चुम्बन विवादपछि फिफाले गर्‍यो स्पेनिस फुटबल संघका अध्यक्षलाई निलम्बन, खेलाडीविरुद्ध नै उत्रियो संघ

चुम्बन विवादपछि फिफाले गर्‍यो स्पेनिस फुटबल संघका अध्यक्षलाई निलम्बन, खेलाडीविरुद्ध नै उत्रियो संघ

A+ A A-

विश्व फुटबलको सर्वोच्च निकाय फिफाले स्पेनिस फुटबल संघका प्रमुख लुइस रुबियालेसलाई ९० दिनका लागि निलम्बन गरेको छ ।

फिफाको अनुशासन समितिले लुइसलाई ९० दिनसम्म राष्ट्रिय तथा अन्तर्राष्ट्रिय कुनै पनि फुटबल गतिविधिमा संलग्न नगराउने निर्णय गरेको हो । स्पेनिस महिला फुटबल टोलीले विश्वकप जितेपछि मेडल र ट्रफी प्रदान गर्ने सिलसिलामा आफ्ना खेलाडीहरूलाई बधाई दिन लुइस पनि त्यहाँ सहभागी थिए । सो क्रममा उनले जेनिफर हर्मोसोलाई ओठमा चुम्बन गर्नुका साथै उनलाई उचालेका पनि थिए ।

स्पेनभित्रै महिला हिंसा भएको भन्दै चर्को विवाद भएपछि लुइसले गत शुक्रबार नै स्पेनिस फुटबल संघको अध्यक्ष पद छाड्ने अपेक्षा गरिएको थियो । तर, उनले पत्रकार सम्मेलनमा आफूले संघबाट राजीनामा नदिने बताएका छन् । स्पेनिस फुटबल संघले पनि लुइसको बचाउ गर्ने औपचारिक जानकारी दिएको छ ।

महिला खेलाडी हर्मोसोले भने आफूलाई अनुमतिबिना चुम्बन गरिएको बताउँदै आएकी छिन् । उनले सामाजिक सञ्जालमा लेखेकी छिन्, ‘मैले असुरक्षित महसुस गरेँ, मेरो कुनै सहमतिबिना त्यस्तो गरियो । मैले यौनहिंसाको शिकार भएको महसुस गरेको छु ।’

स्पेनिस फुटबल संघले हर्मोसोविरुद्ध नै कानुनी लडाइँ लड्ने चेतावनी दिएको छ । संघले भनेको छ, ‘हाम्रा अध्यक्षले झुट बालेका छैनन् । प्रमाणले पनि त्यही भन्छ । संघ र हाम्रा अध्यक्षले खेलाडीका तर्फबाट वा खेलाडी आफैँले फैलाएको प्रत्येक झुटको पर्दाफास गर्नेछ । हामी कानुनी प्रक्रियामा जानेछौँ ।’

लुइसले फिफाले लगाएको प्रतिबन्धविरुद्ध पनि कानुनी उपचार खोज्ने बताएका छन् । त्यसो त यसअघि लुइस रुबियालेसले महिला खेलाडी एथेनिए डेल कास्टिल्लोलाई काँधमा राखेर उचाल्दा पनि उनको आलोचना भएको थियो । उनले शक्तिको दुरुपयोग गरेर महिला खेलाडीमाथि हिंसा गरिरहेको आरोप लागेको थियो ।

-अल जजिरा र द गार्डियनको सहयोगमा

प्रकाशित मिति: आइतबार, भदौ १०, २०८० १६:४२