सी र मोदीबीच भेटवार्ता, सीमा विवाद सुधार गर्ने विषयमा भयो छलफल

A+ A A-

गतहप्ता दक्षिण अफ्रिकाको जहानेसबर्गमा सम्पन्न ब्रिक्स सम्मेलनमा चीनका राष्ट्रपति सी चिनफिङ र भारतका प्रधानमन्त्री नरेन्द्र मोदीबीच भेटवार्ता भयो ।

चीनको विदेश मन्त्रालयका अनुसार भारतको आग्रहमा सीले मोदीलाई भेटेका हुन् तर भारतको विदेशमन्त्रालयले पनि चीनको आग्रहमा मोदीले सीलाई भेटेको दाबी गरेको छ ।

भारतीय विदेश मन्त्रालयका अनुसार चीनले कैयौँ महिनादेखि द्विपक्षीय बैठकको आह्वान गरेको थियो, जसका कारण सी र मोदीले गतहप्ताको बिहीबार जोहानेसबर्गमा भेटवार्ता गरेका हुन् ।

चीनका अनुसार सी र मोदीबीचको भेटवार्तामा दुवै देशको सम्बन्ध सुमधुर बनाउने विषयमा छलफल भयो । चिनियाँ विदेश मन्त्रालयका अनुसार सीले मोदीलाई शान्ति र विकासका लागि सुमधुर सम्बन्ध हुनुपर्नेमा जोड दिए । साथै, उनले सीमा विवाद समाधानको विषयमा दुवै देश सकारात्मक हुनुपर्ने जसबाट शान्ति ल्याउन सकिने पनि बताए ।

मोदीले सो क्रममा एलएसीमा जारी तनावबारे मुद्दा उठाएका थिए । एलएसी चीन र भारतबीचमा रहेको सीमांकन नभएको क्षेत्र हो, जसलाई दुवै देशले आफ्नो भएको दाबी गर्दै आएका छन् । लद्दाखनजिकैको एलएसी क्षेत्र गलवान उपत्यकामा सन् २०२० मा भारतका सेना र चिनियाँ सेनाबीच हिंस्रक झडप नै भएको थियो ।

त्यसबेला २० भारतीय सेना र ५ चिनियाँ सेनाको ज्यान गएको थियो । त्यति मात्र नभएर चीनले भारतको अरुणाचल प्रदेशलाई दक्षिणी चिनियाँ क्षेत्र जंगनान प्रान्त भन्ने गरेको छ । चीनले पछिल्ला दिनहरूमा अरुणाचलका विभिन्न गाउँलाई चिनियाँ नाम नै दिएको छ ।

यस्तो अवस्थामा मोदी र सीबीच लद्दाखनजिकैको क्षेत्रमा दुवै देशले सेनाको संख्यामा कटौती गर्नुपर्नेमा सहमति भएको बताइएको छ । भारतका विदेश सचिव विनय क्वात्राले यस विषयमा भनेका छन्, ‘मोदी र सीबीच लद्दाखनजिकैको विवादित क्षेत्रमा सेनाको संख्या कम गर्ने सहमति भएको छ ।’

ब्रिक्स सम्मेलनमा मोदी र सीले हात मिलाएको भिडियो पनि सार्वजनिक भएको छ । दैनिक भास्करको सहयोगमा

प्रकाशित मिति: आइतबार, भदौ १०, २०८० १२:५२