कर्णालीमा अधिवेशनका लागि ६ सय प्रतिनिधि चयन गर्दै एमाले

A+ A A-

एमाले कर्णाली प्रदेश अधिवेशनका लागि आज ६ सय प्रतिनिधि छनोट हुँदैछन् । शनिबार एकै दिन उक्त प्रतिनिधि छनोट हुने भएका हुन् । आगामी असोज १० र ११ गते प्रदेश राजधानी वीरेन्द्रनगर सुर्खेतमा हुने पहिलो अधिवेशनका लािग एमालेले तयारीसमेत तीव्र रुपमा थालिरहेको छ । कर्णालीमा एमालेका संगठित सदस्य ५१ हजार आठ सय ३७ जना छन् ।

एमाले कर्णाली प्रदेश कर्यालयको बैठकले शनिबार प्रदेशभर एकै दिन प्रतिनिधि छनोट गर्ने निर्णय गरेपछि नेताहरु सबै आ–आफ्नो पालिकातर्फ लागेका छन् । कर्णाली प्रदेश कमिटीका रहेको हालको पदाधिकारीहरु पनि प्रतिनिधि बन्न पालिकामै जानुपर्ने नियम एमालेले बनाएको छ ।

एमालेले अधिवेशनका लागि कर्णालीका १० वटा जिल्लाबाट गरी पाँच सय ५० र एमालेका जनवर्गीय संगठनहरुबाट ५० जना गरी जम्मा ६ सय जना प्रतिनिधि छनोट भएर आउने जनाएको छ ।

पार्टीका २२ वटा जनवर्गीय संगठनहरुमध्ये २१ वटा संगठनलाई प्रतिनिधि चयनका लागि एमालेले निर्देशनसमेत दिइसकेको छ । आठवटा जनवर्गीय संगठनलाई तीन/तीन जना र १३ वटा संगठनले दुई/दुई जना प्रतिनिधि चयन गर्न पाउने छन् ।

जसमा अखिल नेपाल महिला संघ, अखिल नेपाल किसान महासंघ, पेशागत महासंघ नेपाल, नेपाल उत्पीडित जातीय मु्क्ति समाज, राष्ट्रिय युवा संघ नेपाल, प्रेस चौतारी नेपाल, राष्ट्रिय स्वास्थ्यकर्मी महासंघ र नेपाल राष्ट्रिय उद्योग व्यवासायी महासंघलाई एक महिला अनिवार्य सहित तीन जना प्रतिनिधि तोकिएको छ ।

यस्तै, दुई जना प्रतिनिधि पाउने संगठनमा नेपाल वुद्धिजीवी परिषद्, नेपाल भूमिहीन सुकुम्वासी संगठन, नेपाल भूतपूर्व सैनिक तथा प्रहरी संगठन, प्रगतिशील तथा पेशागत कानुन व्यवसायी संगठन, लोकतान्त्रिक राष्ट्रिय अपांग संगठन नेपाल, प्रोग्रेसिभ इन्जिनियरिङ एसोसिएसन नेपाल, मानव अधिकार तथा सामाजिक न्याय मञ्च, नेपाल ट्रेड युनियन महासंघ (जिफन्ट), नेपाल खेलकुद महासंघ, लोकतान्त्रिक आदिवासी जनजाति महासंघ नेपाल, अनेरास्ववियु, रिटर्नी फेडरेशन नेपाल र राष्ट्रिय सांस्कृतिक महासंघ रहेका छन्। उनिहरुले एक महिलासहित दुई जना प्रतिनिधि हुन पाउने छन् ।

कुन जिल्लाबाट कति प्रतिनिधि छानिँदै छन् ?

सबैभन्दा बढी प्रतिनिधि सुर्खेतबाट चयन हुनेछन् । १० हजार पाँच सय ५५ जना पार्टी सदस्य रहेको यस जिल्लामा एक सय १२ जना प्रतिनिधि छनोट हुनेछन् । जसमा खुलातर्फ ३० महिला, ५६ पुरुष र दलिततर्फ नौ महिला र १८ पुरुष छनोट हुने छन् ।

यस्तै, तीन हजार पाँच सय ८८ पार्टी सदस्य रहेको सल्यानबाट ३८ जना प्रतिनिधि सहभागी हुनेछन् । जसमा महिलातर्फ आठ, पुरुषतर्फ २२ र दलिततर्फ महिला दुई र पुरुष ६ जना छन् । दुई हजार १७० संगठित सदस्य रहेको रुकुम पश्चिबाट २३ जना प्रतिनिधि चयन हुनेछन् । जसमा खुलतर्फ महिला ६, पुरुष १२ र दलिततर्फ महिला दुई र पुरुष तीन चयन हुनेछन् ।

६ हजार आठ सय पार्टी सदस्य रहेको जाजरकोटबाट ७५ जना प्रतिनिधि चयन हुनेछन् । जसमा खुलाबाट महिला १८, पुरुष ३८, दलिततर्फबाट ६ महिला र १३ पुरुष प्रतिनिधि सहभागी हुनेछन् । तीन हजार आठ सय ३६ जना संगठित सदस्य रहेको डोल्पाबाट ३९ जना प्रतिनिधि चयन हुनेछन् । जसमा ११ महिला, २३ पुरुष खुल्लाबाट र तीन पुरुष, दुई महिला दलिततर्फ छन् ।

मुगुमा एमालेका तीन हजार ३१ जना संगठित सदस्यमा ३२ जना प्रतिनिधि चयन हुनेछन् । जसमा खुला महिलातर्फ आठ, पुरुषतर्फ १७ जना र दलिततर्फ दुई महिला र ६ पुरुष छन् ।

हुम्लाबाट ४८ जना प्रतिनिधि छनोट हुने भएका छन् । चार हजार ६ सय ६५ जना संगठित सदस्य रहेको हुम्लामा १३ महिला २९ पुरुष खुलातर्फ र दलिततर्फबाट दुई महिला र चार पुरुष छन् । चार हजार चार सय ४३ जना संगठित सदस्य संख्या रहेको जुम्ला जिल्लाबाट ४६ जना प्रतिनिधि चयन हुनेछन् । जसमा १३ महिला, २५ पुरुष खुलाबाट र दलिततर्फबाट दुई महिला र ६ पुरुष छन् ।

यस्तै, ६ हजार एक सय तीन पार्टी सदस्य रहेको कालीकोटबाट ६५ जना प्रतिनिधि छानिनेछन् । जसमा १६ महिला, ३३ पुरुष खुलाबाट र दलिततर्फबाट पाँच महिला र १० पुरुष प्रतिनिधि हुन पाउँनेछन् ।

६ हजार ६ सय ५३ संगठित सदस्य रहेको दैलेखबाट खुलातर्फ २० महिला तथा ३९ पुरुष प्रतिनिधि चयन हुनेछन् भने दलिततर्फ पाँच महिला र आठ पुरुष गरी ७२ जना चयन हुँदैछन् ।

प्रकाशित मिति: शनिबार, भदौ ३०, २०८० १५:१६