संसदीय समितिको सभापति चुन्दा कांग्रेसमा लफडा, संस्थापन भन्छ- इतर समूहले संसदीय सुनुवाइ समिति पाउँछ

संसदीय समितिको सभापति चुन्दा कांग्रेसमा लफडा, संस्थापन भन्छ- इतर समूहले संसदीय सुनुवाइ समिति पाउँछ

A+ A A-

सोमबार राति कांग्रेस सहमहामन्त्री तथा सांसद जीवन परियारले सामाजिक सञ्जालमा लेखे, ‘म कुनै पनि समितिको सभापति नभएको जानकारी गराउँदछु । जय नेपाल !’

सामाजिक सञ्जालमा यति लेखेर परियार बाह्य सम्पर्कबाट टाढै बसे । पहिले उनले फोन उठाएनन् भने पछि सम्मर्क नहुने बनाए ।

उनको चर्चा संसदीय सुनुवाइ विशेष समितिको सभापतिको रूपमा भएको थियो । कांग्रेसका नेता कार्यकर्ताहरूले उनको फोटो जोडेर बधाई दिइसकेका थिए । सामाजिक सञ्जालमा पाएको बधाइको जवाफ सामाजिक सञ्जालबाटै दिएका थिए परियारले ।

स्टाटस लेखेपछि फोन नउठेको सन्दर्भमा उनले भने, ‘फोन साइलेन्समा थियो, थाहै पाइनँ ।’

सामाजिक सञ्जालमा फोटोसहित बधाई आउन थालेपछि आफ्नो कुरा प्रस्ट पार्न उनले समिति सभापतिमा नरहेको लेखेको बताए । ‘धेरै मान्छेहरूले फोटो बनाएर सामाजिक सञ्जालमा राख्नुभयो किन दोधारमा पार्नु भनेर प्रस्ट पार्न सामाजिक सञ्जालमा लेखेँ,’ उनले भने, ‘औपचारिक ठाउँबाट प्रस्ताव आएको छैन । अनुमानको भरमा जीवनजी बन्नुहुन्छ भनेर लेखिएको देखियो ।’

संसदीय समिति सभापति पार्टीले निर्णय गर्ने कुरा रहेको र आफ्नो चाहना नरहेको उनले बताए ।

परियारले यस्तो बताए पनि भित्री कुरा यसभन्दा फरक रहेको कांग्रेसकै नेताहरू बताउँछन् । कांग्रेस संस्थापनइतरका एक नेताका अनुसार सहमहामन्त्री परियार पार्टीभित्र सहमति नभएकाले पछि हटेका हुन् ।

‘नेताहरूबीचमा सहमति सुझबुझ नभई नाम समिति सभापतिमा गएकाले उहाँ (परियार) ब्याक हुनुभएको हो । कसैको चाहनामा उहाँले सभापति स्वीकार्नु भएन,’ कांग्रेस संस्थापनइतरका एक नेताले भने ।

परियार शिक्षा र संसदीय सुनुवाइ विशेष समितिमा छन् ।

कांग्रेसमा संसदीय समितिका सभापतिको भागवण्डालाई लिएर विवाद छ । सभापति शेरबहादुर देउवाले सभापति चयनअघि सल्लाह नगरेको र आफूखुसी व्यक्ति छनोट गरेका कारण त्यसलाई अस्वीकार गरिएको संस्थापन इतरका नेताहरू बताउँछन् ।

सत्ता गठबन्धनको भागवण्डामा कांग्रेसले राज्य व्यवस्था तथा सुशासन, संसदीय सुनुवाइ, अर्थ, कृषि सहकारी तथा प्राकृतिक स्रोत गरी चार समितिको सभापति पाएको थियो ।

चारमध्ये दुई सभापति आफ्नो पक्षले पाउनुपर्ने अडान संस्थापनइतरले राख्दै आएको छ । सभापति देउवालाई भेटेका संस्थापनइतरका नेता डा. शेखर कोइरालाले दुई जना सभापति आफ्नो तर्फबाट हुनुपर्ने कुरा राखेका थिए । प्रकाशमान सिंहलाई समेत भाग दिनुपर्ने भएपछि देउवाले संसदीय सुनुवाइ समितिको सभापतिइतर समूहलाई दिए ।

संस्थापन पक्षले राज्य व्यवस्था तथा सुशासनको समितिमा रामहरि खतिवडा, अर्थमा सन्तोष चालिसे र कृषि सहकारी तथा प्राकृतिक स्रोतमा आरजु राणालाई सभापति बनाइसकेको छ ।

संसदीय सुनुवाइ विशेष समितिमा इतर समूहले जसको नाम दिन्छन् सोही व्यक्ति नै सभापति बन्ने देउवानिकट एक नेता बताउँछन् । ‘संसदीय सुनुवाइ विशेष समिति सभापतिको हकमा शेखर कोइराले जसको नाम दिनुहुन्छ, त्यही व्यक्ति नै हुन्छन्,’ उनले भने ।

इतर समूहले हरेक ठाँमा ४० प्रतिशत हिस्सा माग गरिरहेको छ । त्यसमा पछि हट्ने मनसाय इतर समूहको छैन । भागवण्डाबाट पार्टी सत्तामा जरो गाडेका देउवासँग भागवण्डा नगरी नहुने बुझाइमा इतर समूह छ । तीनवटा संसदीय समितिको सभापति संस्थापनले राखेर एक समिति मात्र इतरलाई भाग दिएपछि इतर समूह चिढिएको हो ।

संसदीय सुनुवाइ समितिले मुख्य रूपमा संवैधानिक पदहरूमा नियक्तिका लागि भएको सिफारिसको सुनुवाइ गर्छ । सोही कारण पनि इतर समूह थप चिढिएको हो ।

राज्य व्यवस्था तथा सुशासन समिति सभापति रामहरि खतिवडा भने पार्टीभित्र देखिएको समस्या समाधान हुने बताउँछन् । ‘केही गलत बुझाइ पार्टीम हुन सक्छ । त्यो सहमति गरेरै मिल्छ,’ उनले शिलापत्रसँग भने ।

इतर समूहकी सांसद प्रतिमा गौतम पनि सहमति हुने बताउँछन् । ‘केही असमझदारी रहेको बुझेको छु । जे जस्तो कुरा रहे पनि मिल्छ,’ उनले भनिन् ।

कृषि, सहकारी तथा प्राकृतिक स्रोत समितिको सभापति सभापति देउवा पत्नी आरजु राणाले रोजिन् । उनको चाहना रोक्ने सामर्थ्य पार्टीका नेताहरूमा छैन । आरजुको रोजाइ र आफ्नो समूहमा रहेको उपसमूहको प्रभावमा सभापति देउवा परे । यसमा उनले पेलान गर्न सक्ने ठाउँ भनेको इतर समूह थियो त्यही भाग घटाइदिए ।

प्रकाशित मिति: मंगलबार, भदौ १२, २०८० २०:१९