एमाले प्रदेश अधिवेशन : विष्णु र शंकरबीच शक्ति प्रदर्शनकाे मैदान बन्ने संकेत

एमाले प्रदेश अधिवेशन : विष्णु र शंकरबीच शक्ति प्रदर्शनकाे मैदान बन्ने संकेत

A+ A A-

संघीय संरचनाअनुसार एमालेले प्रदेश संरचना बनाए पनि अधिवेशन नै गरेर पहिलाेपटक कार्यसमिति चयन गर्ने भएपछि एमालेकाे भावी नेतृत्व लिने दाैडमा देखिएका उपाध्यक्ष विष्णु पाैडेल र महासचिव शंकर पाेखरेल प्रदेशमै आफ्नाे शक्ति देखाउन सक्रिय भएका छन् ।

दुवै नेताहरूकाे एमालेमा यसअघि नै प्रतिस्पर्धा हुने गरेकाे थियाे । त्यसमाथि एउटै प्रदेश लुम्बिनीका यी दुवै नेताहरू प्रदेशमा शक्ति आर्जन गरी एमालेकाे नेतृत्वमा स्थापित हुन लागिपरेका छन् । अध्यक्ष केपी शर्मा ओलीले पार्टीबाट विदा लिए यी दुईमध्ये एक अध्यक्ष हुने आकल गरिन्छ ।

अहिले हुन लागेकाे प्रदेश अधिवेशनमा यी दुवै नेताहरूकाे शक्ति संघर्ष देखिन संकेत १६ भदाैमा हुने लुम्बिनीकाे प्रदेश अधिवेशनले संकेत गरेकाे छ ।

लुम्बिनी प्रदेशमा यही भदौ १६ र १७ गते बुटवल १० रामनगरस्थित बुटवल अन्तर्राष्ट्रिय सम्मेलन केन्द्रमा अधिवेशन हुँदै छ । यो प्रदेश नेकपा एमालेको आधार क्षेत्र मानिन्छ । मालेकालदेखि नै एमालेको राम्रो बाहुल्यता भएको क्षेत्र हो याे । यो प्रदेशबाट एमालेले गत मंसिरको निर्वाचनमा संघमा ११ जना र प्रदेशसभामा १८ जना सांसद जितेको छ ।

यो अधिवेशनलाई अन्य प्रदेशले पनि हेरिरहेका छन् । नेकपा एमालेका पदाधिकारी याे प्रदेशबाट ७ जना छन् । जसमा एक जना निलम्बनमा परेका छन् ।

लुम्बिनीबाट ७ जना पदाधिकारीमा उपाध्यक्षद्धय युवराज ज्ञवाली,विष्णु पौडेल, महासचिव शंकर पोखरेल, उपमहासचिव प्रदिप ज्ञवाली, सचिव गोकर्ण विष्ट, छविलाल विश्वकर्मा , टोपबहादुर रामयमाझी छन् । रायमाझी नक्कली भुटानी शरणार्थी प्रकरणमा जेलमा छन् । उनलाई पार्टीले निलम्बन गरेको छ ।

याे प्रदेशमा पदाधिकारी सात भए पनि प्रतिस्पर्धा पाैडेल र पाेरखेलबीच देखिएकाे छ । यी दुई नेताबीच केन्द्रदेखि प्रदेश हुँदै जिल्लासम्म आआफ्नो पक्षलाई बलियो बनाउने होडबाजी नै छ । चाहे त्यो टिकट वितरण होस् चाहे कुनै नियुक्तिमा होस् ।

अहिले यी दुई नेताका कारण पनि एमालेभित्र लुम्बिनी प्रदेशको सम्मेलन चासोका साथ हेरिएको छ- कसको वर्चस्व स्थापित हुन्छ भनेर । तर एमालेका नेताहरू बाहिर एमालेमा कुनै पक्ष विपक्ष नरहेको, गुट नरहेको दाबी गर्छन् । आन्तरिक रुपमा यी दुई नेताबीच एकले अर्काको विरुद्ध पालिकादेखि केन्द्रसम्म गुटबन्दी गर्ने गरेको लुम्बिनी प्रदेशका एक प्रदेश कमिटी सदस्य बताउँछन् । ती सदस्यले भने, ‘बाहिर त नेताहरू मिले जस्ता देखिन्छन् तर भित्र गुट बनाउने प्रतिस्पर्धा पुरानै हो । एमाले विभाजन भएपछि केही नेताहरू बाहिरीए । तर पनि एक पक्षले अर्को पक्षलाई रोक्न र सक्न सक्रिय छन् । विचार, सिद्धान्त एउटै हो तर जुँगाको लडाइँ जारी छ । प्रदेश सम्मेलनमा त्याे पनि देखिन्छ ।’

