एमाले प्रदेश अधिवेशन : दुई गुटको लडाइँमा अध्यक्षका आकांक्षी धेरै

A+ A A-

प्रमुख प्रतिपक्षी दल नेकपा (एमाले) लाई अहिले प्रदेश अधिवेशनको चटारो छ । यी अधिवेशनले प्रदेशको नेतृत्व चयन गर्ने भएकाले कार्यकर्तादेखि नेतासम्म दौडधूपमा छन् । प्रदेश अधिवेशनमा नेताहरूको शक्ति स्वार्थका कारण गुटगत लडाइँ प्रस्टै देखिएको छ । पार्टी उपाध्यक्ष विष्णु पौडेल र महासचिव शंकर पोखरेलबीच तीव्र प्रतिस्पर्धा देखिएको छ ।

पौडेल र पोखरेल एमालेको भावी नेतृत्वको प्रतिस्पर्धामा देखिएकाले प्रदेश तहबाटै आफ्नो शक्ति मजबुत बनाउने प्रयासमा देखिन्छन् । जसका कारण प्रदेश अधिवेशन पौडेल र पोखरेलको शक्ति संघर्षमा केन्द्रित भएजस्तो देखिन्छ ।

एमालेले संघीयता कार्यान्वयनपछि यी अधिवेशनलाई पहिलो अधिवेशन भनेको छ । लुम्बिनी प्रदेशको अधिवेशन यही १६ गते बुटवलमा सुरु भएको थियो । यो एमालेको पहिलो प्रदेश अधिवेशन थियो । जुन एमालेका लागि सोचेजस्तो सहज वातावरणमा सम्पन्न भएन ।

जसबाट एमालेले पुन: अधिवेशनहरू निर्वाचित प्रक्रियाबाट सुरु गरेको छ । उसो त पार्टीको लुम्बिनी प्रदेश कमिटी सर्वसम्मत चयन होस् भनेर पार्टी अध्यक्ष केपी शर्मा ओलीले पनि भनेका थिए । तर, एमालेमा रहेको दोस्रो तहका नेताहरूको गुटबन्दीले अध्यक्ष ओलीको चाहना पूरा हुन सकेन ।

अन्तत: लुम्बिनीमा निर्वाचन भएर उपाध्यक्ष विष्णु पौडेलनिकट मानिएका राधाकृष्ण कँडेलले २ भोटले विजयी भए । महासचिव शंकर पोखरेलनिकट मानिएका हरि रिजाल पराजित भए ।

लुम्बिनी प्रदेशमा एमालेले सर्वसम्मत गर्न नसकेपछि त्यसको असर अब छवटै प्रदेशमा पर्ने देखिन्छ ।

असोजभरि एमालेका अन्य छवटा प्रदेशमा अधिवेशन हुनेछ । असोज ५ र ६ मधेश प्रदेश, ८ र ९ गते बागमती प्रदेश, १० र ११ गते कर्णाली प्रदेश, १२ र १३ गते कोशी प्रदेश, १५ र १६ गते गण्डकी प्रदेश, १९ र २० गते उपत्यका प्रदेश विशेष र २१ र २२ गते सुदूरपश्चिम प्रदेशमा अधिवेशन गर्ने तय भइसकेको छ । यी प्रदेशहरूमा पनि अहिले पोलिटब्युरो सदस्य र केन्द्रीय सदस्य प्रदेश अध्यक्षका आकांक्षी छन् ।

कोशी प्रदेश

कोशी प्रदेशमा ५ गते असोजभित्र अधिवेशनका लागि प्रतिनिधि चयन भइसक्नेछन् ।

यो प्रदेशमा एमालेको ९५ हजार ४ सय ३९ जना पार्टी सदस्य रहेको अध्यक्ष तुलसी न्यौपानेले बताए । उनले भने, ‘हाम्रो प्रदेशमा पार्टी सदस्य संख्या ९५ हजार ४ सय ३९ जना छन् । त्यसका आधारमा प्रतिनिधि छनोट हुनेछन्, जसमा करिब ११ सयजति प्रतिनिधि छनोट हुनेछन् । अधिवेशन आउन अझै समय बाँकी छ ।’

