पालाे कुर्दाकुर्दै बालिकाकाे मृत्यु भएपछि कान्ति बालले इमर्जेन्सीमा डाक्टरकाे ड्युटी बढायाे

पालाे कुर्दाकुर्दै बालिकाकाे मृत्यु भएपछि कान्ति बालले इमर्जेन्सीमा डाक्टरकाे ड्युटी बढायाे

A+ A A-

सोमबार मकवानपुरकी पाँच वर्षीया रेजिशा गोपालीको कान्ति बाल अस्पतालको इमर्जेन्सीमा उपचारका लागि पालो कुर्दाकुर्दै मृत्यु भयो ।

ज्वरो आउने बान्ता हुने भएपछि रेजिशालाई सोमबार दिउँसो ५ बजे उनका आमा र हजुरबुवाले उपचारका लागि अस्पतालको इमर्जेन्सीमा पुर्‍याएका थिए । रेजिशालाई इमर्जेन्सीमा पुर्‍याए पनि उनको उपचार समयमै भने हुन सकेन । उपचारका लागि पालो कुरेर बस्नु पर्‍याे ।

अस्पतालको ओपीडी टिकट दिउँसो १ बजे नै बन्द हुने भएका कारण उपचारका लागि अस्पताल पुगेका सबै बिरामी इमर्जेन्सीमा पुग्छन् । जसका कारण इमर्जेन्सीमा पुगेका बिरामीले समयमै उपचार पाउन सकिरहेका छैनन् ।

त्यही पालो कुर्दाकुर्दै रेजिशाले हजुरबुवाकै काखमा प्राण त्यागिन् । इमर्जेन्सीमा पुगेको करिब डेढ घण्टासम्म उनी लाइनमै बस्नु पर्‍याे । र, उपचारका लागि पालो पर्खिदापर्खिदै उनको उपचारमा ढिलाइ भएका कारण रेजिशाले ज्यान गुमाएको अस्पतालका निर्देशक डा. पंकज रायले स्वीकार गरेका छन् ।

इमर्जेन्सीमा भिडभाड धेरै हुने भएका कारण गम्भीर अवस्थामा भएका बिरामी छुट्याउन समस्या भइरहेको डा. रायको भनाइ छ ।

उनी भन्छन्, ‘१ बजे ओपीडी टिकट बन्द हुने भएले सबै बिरामी इमर्जेन्सीमा पुग्छन् । जसले गर्दा बिरामीको ठूलो भिड हुने गर्छ । र, यस्तो अवस्थामा सिरियस बिरामीको पहिचान गर्न गाह्रो हुन्छ ।’

चिकित्सकले निरीक्षण गर्ने

रेजिशाको मृत्यु भएपछि अस्पतालले यस्तो घटना फेरि हुन नदिनका लागि बिरामीको निरीक्षण आधा घण्टाको फरकमा चिकित्कले गर्न थालेको डा. राय बताउँछन् ।

उनी भन्छन्, ‘अहिले इमर्जेन्सीको लाइनमा भएका बिरामीको निरीक्षण गर्नका लागि दुई जना विशेषज्ञ चिकित्सक आधा घण्टाको फरकमा खटाउने व्यवस्था गरेका छौं । ’

छानबिनका लागि समिति गठन

घटनाको छानबिन गर्न डा. प्रकाश जोशीको संयोजकत्वमा समिति गठन गरिएको छ । डा. रायका अनुसार समितिले पाँच दिनभित्र सत्य, तथ्य पत्ता लगाएर प्रतिवेदन पेस गर्नेछ ।

अस्पताल पुग्दा पनि उपचार नपाएर मृत्यु हुनुमा अस्पतालको गम्भीर लापरवाही भएको भन्दै चर्को विरोध भइरहेको छ ।

प्रकाशित मिति: बुधबार, भदौ २०, २०८० १६:४४