मेक्सिकोको संसदले लाइभमा देखायो कथित एलियन्सको लास

A+ A A-

एलियन र यूएफओलाई लिएर संसारभर उत्सुकता बढ्दाे छ । वैज्ञानिकहरू वर्षौंदेखि पृथ्वीबाहिर जीवन खोज्न जुटेका छन् । उनीहरूले एलियन्सबारे कुनै ठोस जानकारी पहिल्याउन सकेका छैनन् । तर, यसबारे अनेकाैँ दाबी एकपछि अर्काे गर्दै आउने क्रम जारी छ ।

यस्तै, एक दाबीले मेक्सिकोको संसद यतिबेला तातेको छ । ‘एलियन्सको लास’ भनेर संसदमा पेस गरिएको दुई अवशेषमाथि शुक्रबार संसदमा कडा बहस भएको अमेरिकी सञ्चारमाध्यमले जनाएका छन् ।

मेक्सिको संसदले आफ्नो सार्वजनिक सुनुवाइका क्रममा आधिकारिक रूपमै कथित् एलियन लास संसारलाई देखाएकाे छ । ती दुई अवशेष १ हजार वर्ष पुरानो रहेको दाबी पनि गरिएको छ ।

मेक्सिकन पत्रकार एवं यूएफओमा चासो राख्दै आएका ज्यामी मौसनले सुनुवाइका क्रममा मेक्सिकोका सांसदहरूसामु यी दुई अवशेष राखेका थिए । गैरमानव भनिएका दुवै अवशेष सन् २०१७ मा पेरुको कुस्कोमा फेला परेको बताइएको छ ।

ममीकृत रूपका दुवै अवशेषको हातमा तीन औँला र लामो टाउको देखिन्छ । यी अवशेषको पृथ्वीको जीवनसँग कुनै सम्बन्ध नरहेको दाबी मौसनले गरेका छन् । तर, आलोचकले यसलाई ‘स्टन्ट’को संज्ञा दिएका छन् ।

न्युज एजेन्सी रोयटर्सका अनुसार, मोसनले पहिले पनि यस्तै खालको विवादास्पद दाबी गरेका थिए । असामान्य घटना वा यूएफओबारे आफ्नो व्यक्तिगत अनुभव बाँडिसकेका पूर्वअमेरिकी नौसेना पाइलट रयान ग्रेभ्सले पूरै घटनाक्रमको आलोचना गरेका छन् । ग्रेभ्सले सोसल मिडिया प्लेटफर्ममा एक्समा लेखेका छन्, ‘म यो अप्रमाणित स्टन्टबाट निकै निराश छु ।’

ग्रेभ्स जुलाईमा यूएफओबारे अमेरिकी कांग्रेसमा भएको सुनुवाइमा सहभागी थिए । त्यो बेला उनले हवाई क्षेत्रमा अस्पष्ट घटना देखेको विषयमा निकै कम रिपोर्ट गरिएको बताएका थिए ।

मौसनले कथित् एलियन लास पेरुको प्राचीन् नाजका लाइन्सनजिकै बरामद गरेको र मेक्सिकोको राष्ट्रिय स्वायत्त विश्विविद्यालय (यूएनएएम) ले यसलाई कार्बन–डेटेड गरेको बताएका थिए । यसपछि यो करिब एक हजार वर्ष पुरानो भएको निचोड निकालिएको थियो । मौसनले शुक्रबार रोयटर्ससँग भनेका छन्, ‘आलोचकले अहिलेसम्म मेरो दाबीको खण्डन गर्न प्रमाण अघि सारेका छैनन् ।’

के भन्छिन् पेरुकी संस्कृतिमन्त्री ?

यस्तो अवशेष पाइएको दाबी गरिएका घटना पहिला पनि बाहिर आएका थिए । पेरुकी संस्कृतिमन्त्री लेस्ली उर्टेगाले दक्षिण अमेरिकी देशमा कुनै पनि वैज्ञानिक संस्थानले अवशेषको पहिचान गर्दा गैरमानवीय नभनेको बताएकी छन् । उक्त नमुना पेरुमा कसरी भेटियो भनेर उनले प्रश्न पनि गरिन् । उर्टेगाले मौसन र उनका सहयोगीको सन्दर्भमा बुधबार अबेर रात मिडियासँग भनिन्, ‘यी सज्जनसँग सम्बन्ध राख्ने केही मानिसविरुद्ध संस्कृति मन्त्रालयको तर्फबाट आपराधिक जाहेरी दर्ता गराइएको छ ।’

प्रकाशित मिति: शनिबार, भदौ ३०, २०८० ०२:००