कोशी प्रदेश अध्यक्षमा पनि चार पाँच जना आकांक्षी रहेको एक प्रदेश कमिटी सदस्यले बताए । ती सदस्यले भने, ‘पहिलो काम अधिवेशनका लागि प्रतिनिधिन छनोट गर्ने हो । जुन ५ गते सकिन्छ । त्यसपछि को को दाबेदार छन् भन्ने चर्चा सुरु होला । अहिलेसम्म चार/पाँच जनाको चर्चा सुनिएको छ । हेरौँ, सर्वसम्मत हुन्छ कि निर्वाचन हुन्छ । कार्यकर्ताको चाहना निर्वाचन होस् भन्ने छ । अध्यक्ष ओलीको आफ्नो प्रदेश भएकाले सर्वसम्मत गर्ने चाहना रहेको बुझिएको छ ।’

जसमा पोलिटब्युरो सदस्य विशाल भट्टराई, केन्द्रीय सदस्य विनोद ढकाल, यज्ञबहादुर सुनुवार, अहिलेका अध्यक्ष न्यौपाने, घनश्याम खतिवडा रहेको चर्चा कोशी प्रदेशमा सुरु भएको छ । तर, चर्चा भइरहेको नेता कार्यकर्ताको आकांक्षा भए पनि आफू प्रदेश कमिटीको अध्यक्षमा दाबी नगर्ने भट्टराईले बताए । उनले भने, ‘मलाई पहिला पनि अध्यक्ष हुन अध्यक्ष कमरेडले नै भन्नुभएको हो । तर, मैले म माथिल्लो कमिटीमा नै ठीक छु भनेँ । अहिले पनि म प्रदेश अध्यक्षमा फर्कन चाहँदिनँ । यहीँ भएका साथीहरूबीचबाट अध्यक्ष बनाउनुपर्छ । त्यसैका लागि पहल हुनेछ ।’

सुनुवारले पनि आफू अहिले केन्द्रीय सदस्यमा नै ठीक भएकाले प्रदेश अध्यक्षमा नआउने बताए ।

अहिलेका अध्यक्ष न्यौपानेले पार्टीको इमानदार कार्यकर्ता हुँ । पार्टीले दिएको भूमिका स्वीकार्छु । अहिले अध्यक्ष छु । यो भूमिका निरन्तर पाएमा स्वीकार्ने बताए । उनले भने, ‘नेतृत्वले गरेको निर्णय मान्छु । अहिले अध्यक्षको भूमिकामा छु । त्यही भूमिका निरन्तर भए स्वीकार्छु । अहिले प्रतिनिधि चयन हुँदै छन् । को को पदमा उठ्ने भन्ने केही सरसल्लाह भएको छैन ।’

चर्चामा आएका अध्यक्षका अर्का केन्द्रीय सदस्य विनोद ढकालले अहिले नै अध्यक्ष हुन्छु भनेर कहीँ कतै केही नभनेको तर प्रतिनिधि चयन भएपछि साथीहरूसँग सरसल्लाह गरेर निर्णय गर्ने बताए । उनले भने, ‘प्रतिनिधि नै चयन भएका छैनन् । प्रतिनिधि चयन भएपछि नेतृत्वका बारेमा साथीहरूसँग छलफल गर्नेछु । अहिले केही कुरा भएको छैन ।’

अध्यक्ष हुने तीव्र चाहना राखेका नेता घनश्याम खतिवडाले आफू ४६ वर्षदेखि राजनीतिमा लागेको, आफ्नो कुनै व्यापार बिजनेस नभएकाले अझै पार्टीको काम गर्ने चाहना भएकाले अध्यक्षका लागि दाबी गरेको बताए । उनले भने, ‘मैले अध्यक्षका लागि चाहना राखेको मात्र होइन, सबै नेता कार्यकर्तासँग मलाई एकपटक कोशी प्रदेशको अध्यक्ष बनाउन भनेको छु । मेरो चाहना अध्यक्ष हुनेछ । साथीहरूले साथ सहयोग गरे अध्यक्ष हुन्छु ।’

