भदौ २६ देखि ‘पन्ध्रौँ नाडा अटो शो २०२३’ सञ्चालन हुने, स्टल १२० वटा, भाग्यशाली एक आगन्तुकलाई स्कुटर उपहार

भदौ २६ देखि ‘पन्ध्रौँ नाडा अटो शो २०२३’ सञ्चालन हुने, स्टल १२० वटा, भाग्यशाली एक आगन्तुकलाई स्कुटर उपहार

A+ A A-

नाडा अटोमोबाइल्स एसोसिएसन अफ नेपालको आयोजनामा यही भदौ २६ देखि ३१ गतेसम्म '१५औँ नाडा अटो शो २०२३' हुने भएको छ । काठमाडौंको भृकुटीमण्डप प्रदर्शनीस्थलमा आयोजना हुने उक्त प्रदर्शनीको शीर्ष प्रायोजक टाटा मोटर्स जेनुइन आयल र सह–प्रायोजकमा शिखर इन्स्योरेन्स कम्पनी लिमिटेड रहेका छन् ।

प्रदर्शनीमा ठूला तथा साना गरी करिब १२० वटा स्टलहरू रहने आयोजकले बताएका छन् । प्रदर्शनीमा प्रख्यात अन्तर्राष्ट्रिय ब्रान्डका सवारीसाधन, लुब्रिकेन्ट, टायर, पार्टपुर्जाका साथै राष्ट्रिय ब्रान्डका अटो सामग्री उत्पादक एवं वस्तु तथा सेवाप्रदायकहरूको सहभागिता रहनेछ ।

प्रदर्शनीमा १६ वटा ब्रान्डका चारपाङग्रे, २२ वटा ब्रान्डका दुईपाङग्रे, ७ वटा ब्रान्डका लाइट कमर्सियल भेहिकल, ९ वटा वित्तीय संस्था तथा ३० वटा लुब्रिकेन्ट, टायर, ब्याट्री, पार्टपुर्जा एवं ग्यारेज उपकरण कम्पनीहरूको सहभागिता रहने बताइएको छ ।

आइवजकका अनुसार प्रदर्शनीलाई बढी जानकारीमूलक, सेवामूलक र ग्राहकमुखी बनाउन अटो सम्बन्धी सेवा सुविधा दिने जस्तै वित्तीय सेवा, बिक्रीपछिका सेवा, आदिका छुट्टाछुट्टै स्टलहरू रहनेछन् भने अटोसम्बन्धी जानकारी दिने म्यागेजिन तथा पत्रपत्रिकाहरूका लागि पनि एउटा छुट्टै साझा मिडिया स्टलको व्यवस्था गरिएको छ ।

आमसर्वसाधारणलाई ट्राफिक नियम तथा सडक सुरक्षासम्बन्धी सूचित गराउने उद्देश्यका साथ महानगरीय ट्राफिक प्रहरी महाशाखा, काठमाडौंको सूचना–कक्षसमेत प्रदर्शनीमा रहनेछ ।

त्यसैगरी, अवलोकनकर्ताहरूको सुविधालाई विशेष ध्यानमा राखी दुईपाङग्रे, चारपाङग्रे, वित्तीय संस्था, अटो कम्पोनेन्ट्स एवं ग्यारेज उपकरणहरूको छुट्टाछुट्टै प्रदर्शन गरिनेछ । प्रदर्शनीस्थलमा सजिलै आवागमन गर्नका लागि काठमान्डू मल, सैनिक कल्याणकारी भवन, बस पार्क भ्यु टावरलगायतका सार्वजनिक पार्किङस्थलहरूबाट महानगर यातायातको सहयोगमा बस सञ्चालन गरिनेछ । एक्स्पोलाई व्यवस्थित बनाउन, प्रदर्शनीस्थलमा भिड–भाड कम गर्न एवं आगन्तुकहरूको भ्रमणलाई सहज बनाउन अहिलेदेखि नै खल्ती एपमार्फत अनलाइन टिकट खरिद गर्न सकिने व्यवस्था मिलाइएको छ । अग्रिम अनलाइन टिकट खरिदमा खल्तीद्वारा २० प्रतिशत क्यास ब्याकसमेत पाइनेछ ।

६ दिन सम्म चल्ने उक्त नाडा अटो शो २०२३ मा लगभग ७५००० आगन्तुकहरूले अवलोकन गर्ने विश्वास आयोजकको छ । यस वर्षको थप आकर्षणमा कुजु नेपाल प्रालिको प्रायोजनमा नाडाले Yadea E8S Pro Electric Scooter टिकटको लक्की ड्र गरी भाग्यशाली एक जना आगन्तुकलाई उपहार दिने व्यवस्था गरिएको आयोजकले बताएका छन् ।

यो प्रदर्शनी सवारीसाधन, पार्टपुर्जा, वित्तीय सेवा एवं अन्य सम्बन्धित सरोकारवाला संघसंस्थाहरूको एक मात्र भव्य प्रदर्शनी हो ।

प्रदर्शनीको डोर प्राइजमा याडिया, टिकटिङ्ग पार्टनरमा खल्ती, अफिसियल इन्टरनेट पार्टनरमा वर्ल्डलिङ्क, फायर सेफ्टी सपोर्टमा हिट्को प्रा.लि. एवं हस्पिटल पार्टनरमा फ्रन्टलाइन हस्पिटलजस्ता प्रतिष्ठत संस्थाहरू रहेका छन् भने प्रदर्शनीको व्यवस्थापन ग्लोबल एक्सपोजिसन एण्ड म्यानेजमेन्ट सर्भिसेजले गर्नेछ ।

प्रकाशित मिति: बुधबार, भदौ १३, २०८० १६:५२