जन्मिदाजन्मिदै सम्पूर्ण परिवार गुमाएकी बच्ची, जसलाई भनियाे 'चमत्कारी'

A+ A A-

आजभन्दा करिब ६ महिनाअघि टर्की र सिरियामा विनाशकारी भूकम्पले हजारौँ मानिसको ज्यान लियो । तर, सिरियाको जिन्देरिस शहरमा भूकम्पले ढालेको भवनको भग्नावशेषबाट एक नवजात बच्चीलाई जीवितै उद्धार गरिएको थियो । यी बच्चीलाई जिउँदै निकालिएको भिडियो हेर्नेहरूले यसलाई कुनै चमत्कारभन्दा कम मानेनन् ।

अहिले बच्ची ६ महिनाकी भइसकेकी छन् । उनको नाम आफरा राखिएको छ र उनी जिन्देरिस शहरमै आफन्तको रेखदेखमा छिन् ।

बच्चीका काका खलिल अल-सवादीले भने, ‘उनी निकै सानी छिन् तर उनकाे मुस्कानले मलाई उनकै बुबा र दिदीको याद दिलाउँछ । उनीहरू हाम्रोमा आउजाउ गरिरहन्थे । बच्चीका कारण हामीलाई कुनै अप्ठेरो पनि छैन ।’

कसरी बचिन् आफरा ?

६ फेब्रुअरीमा जिन्देरिसमा विनाशकारी भूकम्प गएको थियो । त्यसको केही बेरपछि नै आफराकी आमालाई सुत्केरी व्यथाले च्याप्यो । उनले आफ्नो घरको कोठामा बच्चीलाई जन्म दिइन् ।

विनाशकारी भूकम्पमा बाँचेकी आफरा परिवारबाट एक्ली सदस्य हुन् । उनका बुबा अबु रुदैना र उनका अन्य चार दाजु र दिदी दुर्घटनाबाट बच्न सकेनन् ।

खलिल भन्छन्, ‘अबु रुदैनाको घर ध्वास्त भएको थियो । मेरी श्रीमती कराइरहेकी थिइन्– मेरो दाइ, मेरो दाइ ।’

खलिलले अहिले पनि त्यो क्षण भुलेका छैनन्, जतिबेला उनले आफरालाई भग्नावशेषबाट बाहिर निकालेका थिए । उनी भन्छन्, ‘उनीमाथि छत खसेको थियो । कसैले मलाई बोलाएर एक महिलाको शव भेटिएको भन्याे । पुग्नासाथै मैले भग्नावशेष हटाउन सुरु गरेँ, त्यही बेला मैले एक आवाज सुनेँ । त्यो आवाज थियो आफराको । उनी आफ्नी आमाको गर्भनालबाट छुट्टिएकै थिइनन् । उनलाई बचाउन सकिने लाग्यो मलाई । मलाई थाहा थियो, अब ऊ परिवारकै अन्तिम सम्झना हो ।’

यो उद्धार अभियानको एक नाटकीय भिडियो सामाजिक सञ्जालमा पोस्ट गर्नासाथै भाइरल बन्यो । बच्चीलाई अस्पताल लगियो । अरबीमा आरफाको अर्थ चमत्कार भन्ने हुन्छ ।

उपचारमा संलग्न डाक्टरका अनुसार, बच्चीमाथि मोटो चोट लागेको थियो, त्यस बेला उनी मुस्किलले सास फेर्न सकिरहेकी थिइन् । ६ महिनापछि उनको चोटको निशान पनि हराइसकेको छ ।

खलिल भन्छन्, ‘भूकम्पलगत्तै भग्नावशेषको धुलो आदिका कारण उनको छातीमा समस्या थियो । तर, अहिले उनको स्वास्थ्य ठीक छ ।’

यो ६ महिना कठिन नै रह्यो । आफरा अस्पतालमा हुँदा संसारका हजारौँ मानिस उनलाई धर्मपुत्री बनाउने प्रस्ताव गरिरहेका थिए । तर, खलिल र उनकी श्रीमती हालाचाहिँ आफूहरू आफराको सच्चा नातेदार भएको साबित गर्न चाहन्थे ।

खलिल भन्छन्, ‘उनीहरू हामीलाई आफरा दिन चाहँदैनन् कि जस्ताे लागेकाे थियाे ।’

