पोखरामा तीनदिने 'तीज सांस्कृतिक महोत्सव' सम्पन्न

A+ A A-

हरितालिका तीजको अवसरमा पोखरामा आयोजित तीन दिने 'तीज सांस्कृतिक महोत्सव' सम्पन्न भएको छ । पर्यटन महिला व्यवसायी संघ, नेपाल (टेवान) ले पहिलोपटक आयोजना गरेको गण्डकी प्रदेशस्तरीय तीज महोत्सव स्थानीय उत्पादनको प्रवर्धन, महिला प्रतिस्पर्धा र महिला उद्यमी सम्मेलनलगायतका कार्यक्रम गर्दै बुधबार सकिएकाे हाे ।

लेकसाइडको कोमागाने पार्कमा भदौ २५ देखि आयोजित महोत्सव भदौ २७ गते अर्थात बुधबारसम्म पोखरामा पर्यटन व्यवसायलाई चलायमान बनाएर सम्पन्न भएको आयाेजकले जनाएकाे छ । महोत्सवमा गण्डकी प्रदेशका ११ वटै जिल्लाका महिला उद्यमी, स्थानीय उत्पादन र विभिन्न महिला प्रतिस्पर्धात्मक कार्यक्रमसमेत गरिएकाे थियाे ।

कोभिड महामारी र आर्थिक मन्दीले सुस्त बनेको पोखराको पर्यटनलाई चलायमान बनाउने उद्देश्यले आयोजित कार्यक्रममा पोखरा महानगरपालिका, गण्डकी प्रदेश सरकार, पोखरा पर्यटन परिषद्, नाट्टा, टान, रेबान, एनआरएनलगायत संघ संस्थाको सहयोग तथा सहकार्य थियो ।

पहिलोपटक पर्यटनको राजधानी पोखरामा आयोजित तीन दिने तीज महोत्सवमा राधिका हमाललगायतका राष्ट्रिय तथा स्थानीय कलाकारले पनि प्रस्तुती दिएका थिए । महोत्सवमा महिला तीज गीत प्रतिस्पर्धा, दौड, महिला भलिबल प्रतियोगिता, हाजिरीजवाफ प्रतियोगितालगायतका कार्यक्रम पनि गरियाे ।

आयोजक टेवानकी अध्यक्ष कमला गिरीले पोखराले तीज महोत्सवलाई पनि स्थापित गर्दै सबै सरोकारवालालाई जोड्न सफल भएको दाबी गरिन् ।

तीजलाई सरकारी सहयोगको सुनिश्चितता अझै नभएको भन्दै उनले अबदेखि बजेट आउँदा रातो किताबमै हरितालिका तीज कार्यक्रमलाई सरकारबाट सहयोग हुनुपर्नेमा जोड दिइन् । समापन कार्यक्रमका प्रमुख अतिथि गण्डकी प्रदेशका पर्यटनमन्त्री दीपेन्द्र थापालगायतको ध्यानाकर्षण गराउँदै टेवानकी अध्यक्ष गिरीले आगामी दिनमा यस किसिमका कार्यक्रमलाई प्राथमिकतामा राखेर महिलाहरूको योजना, कार्यक्रम, उत्पादन र विकासशील सोचलाई परिस्कृत गर्नुपर्ने बताइन् ।

कार्यक्रममा गण्डकी प्रदेश सरकारका उद्योग, पर्यटन, वन तथा वातावरणमन्त्री दिपेन्द्र थापाले पोखराका पर्यटन क्षेत्रलाई प्रवद्र्धन गर्न महोत्सवले भूमिका खेलेको भन्दै आगामी दिनमा सबैको सहयोग र सहकार्य आवश्यक रहेको बताए ।

पोखराको पर्यटन प्रवर्धनमा पूर्वाधार निर्माणको काम भइरहेको भन्दै निर्माणको कामलाई लिएर पोखराको बारेमा गलत प्रचार नगर्न पनि उनले चेतावनी दिए । पर्यटक आवागमन बढाउन आगामी दिनमा धेरै काम गर्न आवश्यक रहेको भन्दै उनले पोखराको विकासका लागि सबैभन्दा पहिले पोखराका सरोकारवाला, सरकार र निजी क्षेत्र गम्भीर भएर लाग्नुपर्ने बताए ।

कार्यक्रममा सांसद सरस्वती गुरुङले पोखरामा पहिलो पटक व्यवसायिक हित र स्थानीय उत्पादनको प्रवर्धनकाे कार्यक्रमले आगामी दिनमा पनि निरन्तरता पाउनुपर्ने बताइन् ।

टेवानका सल्लाहकार तथा पर्यटन व्यवसायी गणेश भट्टराईले टेवानले ठूलो जोखिम उठाएर पोखराको पर्यटन प्रवर्धनका लागि काम गरेको भन्दै आगामी दिनमा तीज महोत्सवलाई सबैले साथ सहयोग दिनुपर्ने बताए ।

कार्यक्रममा स्थानीय तथा राष्ट्रिय कलाकार, पोखरा तथा काठमाडौंका पत्रकार, गण्डकी प्रदेशका सबै जिल्लाका महिला व्यवसायी, पोखराका सबैजसो व्यवसायी पनि सहभागी थिए । महोत्सवका क्रममा आयोजना गरिएका महिला दौड, महिला भलिबल प्रतियोगिता र तीज गीत प्रतियोगिताका विजेतालाई पुरस्कारसमेत वितरण गरिएको थियो ।

प्रकाशित मिति: बिहीबार, भदौ २८, २०८० ०८:०३