सट्टा शिक्षक हटाउन गाउँपालिकाको निर्देशन, तर सट्टा शिक्षक राख्नेहरू नै गर्दै छन् ढाकछोप

सट्टा शिक्षक हटाउन गाउँपालिकाको निर्देशन, तर सट्टा शिक्षक राख्नेहरू नै गर्दै छन् ढाकछोप

A+ A A-

पाँचथर फालेलुङ गाउँपालिकाले ‘सट्टा शिक्षक’ हटाउन विद्यालयहरूलाई निर्देशन दिएको छ । १४ भदौमा गाउँपालिका अध्यक्ष वीरविक्रम थाम्सुहाङ संयोजक रहेको गाउँ शिक्षा समितिको बैठकले सट्टा शिक्षक हटाउन निर्देशन दिने निर्णय गरेको थियो । सोही निर्णयका आधारमा पालिकाले सट्टा शिक्षक राख्ने विद्यालयलाई १७ भदौमा पत्राचार गरेको हो ।

शिक्षा समितिको निर्णय उल्लेख गर्दै प्रमुख प्रशासकीय अधिकृत डम्बरबहादुर आङ्देम्बेले सट्टा शिक्षक राख्ने सबै विद्यालयमा पत्राचार गरी कानुनविपरीत हुने गरी राखिएका सट्टा शिक्षक हटाउने निर्णय गरेको भएको जानकारी दिए । विद्यालयका प्रधानाध्यापकलाई सम्बोधन गर्दै लेखिएको पत्रमा भनिएको छ, ‘तपाईंको विद्यालयमा सट्टा शिक्षक राखेको र सो कार्य प्रचलित कानुनविपरीत भएको भन्ने गुनासो आएकाले सट्टा शिक्षक हटाउने निर्णय भएकाले यसै सूचनामार्फत जानकारी गराइन्छ ।’

आङ्देम्बेले पत्राचार गरेकै विद्यालयमध्येको एउटा विद्यालय हो- दीपज्योति आधारभूत विद्यालय, सिदिन । ‘सट्टा शिक्षक’ राखेर नपढाइ ढुक्कले जागिर खाने शिक्षकहरू बग्रेल्ती भएको जनगुनासो पाँचथरको फालेलुङ गाउँपालिकामा आएको पहिलोपटक होइन । पटक-पटक जनगुनासो आएपछि १४ भदौमा गाउँ शिक्षा समितिको बैठक बसेको थियो । पालिकाको पत्रमा सट्टा शिक्षक नहटाए माध्यमिक विद्यालयको हकमा प्रधानाध्यापक र लेखापाल जिम्मेवार हुने भनिएको छ । आधारभूत विद्यालयको हकमा भने प्रधानाध्यापक र विद्यालय व्यवस्थापन समितिका अध्यक्ष जिम्मेवार हुने पत्रमा उल्लेख छ ।

दीपज्योति आधारभूत विद्यालयका प्रधानाध्यापक सुनिल बान्तावाले सट्टा शिक्षकका रूपमा मौसम राईलाई राखेका थिए । स्रोतका अनुसार उनकै दाजु ज्ञानबहादुर राईले सिंहबाहिनी माविमा केही समयअघिसम्म प्रविन राईलाई सट्टा शिक्षक राखेका थिए । यस आधारमा गाउँपालिकाले उनीहरू कार्यरत विद्यालयमा सट्टा शिक्षक हटाउन निर्देशनात्मक पत्राचार गरेको हो ।

तर, प्रधानाध्यापक सुनिलले मौसमलाई सट्टा शिक्षक नराखेको दाबी गरेका छन् । उनले भनेका छन्, ‘मौसम राई विद्यालय व्यवस्थापन समितिको निर्णयबमोजिम अंग्रेजी माध्यमबाट पठनपाठन गराउन निजी शिक्षकका रूपमा नियुक्त भएका हुन् ।’

शिलापत्रमा सोमबार ‘सट्टा शिक्षक राखेर अरु नै धन्दा’ शीर्षकमा भिडियो रिपोर्ट प्रसारण भएको थियो । भिडियो रिपोर्टबारे खण्डन गर्दै बान्तवाले सट्टा शिक्षक नराखिएको र कहिलेकाहीँ विद्यालयको काम विशेष र स्वास्थ्य समस्याका कारण मात्रै विद्यालयमा हाजिर हुन नसकेको दाबी गरे । सिंहबाहिनी माविमा कार्यरत शिक्षक ज्ञानबहादुर राईले पनि सट्टा शिक्षक प्रविन राईलाई नराखेको दाबी गरेका छन् ।

