राजतन्त्रकालीन ऐनले वर्तमान पर्यटन क्षेत्रको नेतृत्व गर्न सक्दैनः मन्त्री किराँती

राजतन्त्रकालीन ऐनले वर्तमान पर्यटन क्षेत्रको नेतृत्व गर्न सक्दैनः मन्त्री किराँती

A+ A A-

संस्कृति, पर्यटन तथा नागरिक उड्‌डयनमन्त्री सुदन किराँतीले राजतन्त्रकालीन पर्यटन ऐनले वर्तमान पर्यटन क्षेत्रको नेतृत्व गर्न नसक्ने बताएका छन् ।

सोमबार प्रतिनिधिसभाअन्तर्गतको अन्तर्राष्ट्रिय सम्बन्ध र पर्यटन समिति बैठकमा मन्त्री किराँतीले वर्तमान पर्यटन ऐन, २०३५ सालको ऐन रहेको भन्दै उक्त ऐनलाई वर्तमान आवश्यकता अनुसार संशोधन गर्न सरकार लागेको बताए । उनले सरकारले पर्यटन ऐनलाई समय सापेक्ष बनाउने गरी काम गरिरहेको बताए ।

मन्त्री किराँतीले पर्वतारोहणको क्षेत्रको विकासका लागि ८ हजार मिटर उचाइबाट प्याराग्लाइडिङ गर्न सकिनेसहितको पर्यटन नियमावलीमा व्यवस्था राखेर पर्वतारोहण सम्बन्धी नियमावली संशोधन गर्न लागेको बताए । मन्त्री किराँतीले नेपालमा संस्कृतिको ऐन नभएकाले सरकारले राष्ट्रिय संस्कृति नीति निर्माण गर्न ११ सदस्य समिति गठन गर्न लागेको बताए ।

उनले नेपालका कतिपय नीति नेपालको राष्ट्रिय हितमा हो कि होइन भनेर छुट्याउन नसकिएको बताए । उनले पर्यटन क्षेत्रको विकासका लागि संरचना बनाउने अनि जहाज नउडाउने काम भइरहेको बताए । उनले २२ वटा विमानस्थल खाली रहेको भन्दै उक्त विमानस्थलमा राज्यको खर्बौं बजेट खर्च भएको बताए ।

मन्त्री किराँतीले आफू मन्त्री भएर आएपछि नेपाल एयरलाइन्स नाफामा रहेको दाबी गरे । उनले वायुसेवा निगमले पौने ४ अर्ब ऋण तिरेको भन्दै तीनवटा जहाज किन्ने अन्तिम तयारीमा रहेको बताए । उनले निगमको ४८ अर्बको ऋण जहाज किन्न दिएर व्यापार गर्न दिएपछि मात्रै तिर्ने बताए ।