अहिलेका प्रदेश उपाध्यक्ष टीकाराम चेम्जोङ पनि अध्यक्षको दाबेदार रहेको बताइन्छ ।

एमालेमा कोशी प्रदेशमा दोस्रो तहका नेताहरूको भन्दा पनि अध्यक्ष ओली र पूर्वराष्ट्रपति विद्यादेवी भण्डारीनिकट मानिएका नेताहरूबीच प्रतिस्पर्धा हुने देखिन्छ । यो प्रदेशमा भट्टराई, खतिवडा, न्यौपाने पूर्वराष्ट्रपतिनिकट मानिन्छन् । ओलीनिकट मानिने नेताहरू पनि अध्यक्षको आकांक्षी हुन सक्ने नेताहरू बताउँछन् ।

बागमती प्रदेश

बागमती प्रदेशमा भने एमालेको दोस्रो तहका नेताहरू अथवा पौडेल र पोखरेल समूहबीच नै प्रतिस्पर्धा हुने देखिन्छ । यो प्रदेशमा केही नेताहरू अहिले पनि खुल्न नचाहेको एक प्रदेश कमिटी सदस्यले बताए ।

यो प्रदेशमा उपाध्यक्ष पौडेलको र महासचिव पोखरेल पक्षबीच नै अध्यक्षका लागि प्रतिस्पर्धा हुने बताइन्छ । महासचिव पोखरेलले केन्द्रीय सदस्य रचना खड्कालाई अगाडि सार्ने तयारी गरेको बताइन्छ । पौडेल पक्षले कृष्णप्रसाद दाहाललाई अगाडि सार्ने योजना बनाएको देखिन्छ ।

बागमतीमा १ लाख ९ हजार ३ सय ५६ जना पार्टी सदस्य छन् । यी पार्टी सदस्यबाट १३ सय जना प्रतिनिधि चयन भएर आउने पार्टी अध्यक्ष केशव पाण्डेले बताए । उनले भने, ‘अहिले पार्टी सदस्य १ लाख ९ हजार ३ सय ५६ जना छन् । यी पार्टी सदस्यबाट १३ सय जना प्रतिनिधि चयन भएर आउँछन् । प्रतिनिधि चयनको काम भइरहेको छ ।’

अध्यक्षको आकांक्षी रहेका केन्द्रीय सदस्यहरू पनि प्रतिनिधि छानिएका छन् । रामेछापबाट केन्द्रीय सदस्य कैलाश ढुङ्गेल प्रतिनिधि चयन भएका छन् । उनले आफू प्रतिनिधि हुनुको कारण आवश्यक परे प्रदेश अध्यक्ष हुने बताए ।

उनले भने, ‘प्रदेश अधिवेशनमा केन्द्रीय सदस्य प्रतिनिधि हुने भनेको अध्यक्ष हुनका लागि नै हो । म पनि प्रतिनिधिहरू र पार्टीले माग गरेमा बागमती प्रदेशको अध्यक्ष हुने गरी तयारी गरेको छु ।’

अहिलेका अध्यक्ष पाण्डेले आफूले पहिलो अधिवेशनबाट सर्वसम्मत तरिकाले अध्यक्षको निरन्तरता चाहनु स्वाभाविक भएको बताए । उनले भने, ‘म अहिलेको अध्यक्ष हुँ । अधिवेशन हलबाट पुन: चुनिएर काम गर्ने चाहना हुनु स्वाभाविक नै हो । जुन मेरो पनि छ । अधिवेशन सुरु भएपछि साथीहरूसँग छलफल गर्नुपर्छ । पार्टीले आवश्यकता महसुस गरेमा निरन्तरता दिन तयार छु ।’

बागमती प्रदेशबाट केन्द्रीय सदस्य कृष्णप्रसाद दाहाल पनि प्रदेश अधिवेशनका लागि प्रतिनिधि चयन भएका छन् ।

उनले बागमती प्रदेशमा नेकपा एमाललेलाई सुदृढ र बलियो बनाउनका लागि नेतृत्व लिन तयार रहेको दाहालले बताए । उनले भने, ‘पार्टीलाई बागमती प्रदेशमा बलियो, सुदृढ र चलायमान बनाउनु छ । पार्टीलाई राम्रो बनाउनुपर्छ भनेर नै केन्द्रीय सदस्य भए पनि प्रदेशको प्रतिनिधि भएर अधिवेशनमा आएको छु । जसको उद्देश्य आवश्यक परेमा अध्यक्ष हुने नै हो । सर्वसम्मत भए पनि लोकतान्त्रिक विधि अपनाए पनि अध्यक्षका लागि तयारी गरेको छु ।’

