एसिया कप : विराट कोहली-बाबर आजम होइन, नेपालका लागि ‘टेन्सन’ बन्न सक्छन् यी ब्याटर

एसिया कप : विराट कोहली-बाबर आजम होइन, नेपालका लागि ‘टेन्सन’ बन्न सक्छन् यी ब्याटर

A+ A A-

पाकिस्तानको मुल्तानमा ३० अगस्टमा एसिया कप क्रिकेट प्रतियोगिता सुरु हुँदैछ । नेपाल पहिलोपटक एसिया कपमा सहभागी भएसँगै यो प्रतियोगिताप्रति नेपालमा पनि चासो बढेको छ । नेपालमा मात्र होइन, पाकिस्तानमा नेपाली क्रिकेट टिमले पाएको महत्वले पनि नेपाली क्रिकेटमा विश्वक्रिकेटकै नजर रहेको देखाउँछ ।

पाकिस्तान आयोजक रहेको यो प्रतियोगिता योपटक ओडीआई प्रारुपमा पाकिस्तान र श्रीलंका हुँदैछ । समूह ए मा रहेको नेपालले एक खेल पाकिस्तानमा खेल्ने छ भने अर्को खेल श्रीलंकामा । पाकिस्तानको मुल्तानमा ३० अगस्टमा पाकिस्तानविरुद्ध उद्घाटन खेल खेल्ने नेपालले ४ सेप्टेम्बरमा भारतविरुद्ध श्रीलंकाको क्यान्डीमा खेल्ने छ । समूह चरण पार गर्न सके नेपालले त्यसपछिका खेलहरू श्रीलंकामै खेल्ने छ ।

६ टिम सहभागी रहेको खेलमा नेपाल रहेको समूह ए मा भारत र पाकिस्तान छन् । पाकिस्तान अहिले ओडीआईमा एक नम्बर वरीयताको टिम हो भने भारत तीन नम्बरमा छ । भारत र पाकिस्तान विश्वस्तरीय खेलाडीले भरिएका टिम हुन् । अनुभवी पाकिस्तानी र भारतीय खेलाडीको सामाना प्रतियोगिताकै सबैभन्दा योङ्गेस्ट नेपाली टिमले कसरी गर्छ चासोको विषय बनेको छ । ९० को दशकबाट क्रिकेट खेल्न थालेको नेपालले पहिलोपटक भारत र पाकिस्तान जस्ता अनुभवी र बलिया प्रतिस्पर्धीसँग ठूलो प्रतियोगितामा खेल्ने अवसर पाएको छ ।

त्यसैले पनि नेपाली टिमले कस्तो प्रदर्शन गर्छ पर्खाइको विषय बनेको छ । नेपालले अहिले भारत र पाकिस्तानलाई हराउने भन्दा पनि बलियो टक्कर दिने स्वयम कप्तान रोहित पौडेल र प्रमुख प्रशिक्षक मोन्टी देसाईले बताएका छन् । त्यसैले पनि जितको अपेक्षाभन्दा पनि प्रदर्शनको स्तर कस्तो रहन्छ महत्वपूर्ण बनेको छ ।

विश्व क्रिकेटमै अहिले भारतीय ब्याटर विराट कोहली र पाकिस्तानी कप्तान तथा ब्याटर बाबर आजम उत्कृष्ट मानिन्छन् । बाबार त लामो समयदेखि ओडीआई ब्याटरको एक नम्बर वरीयतामा छन् । त्यसैले भारत र पाकिस्तानविरुद्ध नेपालले खेल्दा यी दुई खेलाडी मुख्यरुपमा नेपाली बलरका लागि खतरा बन्न सक्छन् ।

कोहली र आजम मात्र नेपाली बलरका लागि खतरा होइनन, दुई अन्य यस्ता ब्याटर छन् जसलाई नेपालले हल्का रुपमा कुनै पनि हालतमा लिनु हुँदैन । ती हुन् भारतका ओपनर ब्याटर तथा कप्तान रोहित शर्मा र पाकिस्तानी ओपनर पखर जमान ।

यी दुई खेलाडीको चर्चा कोहली र आजमको भन्दा कम हुने गरे पनि विपक्षी टिमलाई ध्वस्त बनाउन यी दुवै माहिर छन् । सुरुमै यिनीहरूलाई आउट गर्न नसके उनीहरूले नेपाली बलरमाथि निर्मम प्रहार गर्न सक्छन् ।

रोहित शर्मा ओडीआईमा दुईवटा दोहोरो शतक बनाएका एक मात्र खेलाडी हुन् । उनी पहिलो शतक बनाउन समय लिन्छन् तर त्यसपछि बलरमाथि निर्मम आक्रमण गर्छन् । उनको खेल्ने शैली निकै घातक छ । उनले श्रीलंका विरुद्ध बनाएको २६४ रन ओडीआईको सबैभन्दा ठूलो इनिङ्स हो । रोहित शर्माले २४४ ओडीआईमा ९८३७ रन बनाउँदा ३० शतक र ४८ अर्धशतक बनाएका छन् । उनको स्ट्राइक रेट ९० को करिब छ । शर्माको बलियो पक्ष भनेको उनी फास्ट र स्पीनर दुवैलाई राम्रो खेल्छन् । तर, लेफ्ट ह्यान्ड फास्ट बलिङमा संघर्ष गर्छन् ।

अब कुरा गरौँ पाकिस्तानी ब्याटर फखर जमान । उनको बारेमा भनिन्छ, जीवनदान पाउनु उनको दिन हो । अथवा उनले सुरुमा जीवनदान पाए भने त्यसपछि रोकिँदैनन् । बलरमाथि निकै आक्रामक बन्ने उनी पनि पाकिस्तानका ओपनर ब्याटर हुन् । हालै श्रीलंकामा अफगानिस्तानसँगको सिरिजमा उनी चम्किएनन् ।

तर, उनलाई फर्ममा आउन एक खेल धेरै हुन्छ । उनले पनि ओडीआईमा दोहोरो शतक बनाइसकेका छन् । उनले हालसम्म ७३ खेलबाट ओडीआईमा ३२०७ रन बनाउँदा १० शतक र १५ अर्धशतक बनाएका छन् । उनको स्ट्राइक रेट करिब ९४ को छ । ब्यायाँ हाते यी ब्याटर सुरुमा संघर्ष गर्छन् । त्यसैबेला उनलाई आउट पार्न सक्नुपर्छ । यदि पिचमा टिके भने बलिङ आक्रमण ध्वस्त बनाउँछन् ।

प्रकाशित मिति: सोमबार, भदौ ११, २०८० १५:४३