लुम्बिनीमा ओलीले चाहेर पनि रोक्न नसकेको गुटबन्दी कर्णालीमा रोकिएला ?

A+ A A-

नेकपा एमालेले १० र ११ असोजमा कर्णाली प्रदेश कमिटीको प्रथम अधिवेशन गर्दै छ । अधिवेशनको तयारीलाई एमाले कर्णालीले तीव्र पारेको छ ।

लुम्बिनीबाट सुरु भएको एमालेको प्रथम प्रदेश अधिवेशनबाट उपाध्यक्ष विष्णु पौडेल र महासचिव शंकर पोखरेलबीचको गुटबन्दीले अध्यक्ष केपी शर्मा ओलीलाई नै बाइपास गरेको सन्देश प्रवाह भइरहेको छ । अध्यक्ष ओलीले लुम्बिनीको नेतृत्व चयन सहमतिमै गर्न निर्देशन दिएका थिए । तर, ओलीको निर्देशनविपरीत उपाध्यक्ष पौडेल र महासचिव पोखरेल समूहको चरम गुटबन्दीले नेतृत्वको चयन निर्वाचनमार्फत नै भयो ।

अध्यक्ष ओलीको उत्तराधिकारीका रूपमा हेरिएका नेताहरू हुन्, उपाध्यक्ष पौडेल र महासचिव पोखरेल । पौडेल र पोखरेलबीच वर्चश्वका लागि आन्तरिक रूपमा कडा प्रतिस्पर्धा हुने गरेको छ । जसको उदाहरण लुम्बिनी प्रदेशको राजधानी सार्ने विषयलाई यी दुई नेताले प्रतिष्ठाको लडाइँ बनाएका थिए । ४ मंसिर २०७९ मा सम्पन्न संघ, प्रदेश र स्थानीय तहको निर्वाचनमा टिकट वितरणमा समेत पौडेल र पोखरेलबीच कडा टक्कर चलेको बताइन्छ ।

लुम्बिनी अधिवेशनमा बुटवलका पौडेल र दाङका पोखरेल समूहको गुटबन्दीले एमाले राजनीतिमा ओलीभित्र दुई धार प्रस्ट बनेको छ भने यसले अन्य प्रदेशमा पनि गुट उपगुट निर्माणको सन्देश दिएको छ । एमाले अध्यक्ष ओलीले १६ भदौमा लुम्बिनी पुगेर प्रदेशका नेताहरूलाई गुटबन्दी नगर्न सन्देश दिएका थिए । प्रदेश अधिवेशनमा दुई समूहबीच चुनावी प्रतिस्पर्धा हुने संकेत बुझेपछि अध्यक्ष ओलीको प्रस्ट भनाइ थियो- चुनावी प्रतिस्पर्धामा नजानू । लुम्बिनी प्रदेशमा उपाध्यक्ष पौडेल र महासचिव पोखरेल समूहबीच देखिएको आन्तरिक प्रतिस्पर्धालाई रोक्न चाहेका ओलीले त्यसको जिम्मा भने सचिव पद्‌मा अर्याललाई दिएका थिए ।

एमालेमा लुम्बिनीले देखाएको अभ्यासले कर्णाली पनि अछुतो रहने छैन । कर्णालीमा भने फरक माहौल निर्माण भइरहेको आकलन गर्न सकिन्छ । लुम्बिनीमा उपाध्यक्ष पौडेल र महासचिव पोखरेलका समूह प्यानल नै बनाएर निर्वाचनमा होमिएका थिए । तर, कर्णालीमा भने उपाध्यक्ष पौडेलको प्रभाव छैन । कर्णालीमा महासचिव पोखरेलको समूहभित्रै दुई गुट देखा परेका छन् ।

एमाले पार्टी सचिव एवम् कर्णाली प्रदेश इन्चार्ज लेखराज भट्टले कर्णालीमा कुनै पनि गुट नरहेको सन्देश प्रवाह गर्न खोजे पनि स्थायी कमिटी सदस्य यमलाल कँडेल र गोरखबहादुर बोगटीबीचको टकरावले अघोषित गुट प्रस्ट देखिन्छ । यी दुई नेता महासचिव पोखरेलनिकट मानिन्छन् ।

कँडेल र बोगटी गुटको प्रतिस्पर्धाले कर्णालीमा पनि सर्वसम्मत नेतृत्व चयन हुने सम्भावना निकै कम छ । केही साताअघि सुर्खेत जिल्ला इन्चार्जको जिम्मेवारी पाएका स्थायी कमिटी सदस्य बोगटीले आफूलाई सुर्खेत जिल्ला कमिटीले सहयोग नगरेको आशय व्यक्त गरेका थिए ।

यो पनि : कर्णालीमा शंकर पोखरेल समूहमै दुई गुट

आसन्न प्रदेश अधिवेशनमा कँडेल पक्ष नै हाबी हुने सम्भावना उत्तिकै छ । कँडेल पक्षधरका तीन जना पोलिटब्युरो सदस्य सल्यानका गुलावजंग शाह, दैलेखका लक्ष्मीप्रसाद पोखरेल र प्रदेश कमिटी सदस्य सुर्खेतका ध्रुवकुमार शाही अध्यक्षको दौडमा छन् ।

