प्रचण्डकाे उद्‍घाटनमाेह, ८ महिनामै भ्याए १०० सभा सम्मेलन

A+ A A-

२ भदौको साँझ गोदावरीको सनराइज सभा हल सांगीतिक माहौलले उत्सवमय थियो । एक टेलिभिजन ‘रियालिटी शो’ले दिउँसैदेखि सांगीतिक बनाएको सभा हलमा जब प्रधानमन्त्री पुष्पकमल दाहाल प्रचण्ड प्रवेश गरे, माहौल थप तातियो । ५ बजे प्रचण्ड ‘रियालिटी शो’ मा प्रमुख अतिथि बनेर सभा हलमा पुग्दा सभामुख देवराज घिमिरे विशिष्ट अतिथिको सिटमा पुग्दै थिए ।

टेलिभिजन कार्यक्रम ‘मेरो डान्स युनिर्भस’ को प्रमुख अतिथि बनेर साँझ ५ बजे गोदावरी पुगेका प्रधानमन्त्री प्रचण्ड राति १० बजे फर्किए निवासमा बालुवाटार । अर्थात् ‘फुर्सदिला’ प्रचण्डले ५ घण्टा बसेर पुरस्कार वितरण गरेकाे त्यस दिनको समय हेर्दा लाग्छ– प्रधानमन्त्री कति फुर्सदिला छन् ।

तर, परिस्थिति त्यस्तो पनि थिएन । प्रमुख प्रतिपक्षी एमालेले संसद अवरोध गरेको महिना पुग्न थालेको थियो । संसद अवरोध खुलाउन भएका ‘म्याराथन बैठक’ निष्कर्षविहीन भइरहेका थिए । प्रधानमन्त्री स्वयम् एमालेलाई सम्झाइदिन राष्ट्रपति रामचन्द्र पौडेल गुहार्न पुगेका थिए । राजनीतिक गञ्जागोलको त्यो समयमा प्रधानमन्त्री कार्यालय भने हाई काढेर बसिरहेको छ भन्ने तथ्य पनि २ भदौकै परिघटनाले बताउँथ्यो ।

भदौका २ दिनमै मात्र प्रचण्ड सहभागी भएको चौथो कार्यक्रम थियो भने २ भदौकै पनि दोस्रो कार्यक्रम थियो । भदौका ४ दिनमा छवटा कार्यक्रममा पुगेर घण्टौँ बिताएका प्रचण्डलाई ३० पुस २०७९ को उनकै अभिव्यक्तिले भने गिज्याइरहेको छ ।

तेस्रोपटक प्रधानमन्त्री बनेको २० दिनपछि ३० पुसमा सम्पादकहरूसँग प्रचण्डले भनेका थिए, ‘प्रधानमन्त्रीलाई उद्घाटनमा नबोलाइदिए हुन्थ्यो, त्यसका लागि तपाईंहरूले पनि लेखेर माहौल बनाइदिनुपर्‍यो । उद्घाटनमा समय खर्चिंदा सरकार चलाउनै समस्या भयो ।’

प्रचण्डको भनाइ थियो, 'अबको काम सुशासन कायम गर्ने, राज्यसंयन्त्रभित्रका विकृति र बेथितिको अन्त्य तथा भ्रष्टाचारको छानबिन गर्ने हो ।' तर, विगत ८ महिनाका हरेक दिन केलाउँदा प्रचण्ड देश चलाउन स्टेरिङ चलाइरहेका छैनन्, उनी ‘उद्घाटन मन्त्री’ जस्ता भएका छन् । सिंहदरबारको प्रधानमन्त्री तथा मन्त्रिपरिषद्को कार्यालयमा बिताउने समयभन्दा धेरै एउटा उद्घाटनको कार्यक्रममा बिताइदिन्छन् ।

प्रधानमन्त्री प्रचण्डले १० पुसदेखि ४ भदौसम्म १ सयभन्दा धेरै कार्यक्रमको उद्घाटन गरेका छन् ।