यो प्रदेशबाट पोलिटब्युरो सदस्यहरू लीला गिरी, खिमलाल भट्टराई, सूर्य थापा, ठाकुर गैरे छन् । यी नेताहरूको पनि आआफ्नो स्वार्थ हुन्छ तर पदाधिकारी नै हाबी हुने देखिन्छन् ।

एमालेको लुम्बिनी प्रदेशको अधिवेशन रोचक मात्र होइन एमालेभित्रको कुन गुट स्थापित हुने भन्ने पनि हुन्छ । एमालेमा अहिले दोस्रो पुस्तामा तीव्र गुटबन्दी छ । जसको नेतृत्व लुम्बिनी प्रदेशबाट पौडेल र पोखरेलले नै गरिरहेका छन् । एमाले अध्यक्ष केपी शर्मा ओली निर्विकल्प भए पनि दोस्रो पुस्तामा गुटबन्दी छ । गुटबन्दीको नेतृत्व अहिले एमालेमा लुम्बिनी प्रदेशले गर्दै आएको छ । उपाध्यक्ष पौडेल र पोखरेलबीच नै गुटबन्दी छ । जसको प्रत्यक्ष प्रभाव यो प्रदेश अधिवेशनमा पर्ने छ ।

एमालेमा प्रदेश अध्यक्षलाई पार्टीको पोलिटब्युरोको बराबरको हैसियत दिएको छ । जसका कारण केन्द्रीय सदस्यहरू पनि प्रदेशको नेतृत्वमा जान तयार भएका छन् ।

लुम्बिनीमा प्रदेश अध्यक्ष हुन तीन जना नेताहरू इच्छुक देखिएका छन् । जसमा केन्द्रीय नेतृत्वसँग जोडिएका नेताहरूको बढी चर्चा रहेको छ । अहिलेका प्रदेश अध्यक्ष राधाकृष्ण कँडेल दोहरिन चाहेका छन् । कँडेल उपाध्यक्ष पौडेलनिकट मानिन्छन् । अहिलेको एमालेभित्रको समीकरण हेर्दा लुम्बिनीमा पदाधिकारीमा पौडेल पक्ष बलियो छ । पौडेल, युवराज ज्ञवाली, विश्वकर्मा, विष्ट र इन्चार्ज पद्मा अर्यालको एक समूह छ ।

महासचिव पोखरेल पदाधिकारीमा एक्लै छन् । प्रदिप ज्ञवाली कतै नखुलेकाले दुबै पक्षकाले आफ्नो भन्ने गरेका बताइन्छ ।

केन्द्रीय सदस्य तथा प्रदेशका पूर्व मन्त्री हरिप्रसाद रिजाल पनि प्रदेशको नेतृत्वका लागि तयारीमा रहेका छन् । उनी प्युठानका हुन् । रिजाल महासचिव पोखरेलनिकट मानिन्छन् ।

लुम्बिनीकाे अधिवेशनले अन्य प्रदेशकाे अधिवेशन कसरी अगाडि बढ्छ भन्ने देखाउने छ । लुम्बिनी प्रदेशको अधिवेशनले पौडेल र पोखरेल पक्षमा कसको पल्ला भारी भन्ने सिनारियो देखाउने एक स्थायी कमिटी सदस्य बताउँछन् ।

लुम्बिनीबाट सबै पदाधिकारीले संघको निर्वाचन जित्दा महासचिव पोखरेले भने हारेका थिए । महासचिवको हारमा पनि कहिँ न कहिँ उपाध्यक्ष पौडेलको हात रहेको एमाले वृत्तमा चर्चा हुने गर्छ ।

असोजमा एमालेको कर्णाली प्रदेशले अधिवेशन हुँदैछ । असोज १० र ११ गते वीरेन्द्रनगरमा अधिवेशन हुनेछ । यो प्रदेशबाट एमालेको पदाधिकारी भने कोही छैन । स्थायी कमिटी सदस्यमा यमलाल कँडेल छन् ।

कर्णाली प्रदेशमा पनि केन्द्रका दोस्रो पुस्ताको नेताहरूको गुटबन्दी छ । कँडेल भने दुवै पक्षसँग असन्तुष्ट मानिन्छन् । पौडेल र पोखरेलसहित कँडेलले पनि आफ्नै तरिकाले पार्टी चलाउछन् । कर्णालीको प्रदेश अधिवेशनमा पनि पौडेल र पोखरेलबीच आफ्नो समूहको नेतालाई नेतृत्वमा स्थापित गर्ने होडबाजी चल्ने देखिन्छ ।

