एसिया कप : पहिलो पावर प्लेमा पाकिस्तानविरुद्ध भारतको विस्फोटक ब्याटिङ

A+ A A-

एसिया कप क्रिकेट प्रतियोगिताको सुपर फोर चरणमा आज चिरप्रतिद्वन्द्वी भारत र पाकिस्तानबीच खेल भइरहेको छ । श्रीलंकाको कोलम्बोमा टस जितेर पाकिस्तानी कप्तान बाबर आजमले भारतलाई पहिला ब्याटिङको निम्तो दिएपछि भारतले पहिला ब्याटिङ गरिरहेको छ ।

भारतले पाकिस्तानको खतरनाक बलिङ आक्रमणविरुद्ध विस्फोटक सुरुवात गरेको छ । पावर प्ले सकिँदा (१० ओभर) भारतले विना क्षति ६१ रन बनाएको छ । भारतका शुमभन गिल र रोहित शर्माले उत्कृष्ट सुरुवात गरेका छन् । शर्माभन्दा गिल आक्रामक देखिएका छन् । उनले यो समाचार तयार पार्दासम्म ३४ बलमा ४७ रन बनाइसकेका छन् । उता रोहित शर्माले ३२ बलमा २० रन बनाइसकेका छन् ।
पाकिस्तानका फास्टबलर शाहिन शाह अफरिदी घाइते भएर मैदान बाहिर गएका छन् ।

जारी प्रतियोगितामा भारत र पाकिस्तानबीच यो दोस्रो भेट हो । यसअघि श्रीलंकाकै क्यान्डीमा दुई टिमबीच भेट भएको थियो । तर, वर्षाका कारण एक इनिङ्स मात्र ब्याटिङ भयो । जसमा भारतीय ब्याटर पाकिस्तानी फास्ट बलिङ आक्रमणका अगाडि निरीह बनेका थिए ।

पाकिस्तानले खेल हुनुभन्दा २४ घण्टा अगाडि शनिबारै आफ्नो प्लेइङ ११ सार्वजनिक गरेको थियो । भारतीय कप्तान रोहित शर्माले भने आज टसपछि प्लेइङ सूची सार्वजनिक गरेका छन् । दुवै टिममा यसअघि खेलेका केही खेलाडी परिवर्तन भएका छन् । पाकिस्तानी टिममा यसअघि खेलेका स्पीनर मोहम्मद नवाजको स्थानमा फास्ट बलर फहिन अशरफ आएका छन् ।

उता भारतीय टिममा श्रेयस अय्यरको स्थानमा केएल राहुल र मोहम्मद शामीको स्थानमा जसप्रित बुमराह आएका छन् । खेल केही समयपछि सुरु हुनेछ । सुपर फोर चरणमा पाकिस्तानले पहिलो खेलमा बांगलादेशलाई पराजित गरिसकेको छ भने भारतले यो चरणमा पहिलो खेल खेल्दै छ ।