एसिया कप तीन दिन बाँकीः विश्व नम्बर एक टिम र ब्याटरसँग खेल्ने मौका पाएको नेपाल

एसिया कप तीन दिन बाँकीः विश्व नम्बर एक टिम र ब्याटरसँग खेल्ने मौका पाएको नेपाल

A+ A A-

पहिलोपटक एसिया कप क्रिकेट प्रतियोगिता खेल्न लागेको नेपाली टिम यतिबेला पाकिस्तानमा छ । पाकिस्तान आयोजक रहेको यसपटकको एसिया कप हाइब्रिड मोडलमा हुँदैछ । पाकिस्तानमा र श्रीलंकामा हुने खेलको तयारीका लागि नेपाली टिम २२ अगस्टमै पाकिस्तान प्रस्थान गरेको थियो ।

पाकिस्तानको कराँचीस्थित नेसनल क्रिकेट एकेडमीमा नेपाली टिमले अभ्यास गरेको छ । पाकिस्तानमा नेपाली टिमलाई निकै महत्वका साथ लिइएको छ । विमानस्थलबाटै उच्च सुरक्षा प्रोटोकल दिएको पाकिस्तानले नेपाली टिमलाई अभ्यासका लागि पनि महत्वपूर्ण सहयोग गरेको छ ।

पाकिस्तानी सञ्चार माध्यहरूका अनुसार कराँचीस्थित क्रिकेट एकेडमीमा नेपाली ब्याटरले पाकिस्तानी नेटबलरको बलिङमा अभ्यास गरेका छन् । प्रतिघण्टा १४० किलोमिटर गतिका बलरसँग नेपाली ब्याटरले अभ्यास गरेका छन् । पाकिस्तानको मौसम र वातावरण तथा त्यहाँको पीचको अवस्था बुझ्न नेपाली टिम प्रतियोगिता सुरु हुनु अगावै पाकिस्तान पुगेको हो ।

आज आइतबार नेपाली टिम प्रतियोगिताको पहिलो खेल हुने पाकिस्तानको मुल्तान पुग्दै छ । मुल्तानमा ३० अगस्टमा नेपालले आईसीसीको वरीयतामा नम्बर १ मा रहेको पाकिस्तानसँग प्रतियोगिताको उद्घाटन खेल खेल्ने छ ।

श्रीलंकामा अफगानिस्तानविरुद्ध सम्पन्न तीन खेलको सिरिज पाकिस्तानले क्लिन स्वीप गरेपछि पाकिस्तान ओडीआईमा विश्ववरीताको एक नम्बरमा पुगेको हो । नेपालले हालसम्म ५७ वटा ओडीआई खेल्दा नम्बर एक टिमसँग खेल्ने मौका पहिलोपटक पाउँदै छ । नेपाल अहिले आईसीसीको ओडिआई वरीयतामा १५ नम्बरमा छ । विश्व क्रिकेटकै महाशक्ति पाकिस्तानसँग खेल्न पाउनु नेपालका लागि ऐतिहासिक अवसर हो ।

त्यति मात्र होइन पाकिस्तानी टिमका कप्तान बाबर आजम ओडीआई ब्याटरको एक नम्बरमा छन् भने इमामुल हक तीन नम्बरमा र फखर जमान ५ नम्बरमा छन् । यस्तै बलिङतर्फ शाहिन शाह अफ्रिदी टप टेनभित्र रहेका एक मात्र बलर हुन् । उनी नौ नम्बरमा छन् ।

प्रकाशित मिति: आइतबार, भदौ १०, २०८० १४:१९