देशबाट नेपालमा रेमिट्यान्स भित्र्याउँदै आएको डिजिटल रेमिट्यान्स कम्पनी ई–सेवा मनी ट्रान्सफरले डिजिटल रेमिट्यान्सको माध्यमबाट रेमिट्यान्स भित्राएर देशलाई समुन्नत बनाउन 'मेरो डिजिटल देश' अभियानलाई गतवर्षहरूमा जस्तै निरन्तरता दिएको हो । कम्पनीले आइतबार काठमाडौंमा एक कार्यक्रमको आयोजना गरी ई–सेवा मनी ट्रान्सफर र ई–सेवाबीच सम्झौतापश्चात् 'फेरि पनि काठमाडौँमा घर योजना' सार्वजनिक गरेको हो ।

कम्पनीका अनुसार यो अभियान यही असोज १ गतेबाट सुरु भई आगामी असार ३१ गतेसम्म सञ्चालन हुनेछ । परम्परागत शैलीमा हुँदै आएको रेमिट्यान्स कारोबारलाई डिजिटलतर्फ लैजाने अभिप्रायका साथ यो अभियान सुरु गरिएको हो । साथै, यस योजना मार्फत डिजिटल रेमिट्यान्सलाई थप बढावा दिन देशको आर्थिक स्थिति बलियो बनाउन र देशमा विदेशी मुद्राको सञ्चितलाइ थप मजबुत बनाउन का लागि पनि १० महिने यस योजना सार्वजनिक गरिएको कम्पनीले जनाएको छ ।

कम्पनीका अनुसार, 'मेरो डिजिटल देश' अभियानअन्तर्गत संसारका जुनै पनि मुलुकमा रहेका नेपालीहरूले नेपालमा इच्छाएको व्यक्तिको ई–सेवा वालेटमा पैसा पठाई सहभागिता जनाउन सक्नेछन् । यस अभियानमा ४ परिवारलाई विशेष कोसेली, हरेक महिना १ जनाको पैसा डबल तथा बम्पर उपहारमा १ भाग्यशाली एक जनाले काठमाडौंमा घर प्राप्त गर्नेछन् ।  

कार्यक्रममा एफवान सफ्ट ग्रुपका डाइरेक्टर सुवास शर्माले भने, 'यो योजना वैदेशिक रोजगारीमा रहेका नेपाली व्यक्तिहरूले गरेको समर्पण र बलिदानप्रति हाम्रो प्रशंसाको प्रतीक हो । प्रत्येक विदेशमा काम गर्ने नेपालीको एउटा आकांक्षा भनेको काठमाडौंमा घर बनाउनु हो र यस अभियानको माध्यमबाट हामीले कम्तीमा एउटा व्यक्तिको सपना पूरा गर्न सक्नेछौँ ।'

अभियानबारे एफवान सफ्ट ग्रुपका ग्रुप स्ट्राटेजी डाइरेक्टर डेनियल डी श्रेष्ठले ई–सेवा मनी ट्रान्सफरको स्थापनाकालदेखि नै आर्थिक विकासमा महत्वपूर्ण योगदान रहेको बताए । उनले यस योजनाअन्तर्गत विदेशमा बसोबास गर्ने र रोजगारीमा रहेका सबै नेपालीहरूलाई डिजिटल इकोसिस्टममा सक्रिय रूपमा सहभागी हुन र आफ्नो रेमिट्यान्स आवश्यकताहरूका लागि वैधानिक माध्यम प्रयोग गरी राष्ट्रको समग्र आर्थिक उन्नतिमा योगदान दिन प्रोत्साहित गर्ने बताए ।

ई–सेवाका प्रमुख कार्यकारी अधिकृत जगदीश खड्काले ई–सेवा र ई–सेवा मनी ट्रान्सफरको संयुक्त प्रयासबाट विदेशमा रहेका नेपालीहरूलाई डिजिटल माध्यमबाट केही मिनेटमै नेपालमा सहजै पैसा पठाउन मिल्ने बताए । उनले भने, ‘यो अभियानमार्फत देशको अर्थतन्त्रमा सकारात्मक परिवर्तन ल्याउने र रेमिट्यान्स सेवाको गुणस्तर र विश्वसनीयतालाई उकास्नेछ भन्ने हाम्रो विश्वास छ ।'

अभियानबारे ई–सेवा मनी ट्रान्सफरका प्रमुख कार्यकारी अधिकृत अजेस कोइरालाले भने, 'यो अभियानमा विश्वको जुनसुकै ठाँउमा रहेका नेपालीहरू सहभागि हुने र देश डिजिटल बनाउनमा योगदान पुर्‍याउनुहुनेछ भन्ने कुरामा हामी विश्वस्त छौँ । विश्वका विभिन्न देशबाट नेपालमा पैसा पठाएर देशलाई यति ठूलो आर्थिक योगदान पुर्‍याउनुहुने सबैलाई १० महिने यस अभियानमार्फत हामी विशेष रूपमा सम्मान गर्नेछौँ ।'

यसका साथै ई–सेवा मनी ट्रान्सफरका ब्रान्ड एम्बेस्डर राजेश हमाल, स्वस्तिमा खड्का, दयाहाङ राई र ई–सेवाका ब्रान्ड एम्बेस्डर विपिन कार्कीले डिजिटल रेमिट्यान्ससम्बन्धी राष्ट्रिय तथा अन्तर्राष्ट्रिय चेतनामूलक कार्यक्रममा अभियानलाई प्रवर्द्धन गर्न सहभागिता जनाउने कम्पनीले बताएको छ ।

ई–सेवा मनी ट्रान्सफरले परम्परागत शैली तथा डिजिटल माध्यमबाट ई–सेवा वालेटका ७५ लाखभन्दा बढी प्रयोगकर्ताहरू र कुनै पनि बैंक तथा वित्तीय संस्थाको खातामा विप्रेषण रकम भित्र्याउँदै आएको छ ।

प्रकाशित मिति: सोमबार, असोज १, २०८० १६:१७