तालिम प्राप्त स्वास्थ्यकर्मीबाट मात्र गर्भपतन गराउन सुझाव

A+ A A-

कानुनले गर्भपतनको व्यवस्था गरे पनि जहाँ पायो त्यहीँ गर्भपतन गराउँदा जोखिम बढेको सरोकारवालाले बताएका छन् । जहाँ पायो त्यहीँ गर्भपतन गराउँदा खोखिम बढेको भन्दै तालिम प्राप्त स्वास्थ्यकर्मीबाट मात्रै गर्भपतन गराउन सरोकारवालाले सुझाव दिएका छन् ।

सुदूरपश्चिम प्रदेशमा सुरक्षित गर्भपतन सेवाको उपलब्धि, चुनौती र समाधानका उपायहरू विषयक आज धनगढीमा आयोजित कार्यक्रममा सो सुझाव दिइएको हो ।

नेपाल सरकारले सूचीकृत गरेको स्वास्थ्य संस्थामा तालिम प्राप्त स्वास्थ्यकर्मीबाट मात्र सुरक्षित गर्भपतन गराउनुपर्ने सामाजिक विकास मन्त्रालयका स्वास्थ्य महाशाखा प्रमुख नरेन्द्रसिंह कार्कीले बताए ।

“अनिच्छित गर्भ रहन गएमा महिलाको मञ्जुरीमा गर्भपतन गर्न पाइन्छ” उनले भने, “तर जहाँ पायो त्यहीँ गर्न पाइँदैन । सूचीकृत स्वास्थ्य संस्थामा तालिम प्राप्त स्वास्थ्यकर्मीबाट मात्रै गर्भपतन गराउनु पर्दछ ।”

गर्भपतनका कारण हुन सक्ने जोखिमबाट जोगिनका लागि तालिम प्राप्त स्वास्थ्यकर्मीबाट सूचीकृत स्वास्थ्य संस्थामा मात्रै गर्भपतन गराउन आवश्यक रहेको कार्कीले बताए । गर्भपतन गराउनुपर्ने अवस्था सिर्जना हुन नदिनका लागि परिवार नियोजनका साधनको प्रयोगमा बढावा दिन जरुरी रहेको कार्कीले सुझाव दिए ।

नेपालमा सुरक्षित मातृत्व तथा प्रजनन् स्वास्थ्यको अधिकारसम्बन्धी ऐनले गर्भवती महिलाको मञ्जुरीले १२ हप्तासम्मको गर्भपतन गराउन सकिने व्यवस्था गरेको छ । यसैगरी, गर्भपतन नगराए गर्भवती महिलाको ज्यानमा खतरा पुग्नसक्ने वा शारीरिक, मानसिक स्वास्थ्य खराब हुन सक्ने, बच्चा बिकलाङ्ग जन्मिने इजाजत प्राप्त चिकित्सकको राय छ ।

जबरजस्ती करणी वा हाडनाता करणीबाट रहन गएको गर्भ, महिलालाई एचआईभी लागेको भएमा गर्भवती महिलाको मञ्जुरीले २८ हप्तासम्मको गर्भपतन गर्न सकिने प्रावधान रहेको छ । तर २८ हप्तासम्मको गर्भपतन गर्न सकिने व्यवस्थाले समस्या निम्त्याइरहेको सरोकारवालाको भनाइ छ ।

ऐन संशोधन गर्न आवश्यक रहेको स्वास्थ्य सेवा विभागको पूर्व महानिर्देशक डा लक्ष्मीराज पाठकले बताए । उनले गर्भपतनको व्यवस्थासम्बन्धी दुईवटा ऐन बाझिएकाले संशोधन गर्नुपर्ने सुझाव दिए ।

कृपा नेपालका निर्देशक आनन्द तामाङको अध्यक्षतामा भएको कार्यक्रममा गर्भपतनमा सञ्चारकर्मीको भुमिकाबारे पत्रकार उद्धव पुरी, सुदूरपश्चिम प्रदेशमा गर्भपतनको अवस्थाबारे सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्की, गर्भपतन नियन्त्रणका लागि प्रदेश सरकारले ल्याउन लागेको निर्देशिकाबारे स्वास्थ्य विज्ञ लक्ष्मी राज पाठकले प्रस्तुति गरेका थिए ।

प्रकाशित मिति: शुक्रबार, भदौ २२, २०८० १९:५९