बीपीले १५ वर्ष पाएको भए के के हुन्थ्यो ?

A+ A A-

नेपाली कांग्रेसको मुख्यालय सानेपामा दोस्रो दिनको बीपी साहित्य महोत्सव जारी छ । महोत्सवको दोस्रो सेसन ‘बीपीले नपाएका १५ वर्ष’ शीर्षकमा विचार मन्थन भइरहेको छ ।

विज्ञहरू हरि शर्मा, विपिन अधिकारी, अच्युत वाग्ले र मञ्चला झासँग भइरहेके विचार मन्थनमा उनीहरूले विचार राखिरहेका छन् । यो सेसनको विचार छलफलमा महामन्त्री गगन थापाले सहजीकरण गरिरहेका छन् ।

बीपीले सक्रिय रूपमा काम गर्न पाएको भए उनले परिकल्पना गरेका कुरा कार्यान्वयन गर्ने विश्लेषक हरि शर्माले बताए ।

‘बीपीले १५ वर्ष पाएको भए जे कुराहरू सुरु गर्नुभएको थियो । भूमिसुिधार, न्यायपूर्ण समाज, औद्योगिक समाज, परराष्ट्र नीति परिकल्पना गर्नुभएको थियो, त्यो लागू गर्नुहुन्थ्यो,' शर्माले भने, '१८ महिनामा जे गर्नुभयो चिन्तन मात्र होइन काम गर्न सक्ने नेताको रूपमा देखिएका छन् । केही गरौँ भन्ने हुटहुटी पनि थियो ।’

संविधानविद अधिकारीले भूमिसुधारमा राजनीति गर्ने एक मात्र व्यक्ति बीपी भएको बताए । ‘भूमीसुधारमा राजनीति गर्ने एक मात्र व्यक्ति बीपी कोइराला हुन् । सबैभन्दा ठूलो ऊर्जावान समयमा झ्यालखानामा बस्नुपर्‍यो । राजनीतिक दलमाथि प्रतिबन्ध लगाउँदै गर्दा बीपीको योजना प्रभावित भयो,’ उनले भने ।

अर्थशास्त्री वाग्लेले खर्च गर्न सक्ने, योजनाको परिकल्पना र कार्यान्वयन गर्न सक्ने नेतृत्वको रूपमा बीपीलाई अर्थ्याए ।

‘२०१७ असार १३ गते सार्वजनिक गरिएको पञ्चवर्षीय योजनामा २२ करोड १ अर्ब ९६ करोडको अनुमान गर्नुभयो । १६ करोड कृषि उत्पादनको योजना राख्नुभयो । यो अघिल्लो भन्दा ९ गुणा बढीको योजना हो,' वाग्लेले भने, '२२ करोडको बजेटमा ८ करोड एकै वर्ष खर्च भएको थियो । १ वर्षमा १ चौथाइ खर्च हुन सक्ने रहेछ । कर्मचारी र नेतृत्व मिलेमा खर्च गर्न सकिने रहेछ ।'

कार्यक्रममा झाले बीपीले १५ वर्ष पाएको भए अहिलेको नागरिकका समस्या नआउने विश्लेषण सुनाइन् । ‘उहाँको कार्यकालमा १ वर्षमा १ हजार ६ सय विद्यालय बनाएका छन् । २० वर्षमा राष्ट्रिय गौरवको आयोजना सम्पन्न गरेका छैनौँ । १५ वर्ष बीपीले पाएको भए लाखौँ युवा रोजगारीको लागि विदेशीनुपर्ने थिएन,' झाले भनिन्, 'मलको लागि एसएसबीको डण्डा खानुपर्ने थिएन । मिटरब्याजपीडित माइतीघरमा आन्दोलन गर्न आउन पर्ने थिएन ।’

प्रकाशित मिति: सोमबार, भदौ २५, २०८० १३:३९