बच्ची लिनका लागि हालाको डीएनए परीक्षण गर्नुपरेको थियो । खलिल सम्झिन्छन्, ‘सुरुमा त रगतको मात्रै परीक्षण थियो । एक हप्तापछि फेरि बोलाइयो । उनीहरूले मेरी श्रीमतीको रगत र कपालको नमुना लिए । रिपोर्ट आउन १० दिन लाग्यो ।’

आफराको कथामा मानिसहरूले यति रुचि देखाएका थिए कि, डीएनए रिपोर्ट आउँदासम्म आफरालाई कसैले चोरेर लैजाने डर खलिल परिवारलाई थियो । त्यसैले अस्पतालमा उनीहरू धेरैबेर बस्न थाले र थप सावधानी अपनाउन थाले ।

‘प्रहरी र सेना दुवैले आफराको सुरक्षामा हामीलाई सहयोग गरे । तीमध्ये धेरैले आफराको कोठासँग सटेको कोठामा बसेर दिनरात नजर राखे,’ उनले भने ।

डीएनए परीक्षणमा हाला आफराकी आफ्नै फूपू रहेको पुष्टि भयो । यसपछि बच्चीलाई अस्पतालबाट डिस्चार्ज गरियो ।

आमाकै नाममा राखियो बच्चीको नाम

यसपछि खलिल र हालाले सबैभन्दा पहिलो कामका रूपमा बच्चीको नाम उनकै आमाको नाम ‘आफरा’ भनेर राखिदिए ।

खलिल भन्छन्, ‘उनी अब हाम्रै बच्चाहरूमध्ये एक हुन् । म उनलाई धेरै समयका लागि टाढा राख्न सक्दिनँ । ऊ ठूली भएपछि उसकी आमामाथि कस्तो आपत् आइलागेको थियो भनेर बताउनेछु । र, उसकी आमा, बुबा, दाइ र दिदीहरूको फोटो देखाउनेछु । हामीले उनीहरूकाे कर्म नजिकैको गाउँ हज इस्कन्दरमा गरेका छौँ । त्यहाँ सिभिल डिफेन्सले सामूहिक चिहान बनाएको थियो ।’

जुन बेला आफराकी आमा गर्भवती भइन्, त्यो समय हाला पनि गर्भवती हुनु संयोग थियो । आफरा जन्मेको तीन दिनपछि हालाले पनि एक बच्चीलाई जन्म दिइन् । हालाले आफ्नी छोरीको नाम भूकम्पमा मारिएकी अर्की आन्टीको नाममा ‘अता’ राखिन् ।

तर, जिन्देरिसमा उनीहरूको घर यति क्षत्‌विक्षत् भएको थियो कि त्यहाँ उनीहरू रोकिन सक्दैन थिए । खलिलका अनुसार, उनको घर र कार ध्वस्त भइसकेको थियो । अब फेरि सबै सुरुबाटै जोड्नुपर्ने जस्तो भएको थियो । बच्चालाई स्कुल पठाउन सक्ने अवस्थासमेत थिएन ।

उनीहरूले दुई महिनासम्म एक पालमा गुजारेको जिन्दगी निकै कठिन थियो । दुई/दुई नवजातको रेखदेख गर्नुपर्थ्यो । यद्यपि, आफ्नो परिवार राख्न खलिलले भाडामा एक नयाँ घर भेटे तर उनी त्यहाँ धेरै दिनसम्म बस्न सक्दैनथे । भन्छन्, ‘त्यो निकै महँगो थियो । त्यसैले थाहा थिएन, कहिलेसम्म बस्न सकिन्छ भनेर ।’

खलिलको होम टाउन भूकम्पबाट सर्वाधिक प्रभावित क्षेत्र थियो । र, हजारौँ मानिसको स्थिति उनकै जस्तो छ । संयुक्त राष्ट्र संघका अनुसार, सिरिया र टर्कीमा आएको उक्त भूकम्पबाट ५० हजार मानिस मारिए, जसमा उत्तर पश्चिमी सिरियामा ४५ सय मानिस मारिए भने ५० हजार परिवार घरबारविहीन बने ।

सिरियामा विद्रोहीको दबदबा रहेको उक्त क्षेत्रमा ४० लाख मानिससम्म राहत सामग्री पुर्‍याउनु निकै कठिन काम हो । देशमा १२ वर्षसम्म चलेको गृहयुद्धले पहिल्यै यहाँका मानिसलाई संकटमा घँचेटिसकेको छ । (बीबीसीकाे सहयाेगमा)

प्रकाशित मिति: शनिबार, भदौ ९, २०८० १०:०५