कार्यदलको म्याद थप्ने बिषयमा नेकपामा विवाद

A+ A A-

नेपाल कम्युनष्टि पार्टी (नेकपा) को एकिकरण गर्न बनाएको ९ सदस्य कार्यदलको समय थप्ने कि नथप्ने भन्ने विषयमा विवाद देखिएको छ । आज बसेको सचिवालय र कार्यदलको संयुक्त बैठकमा कार्यदलको म्याद थप्ने विषयमा मतभेद देखिएपछि कुनै निर्णय हुन सकेन ।

एकजना सचिवालय सदस्यका अनुसार प्रधानमन्त्री तथा पार्टी अध्यक्ष केपी शर्मा ओली कार्यदललाई विघटन गरेर सचिवालयले नै अब सबै काम गर्नुपर्छ भन्ने पक्षमा देखिएका छन् । तर अर्का अध्यक्ष पुष्पकमल दाहाल प्रचण्ड सचिवालयले नभई कार्यदलको सल्लाह सुझाव र प्रतिवेदन अनुसार अगाडि बढ्नुपर्छ भन्ने पक्षमा देखिएका छन् ।

नेकपाको आजको सचिवालय र कार्यदलको संयुक्त बैठक प्रधानमन्त्री निवास बालुवाटरमा बसेको थियो । बैठकमा कार्यदलका ९ जना सदस्यहरूले आफ्ना धारणा राखेका थिए । धारणा राख्ने बहुमत सदस्यहरूले कार्यदलले काम गर्न चाहँदा–चाहँदै काम गर्न नपाएको गुनासो सचिवालय सदस्यसँग राखेका थिए ।

एकजना सचिवालय सदस्यले भने ‘९ जनामा बहुमत कार्यदलका सदस्यको भनाइ आफूहरूलाई काम गर्न नदिएको रह्यो ।’

कार्यदल सदस्यहरुको भनाइ उदृत गर्दै ती सचिवालय सदस्यले भने बहुमत सदस्यहरु कार्यदलले नै एकताको काम टुङग्याउनु पर्छ भन्ने पक्षमा छन् । ती सदस्यका अनुसार संयोजक वादल र अर्का सदस्य विष्णु पौडेलले आफू अनुकूल प्रतिवेदन नआउने भएपछि कार्यदल नै भंग गर्नुपर्छ भन्ने सोचाइ राखेकाकोमा असन्तुष्टि जनाएका छन् ।

ती सदस्यले भने ‘पार्टी अध्यक्ष केपी शर्मा ओलीले आफू अनुकूल नहुने भएपछि कार्यदलका सदस्य तथा महासचिव विष्णु पौडेल मार्फत कार्यदल विघटन गर्ने प्रस्ताव लैजाने तयारी गरेका थिए ।’ ती सदस्यका अनुसार कार्यदल विघटनपछि अध्यक्ष ओली आफैले एकताको निर्णय गर्ने मनस्थितीमा रहेपनि अधिकांश सचिवालय सदस्यहरुले असहमति जनाएका छन् ।

कार्यदलसँग छलफल नै नगरी कार्यदलका संयोजक रामबहादुर थापा र विष्णु पौडेलको सहमतिमा सचिवालयलाई बुझाएको तीन पेजको प्रतिवेदनमाथि बहुमत सदस्यको असहमति रहेको कार्यदलका एक सदस्यले बताए ।

उनले भने ‘यो प्रतिवेदन त दुई जनाले आफु अनुकुल लेखेका हुन । त्यसमा बहुमत कार्यदल सदस्यको असहमति छ ।

कार्यदल विघटन गरे के हुन्छ

कार्यलले बनाएको भन्दै तीन पेजको प्रतिवेदन थापाले सचिवालयमा बुझाएका छन् । जुन प्रतिवेदनमा बहुमत सदस्यहरुको असहमति रहेको छ । यदि सचिवालयले कार्यदल भंग गरेर आफै पार्टी एकिकरण गर्ने निर्णय गरेमा बहुमत सदस्यहरुले ७ पेजको प्रतिवेदन बुझाउने तयारी गरेको कार्यदलका एक सदस्यले बताए ।

उनले भने ‘नेतृत्वले नै काम गर्न नदिने अझै कार्यदल भंग गर्ने हो भने हामीले पनि ७ पेजको प्रतिवेदन बनाएका छौ । त्यो प्रतिवेदन सचिवालयमा बुझाउने छौ । अनि के हुन्छ ?’

आजको सचिवालय बैठकले भने म्याद थप्ने र नथप्ने विषयमा कुनै निर्णय गर्नसकेको छैन । भोली बिहान बालुवाटारमा बस्ने सचिवालय बैठकले कार्यदलको समय थप्ने अथवा विघटन गर्ने निर्णय गर्ने छ ।

नेकपाको सचिवालय बैठकले यहि पुस १२ गते कार्यदल बनाएको थियो ।

कार्यदलले लामो समय सम्म काम गर्न नसकेको भन्दै यसको औचित्यमाथि नै प्रश्न उठ्न थालेको थियो । यस्तो भएपछि कार्यदलमा नै विवाद भएको थियो । कार्यदलमा विवाद हुँदा संयोजक थापाको पक्षमा विष्णु पौडेल, शंकर पोख्रेल र रघुवीर महासेठ थिए । अर्को पक्षमा बर्षमान पुन, योगेश भट्टराई, सुरेन्द्र पाण्डे, लेखराज भट्ट र वेदुराम भुसाल रहेका छन् ।

हेर्नुहाेस् बादलले सचिवालयमा पेश गरेकाे प्रतिवेदन