भलिबल खेलाडीहरूले अब मासिक पाँच हजार रुपैयाँ पारिश्रमिक पाउने

A+ A A-

भलिबल खेलाडीहरूले अबदेखि मासिक पारिश्रमिक पाउने भएका छन् ।

मंगलबार काठमाडौंमा पत्रकार सम्मेलन गरी नेपाल भलिबल संघले १२ जना पुरुष र १२ जना महिला भलिबल खेलाडीलाई मासिक ५-५ हजार रुपैयाँका दरले पारिश्रमिक दिने घोषणा गरेको हो ।

अमेरिकामा सहयोगी दाताहरू खोजी नेपाल भलिबल संघको खातामा सेप्टेम्बर, अक्टोबर र नोभेम्बरमा पारिश्रमिक पठाएको जानकारी गराएको हो । नेपाली भलिबल खेलाडीले पहिलोपटक मासिक पारिश्रमिक पाएका हुन् ।

अमेरिकामा रहेका पूर्वराष्ट्रिय खेलाडी राम श्रेष्ठको नेतृत्वमा पूर्वराष्ट्रिय खेलाडी र बिजनेश इन्टरप्रेनियरको सहयोगमा मासिक पारिश्रमिकको व्यवस्था गरिएको हो । अहिले नेपाली भलिबल टोली चीनमा हुने १९औँ एसियाली खेलकुदको तयारीमा छ ।

राष्ट्रिय खेलकुद परिषद् (राखेप) को पहलमा नेपाली महिला टोलीले पहिलोपटक एसियाली खेलकुदमा सहभागिता जनाउन लागेको हो । खेलाडीलाई मासिक तलब दिने भलिबल संघ चौथो हो । फुटबल र क्रिकेट खेलाडीले मासिक तलब पाइरहेका छन् । यसैगरी, बुद्धिचालका पुरुष तथा महिलातर्फ शीर्ष वरीयताका खेलाडीले पनि मासिक तलब पाउने गरेका छन् ।

भलिबल संघका अध्यक्ष जितेन्द्रबहादुर चन्दले क्रिकेट र फुटबल खेलाडीले मासिक तलब पाउने तर भलिबल खेलाडीले अहिलेसम्म किन पाएनन् भन्ने पत्रकारहरूको प्रश्नपछि आफूहरूले पहल गरेर आज पारिश्रमिक थोरै भए पनि दिन सफल भएको बताए । उनले एसियन गेम्सका लागि केही पकेट खर्च दिने योजना रहेको बताए ।

नेपाल भलिबल संघले अहिलेको आफ्नो कार्यकालभर विभिन्न सहयोगीहरूसँग सहयोग मागेर भए पनि राष्ट्रिय खेलाडीलाई मासिक पारिश्रमिक दिने घोषणा गरेको छ ।

प्रकाशित मिति: मंगलबार, भदौ १९, २०८० १८:०५