विमानस्थल भन्सारका कर्मचारीहरु आन्दोलनबाट ‘ब्याक’

A+ A A-

त्रिभुवन विमानस्थल भन्सार कार्यालयका कर्मचारीहरू आन्दोलनबाट ‘ब्याक’ भएका छन् । सुन तस्करी प्रकरणमा सहकर्मीलाई पक्राउ गरेको र अनुसन्धानकाे नाममा अनावश्यक दुःख दिएको भन्दै उनीहरूले आन्दोलन सुरु गरेका थिए ।

प्रहरीकाे केन्द्रीय अनुसन्धान ब्यूराे (सीआईबी)ले सुन प्रकरणको अनुसन्धान गरिरहेको छ । अनुसन्धानको क्रममा कर्मचारीहरूलाई पक्राउ गर्ने र बयानका लागि बोलाउन थालेपछि उनीहरूले आन्दाेलन थालेका थिए ।

भदौ २४ गते सुरु आन्दोलनका क्रममा कर्मचारीले सोमबार कार्गो जाँचपास बन्द गराएका थिए । भन्सार जाँचपास भई गएको ६० किलो सुन तस्करी प्रकरण र भेपमार्फत ९ किलो सुन तस्करीमा कर्मचारीको पनि मिलेमतो रहेको आरोप छ ।

‘अहिले माग स्थगित छ । हिजो र आज पूरै जाँचपास भयो । हिजो (सोमबार) १२ बजेसम्म अवरोध थियो । ट्रेड युनियनका प्रतिनिधिहरूसँग हाम्रा कर्मचारीहरू बस्नुभयो । विधिसम्मत माग उठाउनुपर्ने कुरा भयो । तत्काललाई त्यस्तो केही समस्या केही छैन । अहिलेलाई माग स्थगित गरेर विधिसम्मत कुरा उठाउने कुरा भएको छ', प्रमुख भन्सार अधिकृत सोना श्रेष्ठले शिलापत्रसँग भने ।

यसअघि आइतबार विज्ञप्ति जारी गर्दै कर्मचारीहरूले २७ गतेभित्र मागहरू सम्बोधन नभए कार्यालयको यात्रु जाँचपास शाखाबाट सम्पादन हुने कामसमेत प्रभावित हुन सक्ने चेतावनी दिएका थिए । उनीहरूले मागपत्र र विरोधका कार्यक्रमबारे विमानस्थल कार्यालयसहित भन्सार विभाग र अर्थ मन्त्रालयमा जानकारी गराएका थिए ।

कर्मचारीहरूको मनोबल गिराउने, आत्मसम्मानमा ठेस पुर्‍याउने, विभिन्न निकायबाट निरन्तर हस्तक्षेप गर्ने काम भएको उनीहरूको भनाइ छ । यस्तो कार्य बन्द नभएसम्म कार्यालयको दैनिक कार्यसञ्चालन गर्न असमर्थ रहेको भन्दै उनीहरूले यसअघि सामूहिक सरुवाको माग गर्दै निवेदन पनि दिएका थिए ।

कार्यस्थलमा डर त्रास विना, निर्भिक रुपमा उच्च मनोबलका साथ काम वातावरण हुनुपर्ने तथा अनुसन्धान गर्ने विभिन्न निकायले विना प्रमाण, पक्राउ पुर्जी अनुमति नलिई कर्मचारीहरूलाई गिरफ्तार गर्ने, दुःख दिने, हैरानी दिने कार्य अविलम्ब बन्द हुनुपर्ने पनि उनीहरूको माग छ । प्रहरीले विना प्रमाण केही कर्मचारीहरू गिरफ्तार गरी हिरासतमा लिएको उनीहरूको आरोप छ ।

bhasar tia1694518338.jpg