अस्पतालभित्रै कुटपिटको सिकार भएका डा. थापाले छोडे हेटौँडा

A+ A A-

हेटौँडा उपमहानगरपालिका–१ स्थित सञ्चो हस्पिटल प्रालिका प्रमुख डा. विकास थापाले कार्यस्थल हेटौँडा छोडेका छन् । हेटौँडा–१२ का एक हुल समूहको कुटपिटमा परेका डा. थापा बिहीबार काठमाडौं लागेका छन् ।

बुधबार दिउँसो डाक्टर थापासहित सञ्चो हस्पिटलमै कार्यरत अर्का डाक्टर प्रशान्त विडारीमाथि हेटौँडा उपमहानगरपालिका–१२, पदमपोखरीका राजेश प्रधानको परिवार र उनका आफन्तले हस्पिटलमै आएर कुटपिट गरेका थिए । हेटौँडाका चर्चित जनरल फिजिसियन डाक्टर थापाले अब हेटौँडा आउने वा नआउनेबारे परिवारसँग सल्लाह गरेर मात्रै निर्णय लिने बताएका छन् ।

मृतक प्रधानको परिवारले सञ्चो हस्पिटलका चिकित्सकको लापरबाहीका कारण मृत्यु भएको आरोप लगाएको थियो । जबकि प्रधानको मृत्यु चितवनस्थित पुरानो मेडिकल कलेजमा भएको थियो । चितवन जानुअघि प्रधानलाई डेंगी संक्रमण भएपछि सञ्चो हस्पिटलमा उपचारका लागि आएका थिए । सञ्चोले उनको उपचारपछि घर पठाएको थियो । घर पठाएको केही दिनमै उनी पुनः उपचारका लागि चितवन गएकोमा २५ साउनमा मृत्यु भएको थियो ।

यो पनि : हेटौँडामा अस्पतालभित्रै चिकित्सकलाई निर्घात कुटपिट गर्ने चार जना पक्राउ

पीडित डाक्टर थापा बुधबार सञ्चो हस्पिटलको वार्डमा बिरामीको नियमित स्वास्थ्य परीक्षण तथा परामर्शमा रहँदा पदमपोखरीको समूहले उनीसहित अर्का डाक्टरमाथि निर्घात कुटपिट गरेको थियो । जिल्ला प्रहरी कार्यालय मकवानपुरले कुटपिटमा संलग्न मृतककी श्रीमती रमा प्रधान, छोरी रमिता प्रधान, छोरा रोहित प्रधान र भतिजा अनुप प्रधानलाई प्रहरीले पक्राउ गरेको छ । घटनामा संलग्न अन्यको खोजी भइरहेको मकवानपुर प्रहरीले जानकारी दिएको छ ।

डा. थापा बिहीबार बिहान ८ बजे परिवारसहित काठमाडौं गएको हस्पिटल स्रोतले जानकारी दिएको छ । कुटपिटबाट डाक्टर थापाको गाला र अनुहार सुनिएको छ । डाक्टर विडारीको आँखा र अनुहारमा चोट लागेको छ । थापाले थप उपचारका लागि भन्दै हेटौँडा अस्पतालबाट रेफर लिएर काठमाडौं गएका हुन् ।

कास्कीका डा. थापा ९ वर्षदेखि हेटौँडामा कार्यरत थिए । यसअघि उनी चुरेहिल हस्पिटलमा कार्यरत थिए । उनले तत्काल नियमित काममा फर्किने अवस्था नरहेको बताएको हस्पिटल स्रोतले जानकारी दिएको छ ।

प्रकाशित मिति: बिहीबार, भदौ २८, २०८० १६:५३