के गलत खानपानले बाँझोपन हुन सक्छ ? (भिडियाे)

A+ A A-

बाँझोपनको समस्या बढ्दै गएको छ । यो समस्या बढ्नुका विभिन्न कारणमध्ये खानपान तथा परिवर्तित जीवनशैली पनि भएको प्रजनन् तथा स्त्री रोग विशेषज्ञ डा. निजा राजभण्डारी बताउँछिन् ।

उनी भन्छिन्, ‘पहिला त्यति धेरै प्रतिस्पर्धा थिएन । धेरै तनाव थिएन । खानेकुराहरूमा मिसावट थिएन । खाद्यान्नमा विभिन्न किसिमका रसायनहरू प्रयोग हुँदैनथे । अहिले सबैभन्दा मुख्य कुरा त वातावरण नै प्रदूषित छ । खानेकुराहरूमा पनि धेरै रसायनहरू प्रयोग गर्ने गरेको पाइन्छ । जसले गर्दा प्रजनन् क्षमतामा असर गर्ने गर्छ ।'

त्यसो त, विभिन्न अनुसन्धानहरूले ४०/५० वर्षको अवधिमा खानपिनको असरले गर्दा पुरुषको वीर्यमा शुक्रकिटको मात्रा ३२ प्रतिशतले कम भएको भनिएको छ ।

डा. राजभण्डारीका अनुसार अहिले हरियो सगसब्जीको प्रयोग कम गर्ने गरिन्छ । खाने गरेका खानेकुराहरूमा पनि रसायनहरू प्रयोग गरिएको हुन्छ । र, जीवनशैली परिवर्तन भइरहेको छ ।

उनी भन्छिन्, ‘शारीरिक अभ्यास गर्ने गरेको पाइँदैन । दुई मिनेट हिँड्न पनि अल्छी गर्छन् । जनसंख्या बढ्दै जाँदा त्यहीअनुसारको प्रतिस्पर्धा पनि बढ्दै गएको छ । यसले गर्दा अहिले मानिसहरूमा ‘वर्क स्ट्रेस’ धेरै छ ।’

यस्ता सबै कुराहरूले शरीरमा नकारात्मक परिवर्तन ल्याउँछन्, जसले गर्दा प्रजनन्‌लाई असर गर्छ । यसले महिला र पुरुष दुवैलाई असर गर्छ ।

उमेर बढ्दा प्रजनन् क्षमतामा कमी

त्यस्तै, युवा अवस्थामा प्रजनन् क्षमता हुन्छ, उमेर बढ्दै जाँदा यो पनि कम हुँदै जाने डा. राजभण्डारी बताउँछिन् । बाँझोपन जुनसुकै उमेरमा पनि हुन सक्छ । कसैलाई ढिलो हुन सक्छ, कसैलाई चाँडो पनि हुन सक्छ । यो समस्या केही दम्पतीमा पहिलो बच्चामै पनि हुन सक्छ भने केहीको दोस्रो बच्चाको योजनाका बेलामा पनि हुन सक्छ । तर, बाँझोपनको उपचार हुन्छ ।

उनी भन्छिन्, ‘पछिल्लो समय यसैमा विशेषज्ञता हासिल गरेर आएका चिकित्सकहरू पनि छन् । त्यसैले कुनै न कुनै तरिकाबाट गर्भ निर्धारण गर्न सकिन्छ । र, यसलाई सकारात्मक रूपमा सोच्न आवश्यक छ ।’