यस्तै, बोगटी पक्षधरका केन्द्रीय सदस्यहरू सुर्खेतका नवराज रावत र कालीकोटका मीनबहादुर शाही अध्यक्षका बलिया दावेदार मानिएका छन् । कर्णालीबाट ३० जना केन्द्रीय सदस्य रहेकोमा अधिकांश नेताहरूले अध्यक्षमा आकांक्षा व्यक्त गरेका छन् । कर्णालीका पूर्वसभामुख राजबहादुर शाही र केन्द्रीय सदस्य विष्णु रिजाल पनि अध्यक्षको दौडमा छन् । तर, यी दुई नेताले हालसम्म कित्ता क्लियर गरिसकेका छैनन् । एमाले कर्णालीले हालसम्म पनि पदाधिकारीका लागि प्रारम्भिक खाका तयार गरेको भने छैन ।

अधिवेशनमा कँडेलको वर्चश्व रहँदा सुर्खेत, दैलेख र सल्यान मध्ये एक जिल्लाले प्रदेश अध्यक्ष पाउने सम्भावना छ । प्रदेश राजधानी भएकाले पनि सुर्खेतलाई विशेष महत्त्वका साथ हेरिएको छ । स्रोतका अनुसार अध्यक्ष, उपाध्यक्ष र सचिव सुर्खेत, दैलेख र सल्यानले लिने गरी आन्तरिक छलफलमा कँडेल टिम जुटिरहेको छ । यसो हुँदा प्रदेश पदाधिकारी चयनमा स्थायी कमिटी सदस्य कँडेलको जोडबल सुर्खेतलाई हुने देखिन्छ ।

कँडेलको हस्तक्षेप रहेको खण्डमा सुर्खेतले अध्यक्ष पाउने निश्चित छ । यसो हुँदा ध्रुवकुमार शाही अध्यक्ष बन्ने पक्का हुनेछ । अध्यक्ष दैलेख वा सल्यानले पाउँदा सुर्खेतले सचिव लिने एमाले वृत्तमा चर्चा भइरहेको छ । दैलेखले अध्यक्ष पाए पोलिटब्युरो सदस्य लक्ष्मीप्रसाद पोखरेल र केन्द्रीय सदस्य विष्णु रिजाल आमनेसामने हुनेछन् । एमाले स्रोतका अनुसार पोखरेलभन्दा पार्टीको तल्लोस्तरसम्म सक्रिय रिजाल अध्यक्ष बन्ने पक्कापक्कीजस्तै छ । सल्यानले अध्यक्ष पाउने माहौल बनेको खण्डमा पोलिटब्युरो सदस्य गुलावजंग शाह अध्यक्ष हुने स्रोतको दाबी छ ।

यस्तै, बोगटी टिमबाट केन्द्रीय सदस्यहरू सुर्खेतका नवराज रावत र कालीकोटका मीनबहादुर शाही अध्यक्षको उम्मेदवार बन्ने सम्भावना बढी छ । प्रभाव जमाउन सकेको खण्डमा रावत अध्यक्षको उम्मेदवार बन्न सक्नेछन् ।अधिवेशन आउन एक झन्डै दुई साता बाँकी रहँदा अध्यक्षका दाबेदार नेताहरूले केन्द्रको निर्णय कुरेर बसेका छन् । केन्द्रको सिग्नल अनुसार प्रदेश अधिवेशनमा लाग्ने दाउमा नेताहरू देखिन्छन् ।

अधिवेशनको तयारी तीव्र

एमालेले सुर्खेतमा हुने कर्णाली प्रदेशको प्रथम अधिवेशनको तयारी तीव्र पारेको जनाएको छ । एमाले कर्णाली प्रदेश अध्यक्ष विनोदकुमार शाहले आवश्यक तयारी तीव्र पारिएको बताए । अध्यक्ष शाहका अनुसार अधिवेशनको उद्घाटन पार्टी अध्यक्ष केपी शर्मा ओलीले गर्नेछन् ।

अधिवेशनका लागि प्रदेश अध्यक्ष शाहको संयोजकत्वमा १५ सदस्यीय मूल ब्यवस्थापन समिति गठन गरिएको छ । अधिवेशनमा प्रदेशभरबाट झन्डै ६ सय ५० प्रतिनिधि सहभागी हुनेछन् । जिल्लाबाट प्रतिनिधि चयन भने भदौ ३० गते एकैदिन गर्ने तय भएको छ ।

यस्तै, अधिवेशनको प्रतिनिधि छनोट अनुपात भूगोल खुल्लातर्फ एक सय पार्टी सदस्य बराबर एक हुनेछ । दलिततर्फ ७५ पार्टी सदस्य बराबर एक जना प्रतिनिधि हुने र छनोट भएका प्रतिनिधिमध्ये एक तिहाइ महिला संख्या अनिवार्य हुनुपर्ने व्यवस्था गरिएको छ ।

प्रतिनिधि छनोटको आधार भूगोलका लागि पालिका र दलिततर्फका लागि प्रदेश निर्वाचन क्षेत्र रहने साथै दलित पार्टी सदस्यले दलित वा भूगोलमध्ये कुनै एक क्षेत्र रोज्न सक्नेछन् । प्रतिनिधि छनोटको व्यवस्थापन भूगोलका लागि सम्बन्धित पालिका कमिटी र दलितका लागि सम्बन्धित प्रदेश निर्वाचन क्षेत्र समन्वय कमिटीले गर्ने अध्यक्ष शाहले बताए ।

प्रकाशित मिति: आइतबार, भदौ २४, २०८० १३:२८