देउवाले विभाग गठनको सुरुवातमा इतर समूहलाई दिएनन् ४० प्रतिशत हिस्सा

A+ A A-

केन्द्रीय समितिको समयतालिका पालना भएकाे भए भदौ १५ भित्र कांग्रेसका ७४ वटै विभागहरू गठन हुने थिए । तर सभापति शेरबहादुर देउवाले १५ विभागका प्रमुख मात्र मनोनीत गरे । प्रचार विभाग भने मीन विश्वकर्माकाे नेतृत्वमा देउवाले यसअघि नै पूर्णता दिएका थिए ।

सभापति देउवाले नेपाली कांग्रेसको विधान, २०१७ (संशोधनसहित) को धारा ३७ (१) (ग) बमोजिम शुक्रबार केन्द्रीय कार्यसमितिका सदस्यहरूलाई केन्द्रीय विभागको प्रमुखमा मनोनयन गरेका हुन् ।

कांग्रेसको प्रदेश समन्वय विभागको प्रमुखमा कृष्णचन्द्र नेपाली पोखरेल मनोनीत भएका छन् । पुष्पा भुसालले महिला विभाग, चिनकाजी श्रेष्ठले उद्योग तथा व्यापार विभाग, किरण यादवले तराई–मधेस समन्वय विभाग, योगेन्द्र चौधरीले थारु विभाग, गेहेन्द्र गिरीले ज्येष्ठ नागरिक समन्वय विभाग, आङ्गेलु शेर्पाले पर्यटन विभागको प्रमुखको जिम्मेवारी पाएका छन् ।

यसैगरी डा. रणबहादुर रावल गैर सरकारी संस्था तथा समन्वय विभाग, दिलमान पाख्रिन आदिवासी तथा जनजाति विभाग, प्रकाश रसाइली स्नेही वैदेशिक रोजगार समन्वय तथा आप्रवासन विभाग, रंगमती शाही पिछडिएको क्षेत्र विभाग, गुरु बराल आपूर्ति तथा उपभोक्ता विभाग, नानु बास्तोला जिल्ला सम्पर्क समिति समन्वय विभाग, मदनकृष्ण श्रेष्ठ अपाङ्गता भएका व्यक्ति र समुदाय समन्वय विभाग र सीता थपलिया (उर्मिला) उद्यमशीलताा र साना तथा मझौला व्यवसायी विकास विभागको प्रमुखमा मनोनीत भएका छन् ।

१६ वटा विभाग गठन गर्दा देउवाले १२ वटा विभागमा आफ्नाे पक्षका नेतालाई जिम्मेवारी दिएका छन् । संस्थापनइतर समूहलाई ४ वटा विभागको नेतृत्व दिएका छन् ।

संस्थापन पक्षबाट मीन विश्वकर्मा, पुष्पा भुसाल, चिनकाजी श्रेष्ठ, योगेन्द्र चौधरी, गेहेन्द्र गिरी, आङ्गेलु शेर्पा, डा. रणबहादुर रावल, दिलमान पाख्रिन, गुरु बराल, मदनकृष्ण श्रेष्ठ, नानु बास्तोला, सीता थपलिया (उर्मिला)ले (शंशांक कोइरला समूह) विभागकाे नेतृत्व पाएका छन् ।

त्यस्तै संस्थापनइतर समूहबाट विभाग प्रमुख हुनेमा कृष्णचन्द्र नेपाली पोखरेल, रंगमती शाही, प्रकाश रसाइली स्नेही र किरण यादव छन् ।

इतर समूहले ४० प्रतिशतकाे हिस्सा आफूले पाउनुपर्ने बताए पनि इतर समूहले हालसम्म ६०–४० को भागवण्डा पाएको छैन ।

पार्टीका हरेक भागवण्डामा ६०–४० को हिस्सा माग्ने शेखर-गगन समूहको रणनीति छ । सो अनुसार बाँकी विभागमा भागjण्डा खोज्ने इतर समूहको तयारी छ । विभाग गठनले पूर्णता पाउँदा इतर समूहको मागको सुनुवाइ गर्ने पक्षमा संस्थापन पक्ष छ ।

‘गृहकार्य गर्दा गर्दै सम्पूर्ण विभागमा नेतृत्व ल्याउन सकेका छैनौँ । भनेको मितिमा १५ विभागमा नेतृव आयो अरु विभागले पनि यसैगरी पूर्णता पाउँछ,’ प्रचार विभाग प्रमुख विश्वकर्माले शिलापत्रसँग भने ।

विभाग प्रमुखहरूले विभागलाई शसक्त बनाएर कांग्रेसलाई बलियो बनाउने रणनीति बनाउन थालेका छन् ।

'महिलालाई नेतृत्वमा स्थापित गराउने योजना बनाइरहेको छु । वैचारिक र प्रयोगात्मक रुपमा लैजाने योजनामा छु । प्रदेशस्तरमा विभाग लैजाने र आवश्यक परे पालिका स्तरमा समेत विभागको विस्तार गर्ने योजना छु,’ महिला विभाग प्रमुख पुष्पा भुसालले शिलापत्रसँग भनिन्, ‘अवसर नपाएका महिलालाई पुन: जिम्मेवारी दिएर चुनावका लागि तयार गर्ने, पार्टीभित्रको मात्र महिला नेतृत्व नभएर समग्रमा महिला शसक्तीकरण र संविधानले दिएको अधिकार उपयोग गर्न विभागले काम गर्छ ।’ कांग्रेसभित्र भागवण्डाको राजनीतिभन्दा क्षमता भएका व्यक्तिहरूलाई विभागको नेतृत्व दिनुपर्ने उनले बताइन् ।

उद्यमशीलताा र साना तथा मझौला व्यवसायी विकास विभाग प्रमुख थपलिया युवा पुस्ताकाे पलायन रोक्न उद्यमशीलताको विकास गर्ने योजना बनाउन अध्ययन गर्दैछिन् । ‘स्वदेशमा उद्यमशील युवा बनाउन के के गन सकिन्छ भनेर अध्ययन गर्दैछु । पार्टीसँग समन्वय गरेर यसलाई नीतिगत रुपमा के कसरी व्यवस्थापन गर्न सकिन्छ त्यसमा काम गर्नेछु,’ उनले शिलापत्रसँग भनिन् ।

प्रकाशित मिति: शनिबार, भदौ १६, २०८० १८:५१