आइफोन १५ सार्वजनिक, एन्ड्रोइडकै चार्जरले चार्ज हुने, के छन् विशेषता ?

A+ A A-

विश्व चर्चित प्रविधि कम्पनी एप्पलको नयाँ स्मार्टफोन आइफोन १५ सार्वजनिक भएको छ । आइफोन १५ सिरिजअन्तर्गत आइफोन १५, आइफोन १५ प्लस, आइफोन १५ प्रो र आइफोन १५ प्रो म्याक्स सार्वजनिक भएका हुन् ।

यी सबै आइफोनमा अब युएसबी सी टाइप चार्जिङ पोर्ट पनि राखिएको कम्पनीले बताएको छ । यसको अर्थ अब आइफोनलाई अन्य एन्ड्रोइड फोनकै चार्जरले पनि चार्ज गर्न सकिन्छ । युरोपियन युनियनले सन् २०२१ बाटै आइफोनलाई युएसबी सी पोर्टका लागि दबाब दिँदै आएको थियो । अन्ततः आइफोनले युरोपियन युनियनको भनाइ मानेको हो । विश्वस्तरमा युएसबी सी केबल चार्जर खुबै मन पराइएको छ ।

अब नयाँ आइफोन १५ का सेटहरू आगामी हप्तादेखि बजारमा खरिद गर्न सकिनेछ । एप्पल कम्पनीका प्रमुख टिक कुकले मंगलबार आइफोन १५ कम्पनीले बनाएको अहिलेसम्मकै शक्तिशाली स्मार्टफोन भएको बताए ।

आइफोन १५ र १५ प्लसमा पहिलेभन्दा राम्रो स्क्रिन छ र क्यामेराको गुणस्तर पनि बढाइएको छ । उता यीभन्दा महँगा आइफोना १५ प्रो र प्रो म्याक्स सेटमा टाइटानियमको फ्रेम लगाइएको छ, जसले आइफोनलाई थप मजबुत बनाउँछ । आइफोन १५ बाट चलचित्र नै खिच्न सकिने र यसबाट अनलाइन गेम बिना झन्झट खेल्न सकिने बताइएको छ ।

आइफोन १५ र आइफोन प्लस १२८, २५६ र ५१२ जीबीमा उपलब्ध हुनेछन्, जसको मूल्य ८०० अमेरिकी डलरदेखि ११०० डलरसम्म पर्न जान्छ । यस्तै, आइफोन १५ प्रो र प्रो म्याक्स १२८ जीबीदेखि १ टेराबाइटमा उपलब्ध हुनेछन् । जसको मूल्य १००० अमेरिकी डलरदेखि १५ सय अमेरिकी डलरसम्म पर्छ ।