अधिवेशनबाट नेतृत्वका लागि चार जना चर्चामा छन् । चर्चामा रहेका नेताहरूमा दुई जना महासचिव पोखरेल र दुई जना उपाध्यक्ष पौडेल निकट रहेको बताइन्छ । खड्का र ढुङ्गेल महासचिवनिकट, दाहाल र पाण्डे उपाध्यक्षनिकट बताइन्छन् ।

एमालेका तल्लो तहमा कसलाई अध्यक्ष बनाउने भन्ने विषयमा छलफल भए पनि पदाधिकारी तहबाट यसलाई अध्यक्ष बनाऊ, उसलाई अध्यक्ष बनाऊ भन्न नहुने दाहाल बताउँछन् । उनले भने, ‘प्रतिनिधिहरूबीच अध्यक्ष बनाउने अथवा पदाधिकारी बनाउने विषयमा छलफल हुनु स्वाभाविक हो । तर, पार्टीका केन्द्रीय पदाधिकारीहरूले यसलाई अध्यक्ष बनाउनू भन्नु ठीक हुँदैन । उहाँहरूले अभिभावकीय भूमिका निभाउनुपर्छ ।’

गण्डकी प्रदेश

गण्डकी प्रदेशमा पनि एमालेको गुटबीच सबैभन्दा बढी लडाइँ छ । यो प्रदेशमा महासचिव र उपाध्यक्ष पक्षका नेताहरू सक्रिय छन् । यहाँ उपाध्यक्ष पौडेल पक्षका नेता उपमहासचिव पृथ्वीसुब्बा गुरुङ छन् भने महासचिवका नेता स्थायी कमिटी सदस्य खगराज अधिकारी छन् । यहाँ महासचिव पोखरेल र उपाध्यक्ष पौडेल उपस्थित नै हुनुपर्दैन । गुरुङ र अधिकारीबीच नै पुरानो लडाइँ छ । जसको असर प्रदेश अधिवेशनमा पर्नेछ । अहिलेका अध्यक्ष नवराज शर्मा पनि पहिलो अधिवेशनबाट पनि अध्यक्षमा निरन्तरता चाहन्छन् ।

यता उपसचिव रश्मी आचार्य पनि अध्यक्षका लागि तयारी गरेको बताउँछन् । ‘उपसचिव भएर काम गरेको छु । अब पार्टीलाई सुदृढ र एक ढिक्का बनाउन अध्यक्षको तयारी गरेको छु,’ उनले भने, ‘पार्टीको काममा निरन्तर लागेको छु । पार्टी र प्रतिनिधिहरूले मलाई नेतृत्व दिन चाहेमा नेतृत्व लिन तयार छु । युवाहरूले पार्टीको मुख्य नेतृत्वमा आउनुपर्छ भन्ने धेरै साथीहरूको सल्लाह सुझाव पनि छ । मैले पनि त्यहीअनुसार मानसिकता बनाएको छु ।’

अहिलेका अध्यक्ष नवराज शर्माले पनि आफू निरन्तरता दिन चाहेको बताए । उनले भने, ‘अधिवेशन आयोजना गर्न बनेको कमिटीको अध्यक्ष छु । अब पहिलो अधिवेशनबाट निर्वाचित भएर पार्टीको काम गर्ने चाहना छ । अब प्रतिनिधिहरूले त्यो जिम्मेवारी दिनुहुनेछ भन्ने विश्वास पनि छ ।’

केन्द्रीय सदस्यहरूले पनि प्रदेश अध्यक्ष हुने चाहना राखेको बुझिएको एक प्रदेश कमिटी सदस्यले बताए, जसमा केन्द्रीय सदस्य रामशरण बस्नेत, तिलक महत, मायानाथ अधिकारी, कृष्ण थापा रहेको बताइन्छ । गडण्डकीमा प्रतिनिधि चयन भइनसकेकाले कुनकुन केन्द्रीय सदस्य उम्मेदवार हुन पाउँछन् भन्न नसकिएको एक प्रदेश कमिटी सदस्यले बताए ।

