ओडीआई मान्यता पाएको पाँच वर्षपछि भारतसँग भिड्दै नेपाल

A+ A A-

एसिया कप क्रिकेट प्रतियोगितामा भोलि नेपालले भारतको सामना गर्दैछ । श्रीलंकाको पल्लेकेल मैदानमा भोलि दिउँसो सवा तीन बजे खेल सुरु हुनेछ । नेपालले अन्तर्राष्ट्रिय क्रिकेट खेल्न थालेको २७ वर्षपछि र एक दिवसीय अन्तर्राष्ट्रिय क्रिकेटको मान्यता पाएपछि पहिलोपटक भारतसँग खेल्न लागेको हो ।

नेपालले सन् २०१८ मा ओडीआई मान्यता पाए पनि सबैभन्दा नजिकको छिमेकी भारतसँग भने खेल्ने मौका पाएको थिएन । नेपालले काठमाडौंमै एसीसी इमर्जिङ कपको उपाधि जितेपछि एसिया कपमा छनोट भएको थियो । एसिया कपको समूह ए मा नेपाल, भारत र पाकिस्तान छन् । नेपाल र पाकिस्तानबीचको खेल भइसकेको छ ।

नेपालले उमेर समूहमा र ए टिमबीचको प्रतिस्पर्धामा भने भारतसँग खेलिसकेको छ । र एक पटक यू १९ मा भारतलाई एकपटक पराजितसमेत गरेको छ । पहिलोपटक सिनियर टिमबीच भोलि हुन लागेको खेल नेपाली क्रिकेटका लागि ऐतिहासिक अवसरमा छ ।

ठूला टिमहरूसँग खेलेको अनुभव नभएको नेपाली टिमले पाकिस्तानविरुद्ध कमजोर प्रदर्शन गरेको थियो । सुरुमा नेपाली बलरले ठिकठाकको खेल देखाए पनि अनुभवि पाकिस्तानले अन्तिममा नेपाली बलरमाथि निर्मम प्रहार गरेको थियो । र ब्याटिङमा त नेपाली ब्याटरले विश्वकै उत्कृष्ट बलिङ आक्रमण मानिएको पाकिस्तानका अगाडि आत्मसमर्पण गरेका थिए । ३४३ रनको लक्ष्य पछ्याएको नेपाल १०४ रनमै अलआउट भएको थियो ।

अब भारतसँग पनि नेपाललाई सहज हुने छैन । फास्ट बलिङका अगाडि टिक्न नसक्ने नेपाली ब्याटर भोलि जसप्रित बुमराह जस्ता विश्वस्तरीय बलरलाई कसरी सामना गर्छन् हेर्न बाँकी छ । फास्ट बलरमा नेपाली ब्याटरको कमजोरी विश्वकप छनोट प्रतियोगिता खेल्दा जिम्बाब्वेमै खुलिसकेको थियो । पाकिस्तानले झन नेपाली ब्याटरको दयनीय अवस्था देखाइदिएको छ । त्यसैले भारतविरुद्ध सम्हालिएर खेल्नुपर्ने अवस्था छ ।

बलिङमा ठिकठाक देखिएको नेपालले भारतविरुद्ध एक परिवर्तन गर्न सक्छ । भारतका ओपनर ब्याटर तथा कप्तान रोहित शर्मा र स्टार ब्याटर विराट कोहली बायाँहाते फास्ट बलरका अगाडि संघर्ष गर्छन् । पाकिस्तानसँगको खेलमा पनि यी दुबैको विकेट बायाँहाते फास्ट बलर शाहिन शाह अफ्रिदीले लिएका थिए । त्यसैले नेपालले पनि प्र्रतिश जिसीलाई ल्याउन सकेन उनीहरूलाई अप्ठ्यारो पार्न सक्छन् ।

नेपाली टिम
रोहित पौडेल (कप्तान), आसिफ शेख, कुशल भुर्तेल, ललित राजवंशी, भीम सार्की, कुशल मल्ल, दीपेन्द्रसिंह ऐरी, सन्दीप लामिछाने, करण केसी, गुल्सन झा, आरिफ शेख, सोमपाल कामी, प्रतिश जिसी, किशोर महतो, सन्दीप जोरा, अर्जुन साउद, श्याम ढकाल।

प्रकाशित मिति: आइतबार, भदौ १७, २०८० १६:१२