एनसेलका सीईओ जाब्बोरले भने– युवाहरूले ठूला सपना देख्नुपर्छ

A+ A A-

एनसेलका प्रमुख कार्यकारी अधिकृत (सीईओ) तथा प्रबन्ध निर्देशक जाब्बोर कायुमोभले युवाहरूले ठूलो सफलता हासिल गर्नका लागि ठूलै सपना देख्नुपर्ने बताएका छन् । उनले आफूले विश्वास गरेको कुरा सिक्ने जोस हुनुपर्ने र त्यसलाई भिजुअलाइज गर्नुपर्ने बताएका छन् ।

सीईओ जाब्बोरले शनिबार काठमाडौंमा आयोजित ‘काठमाडौं युथ कन्क्लेभ (केवाईसी), २०८०' कार्यक्रममा उक्त धारणा राखेका हुन् । सो अवसरमा उनले उत्साही युवाहरूसँग आफ्ना प्रेरणादायी यात्रा, नेतृत्वका मुख्य सिद्धान्त र अनुभव बाँड्दै योजनाको महत्त्व र लगनशीलतामा जोड दिनुपर्ने बताए ।

उनले युथ कन्क्लेभ (केवाईसी), २०८०' मा सहभागी युवाहरूलाई प्रेरणा र प्रोत्साहन पनि प्रदान गरे । युवाकेन्द्रित यस कार्यक्रममा विभिन्न शैक्षिक पृष्ठभूमि, समुदाय र भौगोलिक स्थानका करिब ५ हजार युवाहरूको सहभागिता थियो ।

यस वर्षको ‘केवाईसी' संस्करणको विषय ‘इन्स्पायरिङ युथ, लिडिङ द नेसन' थियो । जाब्बोरले कार्यक्रममा प्रेरणादायी वक्ताका रूपमा सहभागिता जनाएका थिए । १६ देखि २५ वर्ष उमेर समूहका युवाहरूको सो भेलामा जाब्बोरले आफ्नो प्रस्तुति राख्दै युवाहरूलाई थप सिक्ने भोक र लगनशीलताका साथ लक्ष्यमा अघि बढ्न प्रेरित गरे ।

जाब्बोरले युवाहरूलाई प्रतिस्पर्धी बन्न, आफ्नो इच्छाअनुसार काम गर्न र त्यसलाई वास्तविकतामा परिणत गर्न प्रोत्साहित गरे । उनले भने, 'प्रतिस्पर्धाले तपाईंलाई राम्रो बनाउँछ । राम्रा प्रतिस्पर्धीहरूले तपाईंलाई अझ राम्रो बनाउँछन् ।'

कार्यक्रममा प्रख्यात नेत्ररोग विशेषज्ञ डा. सन्दुक रूइत, चर्चित मास्टरशेफ सन्तोष शाह, ट्रेल रनर मीरा राई, ई–सेवाका सीईओ जगदीश खड्का, क्रिकेटर पारस खड्का र रूपेश्वर गौरा दासजस्ता प्रेरणादायी वक्ताहरू थिए ।

Ncell Photo1693390543.jpg

'व्यक्तिगत रूपमा युवाहरूसँग जोडिन पाएकोमा र उहाँहरूको ऊर्जा देखेर म साँच्चै प्रेरित भएको छु । यस किसिमको सम्मेलनले युवा प्रतिभाहरूको प्रवद्र्धनमा सहयोग गर्ने एनसेलको प्रतिबद्धतालाई बढावा दिन्छ,' जाब्बोरले भने ।

विभिन्न क्षेत्रमा उल्लेखनीय सफलता हासिल गर्न सफल व्यक्तित्वहरूको अनुभव र ज्ञान युवाहरूमाझ बाँडेर हौसला बढाउने यस सम्मेलनको प्रमुख उद्देश्य थियो । यो सम्मेलन युनिभर्सल कलेज र फिनिक्स कलेजको सहकार्यमा आयोजना गरिएको थियो ।

प्रकाशित मिति: बुधबार, भदौ १३, २०८० १६:०१