कलेज आइडिया हन्टको आवेदन खुल्यो, विजेताले एक लाख रुपैयाँ पाउने (भिडियो)

A+ A A-

आइडिया स्टुडियो नेपालले वार्षिक रूपमा आयोजना गर्दै आएको ‘कलेज आइडिया हन्ट २०२३’ का लागि आवेदन खुला गरेको छ ।

त्रिभुवन विश्वविद्यालय व्यवस्थापन संकायको सहकार्य तथा स्कुल अफ म्यानेजमेन्ट त्रिभुवन विश्वविद्यालयको संयोजनमा आइडिया स्टुडियो नेपालले आवेदन खुला गरेको हो । नेपाली समाजको रुपान्तरण र व्यवसायिकताको प्रवद्र्धनमा क्रियाशील आइडिया स्टुडियोले उच्च शिक्षा अध्ययन गरिरहेका तथा नयाँ योजना र आइडियासहित उद्यम गर्ने सोच बनाएका विद्यार्थीलाई लक्षित गरी ‘कलेज आइडिया हन्ट–२०२३’ को आयोजना गरेको हो ।

वर्तमान युग र समयसापेक्ष समस्या र अवसरसम्बन्धित नवीनतम् तथा दिगो समाधानसहितका आइडिया भएका विद्यार्थीहरूले आवेदन दिन सक्नेछन् । आइडिया स्टुडियो नेपालकी रणनीति तथा सञ्चार प्रमुख सदीक्षा श्रेष्ठले कलेज आइडिया हन्टको महत्त्व र अवसरबारे प्रस्ट पारेकी थिइन् । यस्तै, कलेज आइडिया हन्ट–२०२० की आइडिएटर अन्जना मल्लले आफ्नो व्यवसाय सफल हुनुमा आइडिया स्टुडियोको ठूलो सहयोग भएकोे बताउँदै कलेज आइडिया हन्ट एउटा कार्यक्रम मात्र नभएर आत्मविश्वास वृद्धिको स्रोत पनि भएको बताइन् ।

नेपालमा अवसर हुँदाहुँदै पनि युवाहरू अवसरको खोजीमा विदेशिएको अवस्थामा यस्ता कार्यक्रमले आइडिया भए देशमै केही गर्न सकिने आत्मविश्वास दिने त्रिभुवन विश्वविद्यालयको व्यवस्थापन संकायका सहायक डिन डा. दिलिप पराजुलीले बताए । यता, काठमाडौं मोडल कलेजका प्रधानाध्यापक सुरेन्द्र सुवेदीले विद्यार्थीहरूले आइडिया स्टुडियो नेपालको तर्फबाट पाएको मौका, अवसर र उद्यमशीलता मानसिकताको विकासबारे चर्चा गरे ।

आइडिया स्टुडियो नेपालका कार्यकारी अध्यक्ष डा. छिरिङ लामाले स्नातक, स्नातकोत्तर र पीएचडी गर्दै गरेका वा गरिसकेका विद्यार्थीहरूलाई आवेदन पठाउन अनुरोध गर्दै उक्त विद्यार्थीहरूलाई भविष्यमा समेत आइडिया स्टुडियोले आवश्यक सहयोग गर्ने बताए ।

असोज १४ सम्म आवेदन दिन सकिने कलेज आइडिया हन्टमा प्राप्त आइडियामध्येबाट उत्कृष्ट २० आइडियालाई व्यवसायसम्बन्धी विभिन्न तालिम तथा परामर्श प्रदान गरिनेछ । यस्तै, उत्कृष्ट ३ विजेताले जनही १ लाख नगद पुरस्कारका साथै आइडिया स्टुडियो सिजन ७ मा सिधै प्रवेश पाउनेछन् । साथै इन्क्युबेसन कार्यक्रम, व्यवसायिक सञ्जाल, रियालिटी टिभी सो र लगानीको अवसरसमेत प्राप्त गरिनेछ ।

प्रकाशित मिति: शुक्रबार, भदौ २२, २०८० १५:५०