बुटवलमा अर्को केबलकार सञ्चालनको तयारी : पाल्पाको नुवाकोटसम्म पुग्दा भैरहवा र परासी बजार पनि देखिने

बुटवलमा अर्को केबलकार सञ्चालनको तयारी : पाल्पाको नुवाकोटसम्म पुग्दा भैरहवा र परासी बजार पनि देखिने

A+ A A-

बुटवलबाट नुवाकोट जोड्ने सिद्धार्थ केबलकार तिहारपछि सञ्चालनमा ल्याउने तयारी भएको छ । बुटवलको देउराली डाँडाबाट पाल्पाको नुवाकोटसम्म दुई किलोमिटर दुरीको केबलकार अहिले निर्माण भइरहेको छ । हालसम्म केबलकारतर्फ ८० प्रतिशत र बाँकी पूर्वाधारतर्फ ६० प्रतिशत काम सकिएको सिद्धार्थ केबलकारका अध्यक्ष राजेन्द्रसिंह गुरुङले जानकारी दिए ।

निर्माण सकिएपछि परीक्षण सञ्चालन गर्ने र तिहारपछि औपचारिक रुपमा सञ्चालन गर्ने तयारी भइरहेको उनले बताए । ‘दसैं र तिहारको बीचमा ट्रायल गर्ने हाम्रो योजना छ । गोण्डलाहरू चलाएर सुरक्षाको मापदण्ड लगायतका कुराहरू परीक्षण गरेपछि बल्ल पब्लिकमा जाने हो,’ गुरुङले भने, ‘सायद तिहारपछि सञ्चालनमा आउन सक्छ ।’

यसअघि बुटवलबाट बसन्तुपुर जोड्ने गरी लुम्बिनी केबलकार सञ्चालनमा आएको छ । सिद्धार्थ केबलकार प्रा लि ले पनि एक अर्बको लागतमा केबलकार निर्माण गरिरहेको छ । देउराली डाँडाबाट पाल्पाको ऐतिहासिक स्थल नुवाकोटसम्म केबलकारको दुरी २ किलोमिटर छ । केबलकार यात्राको ५ सय मिटर जंगलको बीच हुँदै यात्रा हुन्छ । बाँकी डेढ किलोमिटरको यात्रामा बुटवलसहित परपरसम्म दृष्यावलोकन गर्ने सकिने अध्यक्ष गुरुङले बताए ।

‘सुरूवातमा जंगलका चराचुरुगी र प्रकृती देखाउन हामीले टावरलाई होचों राखेका छौं,’ उनले भने, ‘पाँच सय मिटरको यात्रापछि पूरै बुटवलको दृष्य देखिन्छ । त्यसपछि भैरहवा र परासीसम्म दृष्यावलोकन गर्न सकिन्छ ।’

नुवाकोट ऐतिहासिक तथा धार्मिक पर्यटकीय स्थल हो । नुवाकोट विगतमा राजा मणिमुकुन्द सेनको गृष्मकालीन दरबार रहेको ठाउँ हो । यही ठाउँमा बसेर कर्णेल उजिर सिंह नेतृत्वको सेनाले अंग्रेजलाई परास्त गर्न अद्वितीय युद्ध रणनीतिहरू प्रयोग गरेका थिए । यस्तै भैरव मन्दिर तोपहान क्षेत्र, खरखजनाघर, रानीकुवा जस्ता ऐतिहासिक सम्पदाहरू नुवाकोटमा छन् ।

केबलकारको बटम स्टसन र टप स्टेसनमा अरु पूर्वाधारहरू पनि बनिरहेको सञ्चालक अनुपमान सैजुले जानकारी दिए । उनका अनुसार सातवटा कमलको फूल आकृतिको लोट्स पार्क पनि बन्ने छ । जसमध्ये ६ वटा बटम स्टेसनमा हुनेछन् । बाँकी एउटा टप स्टेसनमा रहने छ । टप स्टेसनको कमलको फूलको आकृतिमाथि ५० फिट अग्लो बुद्धको मूर्ति बनाइने छ । त्यसबाहेक ढुंगेधारा, रेष्टुरेन्ट लगायतका संरचना बन्नेछन् ।

प्रकाशित मिति: शनिबार, भदौ ९, २०८० १८:०८