यो प्रदेशबाट कँडेल स्थायी कमिटी सदस्य हुन् भने गुलाबजंग शाह, लक्ष्मी पोखरेल, मोहन बानियाँ र भैरवसुन्दर श्रेष्ठ पोलिटब्यूरो सदस्य छन् । विष्णु रिजाल, निरज आचार्य, धर्मराज रेग्मीलगायतका युवाहरू केन्द्रीय सदस्य छन् ।

केही प्रदेश सदस्य र केन्द्रीय सदस्यहरू विष्णु रिजाल, निरज आचार्य, राजबहादुर बुढालगायतका नेताहरू प्रदेश अध्यक्षका आंकाक्षी छन् । प्रदेशमा प्रतिनिधि छनाेटको प्रक्रिया नै सुरु नभएकाले अहिले नै केही भन्न नसकिने केन्द्रीय सदस्य निरज आचार्यले बताए । उनले भने, ‘प्रदेश अधिवेशनका लागि प्रतिनिधि छनाेट नै नभएकाले अहिले नै प्रदेश अधिवेशनका नेतृत्वको बारेमा कुरा गर्नु सान्दर्भिक नै हुँदैन ।’

नेताहरूले अहिले नै कुन नेता कसको पक्षको हो भन्ने खुली नसकेको बताए पनि पौडेल र पोखरेलको आन्तरिक गुटबन्दीको असर कर्णाली प्रदेशमा पनि जारी रहेको एक प्रदेश कमिटी सदस्य बताउँछन् ।

जनप्रतिनिधिले पार्टीको कार्यकारी भूमिका नपाउने एमालेको निर्णयले धेरै जनप्रतिनिधिहरू नेतृत्वको दाबीबाट नै बाहिर हुने छन् ।

लुम्बिनीमा केन्द्रीय सदस्य पनि अध्यक्षको दाबेदार भएकाले कर्णालीमा पनि केन्द्रीय सदस्यहरूमध्ये पनि अध्यक्ष हुने बाटो खुलेको एक केन्द्रीय सदस्यले बताए ।

कर्णालीमा नेताहरू बाहिर कोही कसैको पक्षमा नखुले पनि आन्तरिक रुपमा पौडेल र पोखरेल पक्षमा छन् । कर्णालीमा पोखरेल पक्ष अलि बलियो रहेको बताइन्छ । युवा संघको सम्मेलनमा पनि स्थानीय नेताले भनेअनुसार नेतृत्व चयन भएन । पोखरेलले आफू अनुकल नेतृत्व चयन गरेका थिए ।

स्थानीय र संघ र प्रदेशसभामा टिकट वितरणमा पनि पोखरेल हाबी भएकाे एक स्थानीय नेता बताउँछन् । ती नेताले भने, ‘महासचिव कमरेडले एकलौटी रुपमा टिकट वितरण गरेको भन्दै अहिले पनि अर्को प्रक्षले प्रदेशमा विरोध गर्छन् । अब प्रदेश सम्मेलनमा पनि त्यो नहोला भन्न सकिँदैन ।’

पौडेल र पोखरेलबीचको शक्तिको लडाइँ सबै प्रदेशको अधिवेशनमा देखिने छ । कर्णालीमा विष्णु रिजाल, निरज आचार्य, दल रावल, नगेन्द्र शाही, मीनबादुर शाहीले कित्ता किलियर गरेका छैनन् । रविन्द्रराज शर्मा, राजबहादुर शाही, नवराज रावतलगायतका नेताहरू पूर्व राष्ट्रपति विद्यादेवि भण्डारीका नजिक मान्निछन् ।

यस्तै, अध्यक्षका दाबेदार लक्ष्मी प्रसाद पोखरेल, गुलावजंग शाह, डण्डीप्रसाद शर्मा, लालबहादुर महतारा, ध्रुवकुमार शाही महासचिव शंकर पोखरेल निकट मानिन्छन् ।

असोज ५ र ६ मधेश प्रदेश, ८ र ९ गते बागमती प्रदेश, १० र ११ गते कर्णाली प्रदेश, १२ र १३ गते कोशी प्रदेश, १५ र १६ गते गण्डकी प्रदेश, १९ र २० गते उपत्यका प्रदेश विशेष र २१ र २२ गते सुदूरपश्चिम प्रदेशमा अधिवेशन गर्ने तय भइसकेको छ ।

प्रकाशित मिति: सोमबार, भदौ ११, २०८० २०:४८