केन्द्रीय सदस्य मायानाथ अधिकारीले अहिले साथीहरूसँग छलफलमा नै भएकाले यही हो भनेर भन्न नसकिने बताए । उनले भने, ‘असोज ६ गतेबाट प्रतिनिधि चयन हुन्छन् । प्रतिनिधि चयन भएपछि के हुन्छ हेरौँ नि अहिले नै भन्न सकिँदैन । के गरेर जाँदा राम्रो हुन्छ, के गर्दा पार्टी राम्रो हुन्छ भनेर छलफल गरिरहेको छु । समय आएपछि भन्छु ।’

अहिलेका सचिव धनञ्जय दवाडीले आफूसँग धेरै विकल्प रहेको बताए । उनले भने, ‘अहिले सचिव छु । अध्यक्षको दाबेदार हुनु स्वाभाविक हो । तर, पार्टीको हितका लागि उपाध्यक्ष बने पनि हुन्छ । सचिवमा नै दोहोरिँदा पनि पार्टीको काम गर्ने हो । हेरौँ, के हुन्छ ।’

नेताहरूले जे भने पनि आन्तरिक रूपमा गुरुङ र अधिकारीमा कसको पक्षको अध्यक्ष, उपाध्यक्ष, सचिवलगायतका पदाधिकारी बन्ने भन्नेमा रस्साकस्सी चलिरहेको छ । अहिले उपमहासचिव गुरुङको समूह गण्डकीमा बलियो मानिन्छ ।

कर्णाली प्रदेश

एमालेको दोस्रो पुस्तामा भएको गुटबन्दी हरेक प्रदेशमा पुगेको छ । कर्णालीमा पनि एमालेको दोस्रो तहको गुटबन्दी जारी रहेको छ । यही १०–११ गते हुने कर्णाली प्रदेशको अधिवेशन सुरु हुनुअगाडिबाट नै गुटबन्दी सुषुप्त रूपमा सुरु भएको छ ।

कर्णालीमा उपाध्यक्ष पौडेल र महासचिव पोखरेलको समूह छन् । यहाँ पौडेल पक्षभन्दा पोखरेल पक्ष बलियो रहेको बताइए पनि पोखरेल समूहभित्र दुई गुट छन् ।

महासचिव पोखरेलनिकट स्थायी कमिटी सदस्य यमलाल कँडेल र गोरखबहादुर बोगटीबीच कर्णालीमा उपगुट चलिरहेको छ । पौडेल पक्षका केन्द्रीय सदस्यहरू पनि छन्, जुन अहिले अध्यक्षका आकांक्षी छन् । कँडेल र बोगटी गुटमा नै अध्यक्षका लागि प्रतिस्पर्धा रहेको एक प्रदेश कमिटी सदस्यले बताए ।

उने भने, ‘यहाँ केन्द्रको भन्दा पनि कर्णालीको गुटबन्दी चर्को छ । महासचिवनिकट रहेका कँडेल र बोगटीबीच नै दुई गुट छन् । अर्को गुट उपाध्यक्ष पौडेलनिकटहरूको छ । यहाँको अधिवेशन रोचक नै हुन्छ होला ।’ कँडेल पक्षधरका प्रदेश कमिटी सदस्य सुर्खेतका ध्रुवकुमार शाही अध्यक्षको दौडमा छन् । यस्तै, बोगटी पक्षधरका कालीकोटका मीनबहादुर शाही अध्यक्षका दाबेदार रहेका छन् ।

राजबहादुर शाही र लालबहादुर महतारा भने कुनै गुटमा नखुलेको एक प्रदेश कमिटी सदस्यले बताए । पहिला पोलिटब्युरो र केन्द्रीय सदस्य पनि अध्यक्षको आकांक्षी रहेको बताइए पनि प्रतिनिधि चयनमा नै सहभागी नभएपछि प्रदेश कमिटी सदस्यहरूबीचबाट नै अध्यक्षलगायतका पदाधिकारी चयन हुनेछन् ।

कर्णालीमा ५१ हजार पार्टी सदस्य छन् । अधिवेशनका लागि ६ सय प्रतिनिधि सहभागी हुने अध्यक्ष विनोद शाहले बताए । उनले भने, ‘कर्णाली प्रदेशमा ५१ हजार पार्टी सदस्य छन् । अधिवेशनमा ६ सय प्रतिनिधि सहभागी हुनुहुन्छ । यहाँ मिडियामा भनेजस्तो कसैको गुट छैन । अध्यक्ष केपी शर्मा ओली र पार्टीको निर्देशनमा पार्टी चल्छ ।’

