एसिया कपमा आज भारत र पाकिस्तान भिड्दै, कसको पल्ला भारी ? (भिडियाेसहित)

A+ A A-

एसिया कप क्रिकेटमा आज चिरपरिचित प्रतिद्वन्द्वी भारत र पाकिस्तानबीच खेल हुँदै छ । श्रीलंकाको पल्लेकल अन्तर्राष्ट्रिय रङ्गशालामा आज दिउँसो ३ः१५ बजेपछि हुने यो प्रतिस्पर्धा धेरैका लागि प्रतिक्षित छ ।

बुधबारदेखि सुरु एसिया कप क्रिकेटमा भारत र पाकिस्तानबीचको खेललाई फाइनलसरह मानिएको छ । यी दुवै टिम उपाधिका मुख्य दाबेदार पनि हुन् । पछिल्लो पटक भारत र पाकिस्तानबीचको भेट २०२१ अक्टोबर २४ तारिखमा विश्वकप क्रिकेटमा भएको थियो । त्यो खेलमा भारत पाकिस्तानसँग १० विकेटले पराजित भएको थियो ।

भारतीय टिम रोहित शर्माको कप्तानीमा मैदानमा उत्रिँदा पाकिस्तानकाे कप्तानी बाबर अजामले सम्हाल्ने छन् । भारतीय टिममा विराट काेहली, हार्दिक पाण्या, रविन्द्र जडेजा, जसप्रित बुमराह, केएल राहुलजस्ता खेलाडी छन् । यता, पाकिस्तानमा कप्तान बाबर अजामसँगै, अब्दुल्ला साफिक, फखर जमान, इमाम-अल हाक, सलमान अलि अघा, माेहम्मद रिजवानलगायत खेलाडी हुनेछन् ।

पाकिस्तानकाे पल्ला भारी

बुधबार नेपालमाथि २ सय ३८ रनकाे जित दर्ता गर्दै पाकिस्तानले एसिया कपमा शानदार सुरुवात गरिसकेको छ । उसले आज दोस्रो खेलमा पुरानै प्रतिद्वन्द्वी भारतसँग खेल्न लागेको हो ।

भारत र पाकिस्तानबीच भएका अहिलेसम्मका सबै वान डे म्याचको रेकर्ड हेर्ने हो भने यसमा पाकिस्ताको पल्ला भारी देखिन्छ ।

भारतीय मिडियाका अनुसार, २ टिमबीच अहिलेसम्म १ सय ३२ वान डे म्याचमा प्रतिस्पर्धा भएको छ । यस क्रममा भारतले ५५ म्याच जित्दा पाकिस्तानले ७३ म्याच जितेको छ । भारत र पाकिस्तानबीच अन्तिम वान डे म्याच सन् २०१९ मा भएको थियो । उक्त प्रतिस्पर्धा भारतले ८९ रनले जितेको थियो ।

भारतले पाकिस्तानविरुद्ध पछिल्लो तीन वान डे म्याचमा लगातार जित हासिल गरेको छ । सन् २०१८ मा भारतले पाकिस्तानलाई पराजित गरेको थियो । त्यो बेला भारतले एक म्याच ८ विकेट र अर्को म्याच ९ विकेटले आफ्नो पक्षमा पारेको थियो । अन्तिम प्रतिस्पर्धामा ८९ रनको जित निकालेको थियो ।

भारत र पाकिस्तानबीच भएको वान डे म्याचमा सबैभन्दा धेरै रन सचिन तेन्दुलकरले बनाएका छन् । उनले ६९ म्याचमा २५२६ रन बनाएका थिए । यस क्रममा उनले ५ सतक र १६ अर्धसतक पूरा गरे ।

भारत र पाकिस्तानबीच भएको वान डे म्याचमध्ये सबैभन्दा बढी विकेट लिएको कीर्तिमान् अनिल कुम्बलेको नाममा छ । उनले ३४ म्याचमा ५४ विकेट लिएका छन् ।

प्रकाशित मिति: शनिबार, भदौ १६, २०८० ०७:०२