अमेरिकाले युक्रेनलाई डिप्लिटेड युरेनियम हतियार दिने, रुसले तयार पार्‍यो अन्तरमहादेशीय क्षेप्यास्त्र

A+ A A-

अमेरिकाले युक्रेनलाई पहिलोपटक डिप्लिटेड युरेनियम हतियार सहयोग गर्ने भएको छ । रोयटर्सका अनुसार अमेरिकी यो हतियारले रुसी ट्यांक ध्वस्त पार्न सहयोग मिल्नेछ ।

अमेरिकाले यही हप्ता डिप्लिटेड युरेनियम हतियार युक्रेनलाई सहयोग गर्ने अपेक्षा गरिएको छ । यो हतियारलाई अब्राम्स ट्यांकबाट फायर गरिनेछ । अमेरिकाले युक्रेनलाई ३७५ मिलियन डलरको हतियार सहयोग गर्दै छ । यो सहयोग प्याकेजमा नयाँ हतियार समावेश हुनेछ ।

युरेनियम एक रेडियोएक्टिभ तत्त्व हो, जसलाई परमाणु बम बनाउन पनि प्रयोग गरिन्छ । युरेनियमबाट बनेको हतियारले पर्यावरणमा नकारात्मक असर गर्छ, जसकारण यो हतियार विवादित मानिन्छ । यस्ता हतियारले मानिसलाई क्यान्सर हुन्छ भने गर्भमा रहेका बच्चालाई असर पुग्छ ।

युरेनियमबाट बनेका हतियारलाई प्रतिबन्ध लगाउने संस्था इन्टरनेसनल कोलिसनका अनुसार डिप्लिटेड युरेनियम हतियारलाई परमाणु हतियारको श्रेणीमा राखिँदैन । अमेरिकाले युक्रेनलाई दिन लागेको डिप्लिटेड युरेनियम हतियारमा भने युरेनियमको मात्रा कम हुन्छ । यद्यपि, यसमा कमै भए पनि युरेनियमको हिस्सा भएकाले यो हतियार विवादित मानिन्छ ।

गत मार्चमा मात्र बेलायतले युक्रेनलाई यस्तै हतियार सहयोग गर्दा रुष्ट बनेको रुसले बेलारुसमा परमाणु हतियार तैनाथ गरेको थियो । यसबीचमा रुसले युक्रेनविरुद्धको युद्धमा अन्तरमहादेशीय ब्यालिस्टी क्षेप्यास्त्र आरएस–२८ सरमत तैनाथ गर्ने घोषणा गरेको छ । रुसी सरमत क्षेप्यास्त्र हालसम्मकै खतरनाक मिसाइल भएको बताइन्छ ।

यो क्षेप्यास्त्रमा एकैपटक १० वटा विस्फोटक वारहेड सामावेश हुन्छ । आवश्यकताअनुसार ती वारहेडलाई अलग-अलग निसानामा आक्रमण गर्न सकिन्छ । अमेरिकाले सरमत क्षेप्यास्त्रलाई सटान भन्ने गरेको छ । यो क्षेप्यास्त्र २०० टनको हुन्छ, जसले १८ हजार किलोमिटर टाढासम्म पुगेर आक्रमण गर्न सक्छ ।

प्रकाशित मिति: आइतबार, भदौ १७, २०८० १४:३६