विकृतिको डङ्गुरमा बसेर जनताको पैसामा चयन गर्ने छुट छैन, पर्यटन बोर्ड नभए पनि देश चल्छः मन्त्री किराँती

विकृतिको डङ्गुरमा बसेर जनताको पैसामा चयन गर्ने छुट छैन, पर्यटन बोर्ड नभए पनि देश चल्छः मन्त्री किराँती

A+ A A-

संस्कृति, पर्यटन तथा नागरिक उड्डयनमन्त्री सुदन किराँतीले नेपाल पर्यटन बोर्डले बजेट सुधार नगरेसम्म बजेट पास हुन नसक्ने बताएका छन् ।

बुधबार काठमाडौंमा टुरिस्ट बस एशोसिएशन अफ नेपालले आयोजना गरेको ‘टुरिस्ट बस नेपाल’ एप्स शुभारम्भ कार्यक्रममा किराँतीले पर्यटन बोर्डको बजेट नसँच्चिएसम्म हतारमा पास गर्न नसकिने बताएका हुन् ।

‘पर्यटन बोर्डको बजेट सँच्चिएन भने अझै आउँदैन । अहिले नै बोर्डको बजेट हतारमा पास गरेर फेरि पनि कसैको दुनो सोझ्याउनको लागि बजेट आउँदैन,' किराँतीले भने, 'भौतिक संरचना बनाउने काम पर्यटन बोर्डको होइन । मैले सुरुमा नै बोर्डमा आएर भनेको छु । भौतिक संरचना निर्माण गर्ने पर्यटन विभाग छ । पर्यटन विभागले पर्यटनसम्बन्धि भौतिक संरचना निर्माण गर्ने हो । पर्यटनको प्रवर्द्धन बोर्डले गर्ने हो ।'

नेपाल पर्यटन बोर्डका प्रमुख कार्यकारी अधिकृत डा. धनञ्जय रेग्मीप्रति लक्षित गर्दै बोर्डको बजेट कमिसनको दुनो सोझ्याउनको लागि तत्काल आउन नसक्ने किराँतीले बताए । भौतिक संरचना बनाउने काम पर्यटन बोर्डको नभएको उनको भनाइ छ ।

पर्यटन क्षेत्रको विकासको लागि भौतिक संरचना निर्माण गर्ने पर्यटन विभाग रहेको भन्दै बोर्डले पर्यटनको प्रवर्द्धन गर्ने रहेको मन्त्री किराँतीको भनाइ छ । बोर्डको बजेटमार्फत भौतिक संरचनामा बजेट छुट्याएर ५ देखि १० प्रतिशत कमिसनमा बस्ने जमानाको अन्त्य भएको उनले बताए । आफू मन्त्रालयमा रहेसम्म भौतिक संरचनामा हुने कमिसनको खेल शून्य बनाएर छाड्ने उनको प्रतिबद्धता छ ।

मन्त्री किराँतीले पर्यटन बोर्डले पर्यटक ल्याउने नाममा ८० देखि ९० करोड रकम युरोप भ्रमणमा खर्च गर्न नपाउने बताए । दुई छिमेकी राष्ट्रको जनसंख्या अर्बमा रहेको भन्दै पर्यटन प्रवर्द्धनका लागि चीन र भारतमा आधा बजेट खर्च गर्नुपर्ने आवश्यकता रहेकोमा जोड दिए ।

'भौतिक संरचनामा बजेट छुट्याएर ५ देखि १० प्रतिशत कमिसनमा बस्ने जमानाको अन्त्य भयो । म आइसकेको छु यो मन्त्रालयमा म हुन दिन्नँ । भौतिक संरचनामा कमिसन खेल शून्य बनाएर छोड्छु,' किराँतीले भने, 'चीन र भारतमा आधा बजेट खर्च गर्नुपर्छ । भूटान र बंलादेशमा पनि जोड गर्नुपर्छ । नेपालीहरूको धेरै श्रमको गन्तव्य भएको खाडी मुलुकहरूलाई पनि बनाउनु पर्छ । अनि मात्रै युरोपलाई पनि बनाउँला । त्यसैले यस्तो चिजहरु सँच्चिदैन भने पर्यटन बोर्डको बजेट आउँदैन ।'

भूटान, बंलादेश र नेपालीहरूको धेरै श्रमको गन्तव्य भएको खाडी मुलुकहरूमा पनि जोड्ने प्रयास गर्नुपर्ने किराँतीको भनाइ छ । पर्यटन बोर्डले बजेटमा भौतिक संरचना निर्माण हटाएर प्रर्यटन प्रवर्द्धन गर्ने योजना नसच्याएसम्म बोर्डको बजेट नआउने उनले बताए ।

बोर्डका आजसम्मका विकृति, विसंगतिहरू अन्त्य गर्न चाहेको किराँतीको भनाइ छ । पर्यटन बोर्डको पैसामा आफन्त घुमाउने र महँगा सामानहरू ल्याएर बाँड्ने र बेच्ने सुविधा कसैलाई नभएको उनले बताए । पर्यटन बोर्डबिना पनि यो देश चल्न सक्ने भन्दै पर्यटन बोर्डले तत्काल बजेट सच्याए बजेट पास हुने उनको भनाइ छ ।

'पर्यटन बोर्डको बजेट सुधार नभएसम्म बजेट पास हुँदैन । कति महिना रोक्नुपर्ने हो । पर्यटन बोर्डबिना पनि यो देश चल्न सक्छ,' किराँतीले भने, 'तर विकृतिको डङ्गुरमाथि बसेर जनताको पैसामाथि चयन गर्ने छुट सुविधा छैन । पर्यटन बोर्डले आजभोलि नै बजेट सच्याउने छ । त्यसपछि बजेट पास हुन्छ ।’

किराँतीले प्रधानमन्त्री पुष्पकमल दाहालको नेतृत्वमा राष्ट्रिय सहमतिको सरकार बनाउनुपर्ने बताए । राष्ट्रिय सहमतिको सरकार बनाउँदा सबैभन्दा पहिला मन्त्री पद त्याग्नुपर्छ भने मन्त्री पद त्याग्न तयार रहेको उनको भनाइ छ ।

आफू मन्त्री हुनको लागि नजन्मिएको भन्दै किराँतीले राष्ट्रिय आवश्यकताअनुसार तत्काल कुर्सी छोड्न तयार रहेको बताए । राजनीतिक स्थायित्वको लागि पुरानाको अनुभव र नयाँको जोसजागर मिलाएर अगाडि बढ्नुपर्ने उको भनाइ छ ।

आजदेखि टुरिस्ट बस एशोसिएशन अफ नेपालले टुरिस्ट बसको टिकट अनलाइनको माध्यमबाट काट्न सक्ने गरी ‘टुरिस्ट बस नेपाल’एप्स सञ्चालनमा ल्याएको छ ।