गाउँपालिकाको सामाजिक विकास, शिक्षा, युवा तथा खेलकुद शाखामा कार्यरत प्राविधिक सहायक कृष्ण रिमालले भने दुवै जना आबद्ध विद्यालयमा सट्टा शिक्षक राखेको गुनासोका आधारमा पहिलो चरणमा सट्टा शिक्षक भए हटाउन भन्दै पत्राचार गरिएको बताए । सट्टा शिक्षक भएर पनि नहटाए माविको हकमा प्रधानाध्यापक र लेखापाल तथा आधारभूत विद्यालयको हकमा प्रधानाध्यापक र विद्यालय व्यवस्थापन समितिका अध्यक्ष जिम्मेवार हुने भनिएको पनि उनको भनाइ छ ।

गाउँपालिकाले अर्को विद्यालय सरस्वती मावि ताङ्लेपालाई पनि सट्टा शिक्षक हटाउन पत्राचार गरेको छ । उक्त विद्यालयमा वर्षौंदेखि शिक्षक नरबहादुर दुलाल (नेटवर्क) ले सट्टा शिक्षक राखेका छन् । उनी विद्यालय नै जाँदैनन् । सट्टा शिक्षक विश्वास केरुङलाई राखेर घरमै बसेर तलब बुझ्छन् । स्रोतका अनुसार उनले आधा तलब सट्टा शिक्षक केरुङलाई दिने गरेका छन् । माओवादीका एक जना युवानेताका अनुसार उनले यसअघि नै राजीनामा दिने भनेका थिए । तर, सट्टा शिक्षक राखेर हरेक महिनाको तबल बुझिरहेका छन् । उनी नेकपा माओवादीको केन्द्रीय लेखा आयोगका सदस्य हुन् ।

गाउँपालिकाकै बुढीथाम आधारभूत विद्यालयमा कार्यरत निरमाया कार्की आङ्बो त झन् सदरमुकाम फिदिममा ढुक्कले बसेर जागिर खान्छिन् । उनले सीता राई गुरुङलाई सट्टा शिक्षक राखेकी छिन् । स्थानीयका अनुसार निरमायाले स्कुलमा नगई तलब खाएको वर्षौं भयो ।

पाँचथरकै अर्को स्थानीय तह फिदिम नगरपालिकाको सगरमाथा आधारभूत विद्यालयमा कार्यरत शिक्षक प्रभा भण्डारी गुरुङ पनि आजकाल विद्यालय जाँदिनन् । घरमै बसेर तलब बुझ्छिन् । उनी फिदिम नगरपालिकाका रोजगार संयोजक इन्द्र गुरुङकी श्रीमती हुन् । गुरुङ कांग्रेसनिकट हुन् ।

बान्तवा र राई भन्छन्- हामीले सट्टा शिक्षक राखेका छैनौँ

दीपज्योति आधारभूत विद्यालयका प्रधानाध्यापक सुनील बान्तवा र सिंहबाहिनी माविका शिक्षक ज्ञानबहादुर राईले सट्टा शिक्षक नराखेको दाबी गरेका छन् । १८ भदौमा शिलापत्रमा प्रसारित 'सट्टा शिक्षक राखेर अर्कै धन्दा' शीर्षक भिडियो सामग्रीप्रति उनीहरूले आपत्ति जनाएका हुन् ।

उनीहरूले भनेका छन्, ‘शीर्षकमा भनेजस्तो कुनै गैरकानुनी धन्दा गरिएको छैन । प्रेस स्वतन्त्रताप्रति हामी सधैँ उच्च सम्मान राख्दछौँ । शिक्षाजस्तो अति संवेदनशील विषयमा हामी सधैँ सजक र गम्भीर छौँ । साथै आफ्नो जिम्मेवारी, दायित्यप्रति प्रयत्नशील र क्रियाशील छौँ ।’

दीपज्योति युवा क्लबकै सक्रियतामा २०४८ सालमा दीप ज्योति आधारभूत विद्यालय स्थापना भएको हो । हाल यस विद्यालयमा कक्षा ५ सम्म २ जना राहत शिक्षक मात्रै रहेका छन् । उनीहरूले दाबी गरेका छन्, ‘भिडियोमा उल्लेख भएजस्तो सट्टा शिक्षक नराखिएको, कहिलेकाहीँ विद्यालयको काम विशेष र स्वास्थ्य समस्याका कारण मात्रै विद्यालयमा हाजिर हुन नसकेको, सट्टा शिक्षक भनेर नाम उल्लेख भएका मौसम राई विद्यालय व्यवस्थापन समितिको निर्णयबमोजिम अंग्रेजी माध्यमबाट पठनपाठन गराउन निजी शिक्षकका रूपमा नियुक्त भएका हुन् ।’

त्यसैगरी, सिंहबाहिनी माविका ज्ञानबहादुर राईले पनि आफूले सट्टा शिक्षक प्रविन राई भनिएको, प्रविन राई हाल वडा कार्यालयको कार्यालय सहयोगी भनिएकोमा प्रविन राई वडा कार्यालयको कार्यालय सहयोगीमा नियुक्त नभएको दाबी गरेका छन् ।

प्रकाशित मिति: बुधबार, भदौ २०, २०८० १७:१८