दैलेखबाट प्रतिनिधि चयन भएका कर्णालीका पूर्वसभामुख राजबहादुर शाहीले आफू अध्यक्षको दाबेदार रहेको बताए । उनले भने, ‘म दैलेखबाट प्रतिनिधि चयन भएको छु । अहिले पार्टीका र अन्य कुनै भूमिकामा नभएकाले अध्यक्षका लागि तयारी गरेको छु ।’

प्रदेश कमिटी सदस्य मीनबहादुर शाहीले पनि आफू अध्यक्षका लागि तयारी गरेको बताए । उनले भने, ‘म कालीकोटबाट प्रतिनिधि भएर आएको छु । प्रतिनिधिहरू सरसल्लाह गरेर अध्यक्षको तयारीमा लागेको छु । पार्टीलाई बलियो बनाउन । यो पार्टीलाई कर्णालीमा सशक्त बनाउने मेरो चाहना भएकाले अध्यक्षमा सर्वसम्मत हुने चाहना छ । भएन भने प्रतिस्पर्धाबाट पनि अध्यक्षमा चयन हुन्छु ।’

एमालेका प्रदेश सचिवालय सदस्य ध्रुवबहादुर शाही पनि अध्यक्षका लागि दाबेदार छन् । ‘पार्टीको काम गर्दै आएको छु । पुरानो कार्यकर्ता हुँ । अहिले पार्टीको अध्यक्ष भएर काम गर्ने चाहना छ । मेरो चाहना अधिवेशनमा आएका प्रतिनिधिहरूले बझ्नुहुन्छ,’ शाहीले भने, ‘म अध्यक्षको उम्मेदवार हुँ । पार्टी र प्रतिनिधिहरूले पनि बुझ्नुहुन्छ होला । अहिले पार्टी बलियो बनाउनका लागि मजस्ता कार्यकर्ताको आवश्यकता पनि छ ।’

अध्यक्षका आकांक्षी लालबहादुर महतारा र राजबहादुर शाहीलाई उपाध्यक्ष पौडेल निकट रहेको एक प्रदेश सदस्यले बताए ।

सुदूरपश्चिम प्रदेश

सुदूरपश्चिम प्रदेशमा पनि नेताहरू दुई गुटमा विभाजित छन् । पहिला भीम रावल र कर्ण थापा समूह थिए । अहिले ती समूहको ठाउँमा उपाध्यक्ष पौडेल र महासचिव पोखरेल समूहमा विभाजित रहेको एक प्रदेश कमिटी सदस्यले बताए । ती सदस्यले भने, ‘पहिला यहीँका नेताहरूको नाममा गुट थिए, अहिले केन्द्रका नेताका नाममा गुट छन् । कोही खुलेका छैनन् । तर गुटचाहिँ छ । प्रदेश अधिवेशनमा पनि त्यो प्रस्ट देखिन्छ ।’

अहिलेका अध्यक्ष दामोदर भण्डारी संघीय सांसद र धर्मराज पाठक प्रदेश सांसद भएका कारण दोहरिन पाउने छैनन् । अध्यक्षमा केन्द्रीय सदस्य पनि आउन सक्ने देखिन्छ । प्रदेश कमिटीबाट पनि आउन सकिने बताइन्छ ।

अहिले अध्यक्षका लागि आकांक्षा राखेकामा प्रदेश कमिटी उपाध्यक्ष कमल तिमिल्सेना, सदस्य कृष्ण जैसी, बचन सिंह रहेका छन् । नेतृत्वले सर्वसम्मत रूपमा नेतृत्व गर्नुपर्छ भनेमा पोलिटब्युरो सदस्य लीला भण्डारीले पनि स्वीकार्ने बताइन् ।

