मेस्सी र मबीचकाे प्रतिद्वन्द्विता सकियो- रोनाल्डो

A+ A A-

‘क्रिस्टियानो रोनाल्डो कि लियोनल मेस्सी ?’ यो प्रश्नले एक दशकभन्दा लामो समयसम्म फुटबल समर्थकलाई मनोरञ्जन दिलायाे ।

कतिपय समर्थक दुवै खेलाडी आ-आफ्नो स्तरमा उत्कृष्ट रहेको मान्छन् । तर धेरैले चाहिँ आफूलाई मन पर्ने (रोनाल्डो वा मेस्सी) मध्ये एक जनालाई सर्वकालीन महान् 'गाेट' भन्ने गरेका छन् ।

तर, स्वयम् रोनाल्डोले मेस्सीसँगको प्रतिद्वन्द्विता अब समाप्त भएको बताएका छन् । किनकि, आफूहरू दुवै जनाले युरोपेली क्लब छोडिसकेकाे राेनाल्डाेकाे तर्क छ । पोर्चुगलबाट युरोपेली च्याम्पियनसिप क्यालिफायरकाे तयारीका बेला राेनाल्डाेले मेस्सीदेखि आफू साउदी जाँदा खेप्नुपरेका टिप्पणीसम्म कुरा पत्रकारसित गरे ।

उनी अहिले साउदी अरबको अल-नासर र मेस्सी अमेरिकाको इन्टर मियामीबाट खेलिरहेका छन् ।

'प्रतिद्वन्द्विता जारी छ भन्ने मलाई लाग्दैन । प्रशंकलाई यो मन परेकाे थियाे, याे कुरा राम्राे थियाे । क्रिस्टियानो रोनाल्डोलाई मन पराउनेहरूले लियोनल मेस्सीलाई घृणा गर्न आवश्यक छैन । उनीहरू दुवै उत्कृष्ट हुन् । उनीहरूले फुटबलको इतिहास फेरिदिए’, ३८ वर्षे रोनाल्डोले भने ।

रोनाल्डोले रियल मड्रिड र मेस्सीले बार्सिलाेनाबाट खेलेर आफ्नो करिअरको धेरै समय स्पेनमा बिताए । त्यसैले पनि खेलाडी र प्रशंसकबीच प्रतिद्वन्द्विता बढ्न गयो ।

स्पेनमा खेल्दा यो जाेडी खेलमा सधैं छाइरह्यो ।

मेसीले प्रभावशाली ४ च्याम्पियन्स लिग उपाधि दिलाएर ब्लोग्राना (बार्सिलाेनाकाे निक नेम) सँगको आफ्नो समय टुङ्ग्याइदिए । तर रोनाल्डोले सन् २०१६ देखि २०१८ सम्म लस ब्ल्याङकोस (रियल मड्रिडकाे स्पेनिस नाम) लाई लगातार ३ अभूतपूर्व जितसहित कुल ५ उपाधि दिलाएर स्पेनिस फुटबल छोडे । मेस्सीले १० लालिगा उपाधि पनि जोडे भने रोनाल्डोले २ जिते ।

व्यक्तिगत सम्मानको सन्दर्भमा उनीहरूले सन् २००८ र २०२१ का बीच दिइएका १३ बेलोन डी’ओर पुरस्कारमध्ये १२ हात पारे- रोनाल्डोले ५ पल्ट र मेस्सीले ७ पल्ट ।

स्पेनमा आफ्नो पूरै समयमा मेस्सी र राेनाल्डाेले एकपछि अर्को गोल स्कोरिङ रेकर्ड पनि तोडे ।

मेस्सीले आफ्नो बार्सा करिअरको अन्त्य ७ सय ७८ खेलबाट ६ सय ७२ गोलसँगै गरे । रोनाल्डोले रियल मड्रिडका लागि ४ सय ३८ खेलबाट ४ सय ५० गोलको आश्चर्यजनक स्कोर बनाए ।

रोनाल्डोले भने, ‘संसारभर हाम्रो सम्मान गरिन्छ, यो सबैभन्दा महत्त्वपूर्ण कुरा हो । उनी आफ्नो बाटोमा हिँडिरहेका छन्, म आफ्नो बाटोमा हिँडिरहेको छु । उनको (मेस्सी) ठाउँमा उनले राम्रो खेले । हामी अघि बढ्छौँ, विरासत जारी रहन्छ । तर, यसलाई म प्रतिद्वन्द्विताका रूपमा हेर्दिनँ ।’

उनले अगाडि भने, ‘हामीले १५ वर्षसम्म मञ्च शेयर गर्‍याैँ अनि यसलाई छाेड्याैँ । म उनलाई साथ त भन्दिनँ तर हामी सहकर्मी हौँ, एकअर्कालाई सम्मान गर्छौं ।'

विभिन्न खेलाडी साउदी अरबको फुटबल क्लबमा ठूलो रकम लिएर स्थानान्तरित भइरहेका छन् । आफू र साउदी प्रो लिग (एसपीएल) विरुद्ध गरिएको आलोचनाबारे पनि उनले बाेले ।

'आलोचना सामान्य कुरा हो । कुन मान्छेको आलोचना गरिँदैन ? समस्या र विवाद नभएको के चिज छ ?', ।राेनाल्डाेले उनले प्रतिप्रश्न गरे ।

उनले लिगलाई अघि बढाउन र अन्य स्टार खेलाडीलाई यसमा आकर्षित गर्ने श्रेय पनि आफूलाई नै दिए । ‘मलाई थाहा थियो र म भनिरहने छु धेरैले सोच्थे- रोनाल्डो पागल भयो..पागल अब धेरै पागल रहेन’, उनले भने, ‘अरब लिगमा खेल्नु अब सामान्य कुरा भएको छ ।’

रोनाल्डोले साउदी अरब रोजेयता नेयमार, करिम बेन्जेमा, एनगोलो कान्टे, कालिडो कोलिबली, एडोर्ड मेन्डी, रोबर्टो फिरमिनो, सादियो माने र मार्सेलो ब्रोजोभिकजस्ता खेलाडी एसपीएलमा गइसकेका छन् ।

'यस्तो हुन्छ भन्ने कुरा अल नासर खेलाडीका रूपमा मलाई थाहा थियो । कुनै देश र फुटबलको संस्कृतिलाई बदल्न पाउनु सौभाग्यको कुरा हो । ठूलो नाम हुँदा मलाई गर्व लाग्छ । म एक अग्रणी थिएँ र मलाई यसमा गर्व छ’, रोनाल्डोले भने ।

प्रकाशित मिति: शनिबार, भदौ ३०, २०८० ०१:००