बीपी साहित्य महोत्सवबाट के सन्देश दिन चाहन्छ कांग्रेस ?

A+ A A-

अघिल्लो वर्षसम्म नेपाली कांग्रेसले जननायक बीपी कोइरालाको जन्मजयन्ती कर्मकान्डी रूपमा मात्रै मनाउँथ्यो । बीपीकै विचारलाई अहिले पनि अंगालेर हिँडेको दाबी गर्ने कांग्रेसले सानातिना केही औपचारिक कार्यक्रम मात्रै गरेर उनलाई सम्झिन्थ्यो ।

तर, यसपटक कांग्रेसले बीपीलाई सम्झिने तरिका बदलेको छ । अर्थात्, यसपटक कांग्रेसले बीपीको जन्मजयन्तीलाई बृहत् रूपमै मनाउँदैछ । कांग्रेसले यसपटक बीपीको जन्मजयन्तीका अवसरमा तीन दिने साहित्य महोत्सवको आयोजना गरेको छ । कांग्रेसले यसपटक भदौ २४, २५ र २६ गते बीपी साहित्य महोत्सव पार्टी कार्यालय सानेपामा आयोजना गर्दैछ । कार्यक्रमको तयारी पनि अन्तिम चरणमा पुगेको कांग्रेस सहमहामन्त्री तथा महोत्सवका संयोजक बद्री पाण्डेले बताए ।

बीपीकै विचारलाई शीरोधार्य गरेर अघि बढेको दाबी गरे पनि कांग्रेसले बाटो बिराउँदै गएको छ । बीपीको विचारलाई व्यवहारमा उतार्न कांग्रेसजन चुकेका छन् । ‘व्यवहारमा कहीँ कमजोरी र अस्पष्टता देखियो । सिद्धान्तत: दस्तावेज, हामीले बनाएको संविधान र हामीले ल्याएको संघीय लोकतान्त्रिक गणतन्त्र र बहुलवादलाई केन्द्रविन्दुमा राखेर समाजवादलाई मूल अर्थ प्रणाली मान्ने हिसाबले हाम्रो कमजोरी छैन । व्यवहारमा कमजोरी भए भनेर रिभिजिट र रिभिजन होस् भनेर त्यसलाई जस्ताको तस्तै आत्मसात गरौँ र व्यवहारमा लागू गरौँ भनेर महोत्सव आयोजना गर्न लागेका हौँ,’ पाण्डेले शिलापत्रसँग भने ।

यसपटक बीपीको विचार नयाँ पुस्तामा हस्तान्तरण गर्न चाहन्छ कांग्रेस । ‘यसपटक कम्प्रोहेन्सिभ किसिमले उहाँको साहित्य, राजनीति सबै कुरालाई हामीले आत्मसात गर्ने, अरु राजनीतिक दललाई पनि यसमा ध्यानाकर्षण गराउने, नयाँ पुस्तामा पनि बीपीको विचार नवीकरण र हस्तान्तरण गर्न बृहत किसिमले कार्यक्रम आयोजना गर्दैछौँ, पाण्डेले भने ।

साहित्य महोत्सवमा साहित्यसँगसँगै अर्थ, राजनीति, परराष्ट्र, सामाजिक रुपान्तरणलगायतका अन्य विषयमा पनि चर्चा हुनेछ । ‘बीपीको व्यक्तित्व नै बहुआयामिक छ, त्यो प्रकाशित होस् भन्ने चाहेका छौँ,’ महोत्सवको तयारीमा खटिएका सोझो गाउँलेले शिलापत्रसँग भने ।

नेताहरू अध्ययनशील छैनन् भन्ने आरोप लागिरहेका बेला महोत्सवले नेताहरूलाई पनि अध्ययनशील बनाउने उनले बताए । ‘नेताहरू अध्ययनशील छैनन् । विचार र बहस गर्दैनन् भन्ने आरोप छ । त्यो आरोप चिर्न र नेताहरूले विचार बहस गर्छन्, अध्ययन गर्छन् भन्ने कुराको पुष्टि महोत्सवले गर्नेछ,' गाउँलेले भने, ‘कांग्रेसले बीपीका विचारलाई कसरी पछ्याइरहेको छ भन्ने कुरा पनि महोत्सवमा देखिन्छ । पहिला विरुवा रोपेर मात्र बीपी जयन्ती वा स्मृति मनाइन्थ्यो । अब हरेक वर्ष यसरी महोत्सव मनाइन्छ ।’

४० भन्दा मुनिका ३ सयभन्दा बढीलाई तीन दिनसम्म प्रशिक्षण दिएर दीक्षित गराउने योजना कांग्रेसको छ । साहित्यमा बीपीका विभिन्न आयाम छन् । मधेश, नारी चरित्र, कूटनीतिक कुरा नेपाली माटो सुहाउँदो थियो भन्ने सान्दर्भिकता देखाउन सत्रहरू राखिएको छ । आगामी संस्करणमा बीपीमा मात्र केन्द्रित नभएर समाजका अन्य विषयमा पनि बहस हुनेछ ।

महोत्सवमा के-के कार्यक्रम हुन्छन् ?

तीन दिन चल्ने महोत्सवमा हरेक दिन फरक कार्यक्रम राखिएको छ । पहिलो दिन सम्भाषण हुनेछ । सम्भाषणको पहिलो दिन प्राध्यापक अभि सुवेदीले बीपीको साहित्य सिर्जना र जीवन दर्शन शीर्षकमा भाषण दिनेछन् ।

आजको लोकतान्त्रिक समाजवादमा कांग्रेस, गान्धी र बीपीको खोजी भन्ने शीर्षकमा प्राध्यापक आनन्द कुमारले भाषण दिनेछन् । तेस्रो दिन बीपीको समाजवादमा शिक्षा कस्तो हुन्थ्यो होला ? शीर्षकमा प्राध्यापक केदारभक्त माथेमाले बोल्नेछन् ।

महोत्सवमा बीपीका दृष्टिमा बीपी, बीपीका आख्यानमा मनोविश्लेषण, साहित्यमा पर्यावरण, नेपालको मातृभाषा साहित्य, बीपीले नपाएका १५ वर्ष, बीपीका आख्यानमा मधेश, अन्तर्राष्ट्रिय राजनीति र कूटनीतिमा बीपी, युवास्थामा बीपी पठन, समावेशीता, सामाजिक रुपान्तरण र बीपी, समय र सान, बीपीका आख्यानमा नारी र परिवारले बुझेका बीपी गरी १२ वटा सत्र हुनेछन् ।

त्यस्तै, पहिलो दिन कविता साँझ, दोस्रो दिन गजल साँंझ र तेस्रो दिन सांगीतिक साँझ हुनेछ । चित्रकला प्रदर्शनी र वृत्तचित्र प्रदर्शनी पनि हुनेछ । वृत्तचित्रमा हाइज्याकिङ फर डेमोक्रेसी, वीर गणेशमान र तीन घुम्ती प्रदर्शन हुनेछन् । बीपी पार्कमा रक्तदान कार्यक्रम र खेलकुद हुनेछ । कांग्रेसले २००७ सालमा युद्ध गर्दा प्रयोग गरेका र बनाएका तोपहरूको पनि प्रदर्शन हुनेछ ।

प्रकाशित मिति: शुक्रबार, भदौ २२, २०८० १६:३२