महालेखापरीक्षक बन्न पूर्वसचिवहरूको लर्को

A+ A A-

महालेखापरीक्षकका लागि बहालवाला सचिव, पूर्वसचिवदेखि चार्टर्ड एकाउन्टेन्टसम्मले प्रयास गरेका छन् । प्रधानमन्त्री तथा मन्त्रिपरिषद्को कार्यालयले इच्छुकको रोष्टर तयार गर्ने क्रममा डेढ दर्जनभन्दा बढीले इच्छा देखाएका हुन् ।

प्रधानमन्त्री तथा मन्त्रिपरिषद्को कार्यालय स्रोतका अनुसार महालेखापरीक्षक बन्न १६ जनाले इच्छा देखाएका छन् । त्यसरी इच्छा देखाउनेमा बहालवाला सचिव, पूर्वसचिव र चार्टड एकाउन्टेन्टसम्म रहेका छन् ।

त्यसरी प्रधानमन्त्री कार्यालयको रोष्टर सूचीका लागि आवेदन दिनेहरूमा तोयम राया, शंकर खरेल, गोपीनाथ मैनाली, बाबुराम गौतम, हरि बस्याल, शिशिरकुमार ढुंगाना, सुवोदकुमार कर्ण, राममाया कुँवरलागयत रहेको बताइएको छ ।

१२औँ महालेखा परीक्षकका लागि प्रतिस्पर्धीहरू विभिन्न राजनीतिक शक्तिकेन्द्रसँग लाइन मिलाउने प्रयास पनि गरिरहेका छन् । ७ जेठ २०८० मा महालेखापरीक्षक टंकमणि शर्माको कार्यकाल सकिएको थियो । त्यसयता रिक्त रहेको महालेखापरीक्षक नियुक्तिको प्रयास भइरहेको छ ।

विपक्षी दलका नेता केपी ओलीले संवैधानिक नियुक्तिमा प्याकेजमा सहमतिको प्रस्ताव राखेका छन् । त्यहीकारण महालेखापरिक्षकसहित अन्य संवैधानिक निकायमा नियुक्तिमा ढिलाइ भइरहेको छ । एमाले अध्यक्षले पूर्वसचिव शिशिर ढुंगानालाई साथ दिइरहेको बताइन्छ ।

ओलीसँग निकट भएर लविङ बढाएका ढुंगानाले प्रधानमन्त्री पुष्पकमल दाहाल प्रचण्डसँग पनि दूरी कम गर्ने प्रयास गरिरहेका छन् । तर, प्रधानमन्त्री प्रचण्डसँग ढुंगानाको लाइन मिलिसकेको छैन । स्रोतका अनुसार एमालेनिकट अडिटर मोहन घिमिरेले ढुंगानालाई महालेखापरीक्षक बनाउनुपर्ने भन्दै ओलीसम्म लगेका थिए । चार्टर्ड एकाउन्टेन्टहरूको संस्था आईक्यानको अध्यक्ष बनाउने भूमिकामा घिमिरे खप्पिस रहेका छन् । त्यहीकारण पनि उनी अडिटर भए पनि एमालेभित्र राम्रो पहुँच राख्छन् ।

ओलीले ढुंगानाको पक्षमा लाग्ने संकेत गरेपछि माधव नेपाल सुवोधकुमार कर्णको पक्षमा खुलेका छन् । एमालेको कोटाबाट राष्ट्र बैंकको सञ्चालक समिति सदस्यसमेत भइसकेका कर्ण वरिष्ठ चार्टड एकान्टेन्ट हुन् । अहिले उनी एमसीए नेपालको सीएको रूपमा काम गरिरहेका छन् । कर्णलाई सञ्चालक समिति सदस्य बनाउन पहिला मोहन घिमिरेले भूमिका खेलेका थिए ।

तर, कर्णसँग घिमिरेको सम्बन्ध बिग्रिएपछि गर्भनर महाप्रसाद अधिकारीसँग पनि सम्बन्ध बिग्रेको थियो । त्यही कारण कर्ण एमालेसँग टाढिएका हुन् ।

यता, महालेखापरीक्षकको कार्यालयकी कार्यवाहक महालेखापरीक्षक भइसकेकी राममाया कुँवर पनि दाबेदारको रूपमा अगाडि आएकी छिन् । पूर्वसचिव गोपीनाथ मैनाली, हरि बस्यालले पनि दाबी गरिरहेका छन् ।

प्रकाशित मिति: बिहीबार, भदौ १४, २०८० १६:४५