पुटिनलाई वाग्नरले फेरि विद्रोह गर्ला भन्ने डर, लडाकुलाई वफादारीको शपथमा हस्ताक्षर गर्न भने

पुटिनलाई वाग्नरले फेरि विद्रोह गर्ला भन्ने डर, लडाकुलाई वफादारीको शपथमा हस्ताक्षर गर्न भने

A+ A A-

गत बिहीबार २४ अगस्टमा रुसको टेभर शहरमा वाग्नर प्रमुख यबगेनी प्रिगोजिन सवार विमान दुर्घटनाग्रस्त बन्यो । सो विमान दुर्घटनामा प्रिगोजिनसँगै त्यसमा सवार वाग्नरका उच्च अधिकारीहरूसहित १० जनाको मृत्यु भयो ।

आइतबार मात्र रुसको सरकारले विमान दुर्घटनामा भेटिएका शवमा गरिएको अनुवांशिक विश्लेषणपछि प्रिगोजिनको मृत्यु भएको औपचारिक पुष्टि गरेको थियो । उक्त विमान दुर्घटनालाई पश्चिमा राष्ट्रहरूले रुसी राष्ट्रपति भ्लादिमिर पुटिनको हत्या योजना भनेका छन् । ती राष्ट्रहरूले प्रिगोजिनको हत्या तय थियो भनिरहेका छन् र हत्या ढिला हुनुलाई चाहिँ आश्चर्य मानेका छन् ।

सार्वजनिक भएको भिडियोमा विमान आकाशबाट सोझै भुईंमा खसेको देख्न सकिन्छ । युक्रेनविरुद्धको युद्धमा वाग्नरले सघाउ पुर्‍याउँदै आएको थियो, तर गत जून महिनामा रुसी सरकारविरुद्ध नै वाग्नरले विद्रोह गरेको थियो । उक्त असफल विद्रोहपछि वाग्नर प्रमुख बेलारुस निर्वासित भएका थिए ।

वाग्नर प्रमुखको मृत्यु भएसँगै यतिबेला रुसका राष्ट्रपति भ्लादिमिर पुटिनले प्रिगोजिन र घटनामा मारिएका परिवारहरूलाई शोक सन्देश पठाएका छन् । पुटिनले प्रिगोजिनको मृत्युसँगै वाग्नरका लडाकुहरूलाई वफादारीको शपथमा हस्ताक्षर गर्न पनि आदेश दिएका छन् ।

पुटिनका अनुसार वाग्नरसँगै अन्य भाडाका लडाकु परिचालन गर्ने संस्थालाई सरकारको दायराभित्र ल्याउनुपर्छ र उनीहरूलाई देशप्रति वफादार बनाउन वफादारीको शपथमा हस्ताक्षर गराउनुपर्छ । यससँगै वाग्नरको विद्रोहपछि पुटिन पुनः लडाकुहरूबाट सरकारविरुद्ध विद्रोह हुने त्रासमा रहेको टिप्पणी हुन थालेको छ । एपीको सहयोगमा