के मेस्सीलाई महान् बनाउनकै लागि अमेरिकी खेलहरूमा ‘म्याच फिक्सिङ’ भइरहेको छ ? (भिडियो)

के मेस्सीलाई महान् बनाउनकै लागि अमेरिकी खेलहरूमा ‘म्याच फिक्सिङ’ भइरहेको छ ? (भिडियो)

A+ A A-

विश्व फुटबलका स्टार लियोनल मेस्सीलाई अनुबन्ध गरेयता इन्टर मायामी पूरै परिवर्तन भएको छ । अझ भनौँ मेस्सीकै क्लबमा जोर्डी अल्बा र सर्जियो बुस्केट्सजस्ता स्टार खेलाडी साथै अर्जेन्टिनाकै कोच टाटा मार्टिनो अनुबन्ध भएसँगै टोली अझ बलियो र सशक्त बनेको छ ।

अर्जेन्टिनाकै प्रशिक्षक र बार्सिलोनामा छँदाका साथीहरूसँग मेस्सी अहिले मायामीमा निकै खुसी छन् । उनीहरूले नै इन्टर मायामीलाई पहिलो पटक लिग्स् कपको उपाधि जिताउन ठूलो भूमिका खेले ।

तर, यो उपाधि जितेसँगै र मायामीको हरेक जितसँगै यतिबेला इन्टर मायामीले म्याच फिक्सिङ गरेर खेलहरू जितेको भन्दै आरोपहरू खेप्नुपरेको छ । त्यसो त गतवर्ष विश्वकप जित्दा पनि मेस्सीलाई यस्तै आरोप लागेको थियो । मेस्सीलाई महान फुटबलरको रूपमा देखाउनकै लागि भए पनि विश्वकप अर्जेन्टिनालाई जिताइएको तर्क अझै प्रस्तुत गरिन्छ । कैयौँ मानिसहरू मेस्सीको अर्जेन्टिनाले विश्वकप जितेको नभएर फिफाले नै अर्जेन्टिनालाई विश्वकप जिताएको आरोप लगाउँछन् ।

यतिबेला अमेरिकामा उत्कृष्ट प्रदर्शन गरिरहेका मेस्सी र उनी आबद्ध इन्टर मायामीलाई म्याच–फिक्सिङको आरोप लागिरहँदा मायामीका लगानीकर्ता पूर्व स्टार फुटबलर डेबिड बेकहमले यो सबै तथ्यहिन आरोपहरू भएको भन्दै मेस्सी र मायामीको बचाउ गरेका छन् ।

बेकहम भन्छन्,‘हरेक पटक मेस्सीले गोल गर्दा, हरेक पटक बुस्केट्सले पास दिँदा र हरेक पटक जोर्डी अल्बा दौडँदा, मानिसहरू भन्छन् कि म्याच फिक्सिङ भएको छ, मायामीकाे जित तय गरिएको छ ।’

बेकहम थप भन्छन्,‘मलाई लाग्छ यस्ता आरोपहरू कुनै पनि उत्कृष्ट खेलाडीलाई दिने सबैभन्दा ठूलो प्रशंसा हो किनभने यस्ता खेलाडीहरूले खेलेको हेर्नु चलचित्र हेरैजस्तै लाग्छ ।’

मायामीले पछिल्लो दुई खेल पेनाल्टीमा जितेको छ । बिहीबार बिहान सिन्सिनाटीसँग २–० ले पछि परेको अवस्थामा मेस्सीकै दुई पासमा लियोनार्दो क्याम्पनाले गोल गर्दै खेल बराबरीमा फर्काएका थिए । हार्नुपर्ने खेलमा मायामीले जितेको भन्दै मायामी जिताउन नाटक रचिएको र मेस्सीलाई महान बनाउन खोजिएको टिप्पणी भइरहेका छन् ।

विश्वकप, बालुन डि’ओर, गोल्डेन बुट, च्याम्पियन्स लिग, कोपा अमेरिका, ला लिगाजस्ता फुटबलमा पाउनुपर्ने सबै उपाधि पाइसकेका मेस्सीलाई सबै समयका महान खेलाडीको रुपमा पनि चिन्ने गरिन्छ । तर कयौं मानिसहरुले मेस्सीको आलोचना गरिरहँदा डेभिड बेकहमले प्रतिवाद गरेका हुन् ।