उपाध्यक्ष तिमिल्सेनाले भने, 'काम गरिरहेको छु, अहिलेको नेतृत्व बिदा हुनुहुन्छ । म उपाध्यक्ष छु । त्यही हिसाबले पनि मलाई प्रतिनिधिहरूले सर्वसम्मत तरिकाले नेतृत्व दिन्छन् भन्नेमा विश्वस्त छु ।' उनले थपे, ‘म अध्यक्ष हुन्छु भन्दै हिँड्दिनँ । प्रतिनिधिहरूले अहिलेसम्म गरेको काम र अध्यक्ष बिदा भएपछि उपाध्यक्ष स्वत: अध्यक्ष हुँदा राम्रो हुन्छ भन्नुहुन्छ भने म अध्यक्षको दाबेदार हुँ । होइन भने निर्वाचन प्रक्रियामा पनि जान तयार छु ।’

नेतृत्वमा युवा आउनुपर्छ भन्ने भएकाले आफूले पनि अब अध्यक्षको तयारी गरेको प्रदेश सचिवालय सदस्य बचन सिंहले बताए । उनले भने, ‘पार्टीभित्र र बाहिरका चुनौतीहरूको सामान गर्नका लागि अबको नेतृत्व युवाले गर्नुपर्छ भन्ने छ । त्यही हिसाबले म अध्यक्षको दाबेदार हुँ । भए सर्वसम्मत, नभए लोकतान्त्रिक प्रक्रियामा जान पनि तयार छु ।’

पार्टीमा काम गरेको लामो अनुभव छ । यही अनुभवले अब पार्टीको प्रदेशको नेतृत्व लिनुपर्छ भन्ने साथीहरूको सुझाव र मेरो पनि चाहना भएकाले अध्यक्षका लागि तयारी थालेको जैसीले बताए । उनले भने, ‘साथीहरूले अध्यक्ष हुनुपर्छ भनेका छन् । सबैको सल्लाह सुझावअनुसार अध्यक्षका लागि तयारी गर्नुपर्छ भन्ने छ । भए सर्वसम्मत, नभए लोकतान्त्रिक प्रक्रियाका लागि पनि तयारी गर्नुपर्छ ।’

सचिवमा राजेश खाती, यज्ञराज ढुङगाना, नेपालु चौधरी र दानबहादुर विक आकांक्षी रहेको बताइन्छ । यहाँ उपाध्यक्ष पौडेल बलियो मानिन्छन् । महासचिव पोखरेल कजोर छन् । तर, यहाँ पनि उपाध्यक्ष र महासचिवको भन्दा पनि प्रदेशका नेताहरूका पनि गुट छन् । एक गुटको नेतृत्व कर्ण थापा र अर्को गुटको नेतृत्व झपट रावलहरूले गरिरहेको बताइन्छ । भीम रावल प्रत्यक्ष पार्टीमा नभएकाले झपट रावलले त्यो समूहको नेतृत्व गरेको एक प्रदेश कमिटी सदस्य बताउँछन् । अधिवेशनमा पनि प्रदेशको गुटबन्दीले काम गर्ने बताइन्छ ।

मधेश प्रदेश

मधेश प्रदेशमा सबैभन्दा ढिला प्रदेश अधिवेशन हुँदै छ । यो प्रदेशमा ६० हजारजति पार्टी सदस्य छन् । यहाँ १ हजारभन्दा बढी नै प्रतिनिधि आउने पोलिटब्युरो सदस्य सुमन प्याकुरेलले बताए ।

यहाँ अधिवेशन अलि ढिला हुने भएकाले अहिले नै कसैले अध्यक्ष हुने अथवा मेरो यो पदमा चाहना छ भनेर नभनेको प्याकुरेलले बताए ।

यो प्रदेशमा पनि अध्यक्षका लागि रेवती पन्त र राजकिशोर यादवले चाहना राखेको एक प्रदेश कमिटी सदस्यले बताए । लामो समयसम्म धनुषाको पार्टी अध्यक्ष भएर काम गरेको अनुभव भएकाले पनि एकपटक प्रदेश कमिटीको अध्यक्ष हुने चाहना रहेको यादवले बताए । उनले भने, ‘म लामो समय जिल्ला अध्यक्ष भएँ । अब एकपटक प्रदेश कमिटी अध्यक्ष हुन चाहन्छु । अधिवेशनमा प्रतिनिधि र नेतृत्वले जिम्मेवारी दिए म तयार छु ।’

प्रकाशित मिति: सोमबार, असोज १, २०८० २०:१८