कार्यकारी प्रधानमन्त्री क्याप्टेन हो, जसले राज्यका सबै काम कारबाहीको नियमन गर्नुपर्छ । अल्पकालीन र दीर्घकालीन गरेर योजनाबद्ध तरिकाले काम गर्नुपर्ने हुन्छ । जब दिनदिनै प्रधानमन्त्री नै उद्घाटन गर्न गएपछि मोनिटरिङ कमजोर हुन्छ ।

नेपालमा भनेअनुसारको, आफ्नै घोषणापत्रअनुसारको काम कुनै पनि प्रधानमन्त्रीले नगर्ने प्रचलन भएकाले सस्तो काम उद्घाटन र भाषण भएको राजनीतिक विश्लेषक हरि रोका बताउँछन् । उनले भने, ‘प्रधानमन्त्रीले आफूले प्रतिबद्धता जनाएको घोषणापत्रअनुसार काम गर्नुपर्छ । गठबन्धनको सरकार भए त्यही गठबन्धनले तयार पारेको नीति तथा कार्यक्रमअनुसार काम गर्नुपर्छ । सरकारले गर्ने कामका एजेन्डाहरू हुन्छन् । ती योजनाअनुसार काम गर्नुपर्छ । दीर्घकालीन र अल्पकालीन योजना नै बनाएका छैनन् । ती कुरा नभएपछि यहाँ केही लागू गर्नु पर्दैन । अनि जे पायो त्यही उद्घाटन गर्न हिँड्छन् ।’

प्रधानमन्त्री कि उद्घाटन मन्त्री ?

१ भदौमा नेपाल विद्युत् प्राधिकरणको ३८औँ वार्षिकोत्सव समारोह उद्घाटन गरेका प्रचण्ड त्यही दिन मुलुकी संहिता दिवस, २०८० को उद्घाटन गर्न पुगेका थिए । प्राधिकरणको कार्यक्रममा पुगेका उनले चीन भ्रमणका क्रममा ट्रान्समिसन लाइनमा सम्झौता हुने बताएका थिए भने साँझ मुलुकी संहिता संशोधन गर्न सकिने बताएका थिए ।

अर्थात्, जुन कार्यक्रममा गयो, माहौलअनुसार अभिव्यक्ति दिने गरेका छन् । कतिसम्म भने प्रधानमन्त्री प्रचण्डले थारू समुदायको एक कार्यक्रममा पुगेर लाल आयोगको प्रतिवेदन सार्वजनिक गर्नुपर्ने मत पनि बताए । जबकि प्रधानमन्त्री आफैँ रहेका प्रचण्डलाई उक्त प्रतिवेदन सार्वजनिक नगर्न केले रोकेको छ र मत रहेको भन्दै भाषण गरेका हुन् ? भन्ने प्रश्न पनि उठेका छन् ।

२ भदौमा पार्टी केन्द्रीय कार्यालय पेरिसडाँडामा आयोजित शहीद रामवृक्ष यादवको २९औँ स्मृति दिवस समारोहका प्रमुख अतिथि बनेका प्रचण्ड ३ गते १७औँ राष्ट्रिय सूचना दिवस समारोहको उद्घाटन तथा समारोहलाई सम्बोधन गर्न पुगे ।

४ गते प्रधानमन्त्रीले कर्णाली प्रदेशको राजधानी सुर्खेत पुगेर कर्णाली प्रदेश स्थापना तथा शहीद दिवस कार्यक्रमको उद्घाटन गरे । यी चार दिनमा उनले नियमित कार्यक्रमको उद्घाटन र सम्बोधन गरेका छन् ।

गिज्याउने आफ्नै भनाइ

२९ पुसमा प्रधानमन्त्री प्रचण्डले नेपाल हस्तकला महासंघको वार्षिक साधारणसभामा योपटक भाषण कम, काम धेरै गरेर देखाउने प्रतिबद्धता जनाएका थिए । उनले भनेका थिए, ‘आफ्नो कार्यकाललाई योपटक ठूलो परीक्षाको रूपमा लिएको छु । भाषण कम गर्छु । धेरै राम्रो काम गरेर देखाउँछु । लोकतन्त्र घोषणा भयो तर जनताको जीवनस्तरमा परिवर्तन देखिएन ।’

त्यही दिन प्रधानमन्त्री प्रचण्डले अब नेपालको आर्थिक विकासले गति लिने, सुशासनको जग बस्ने र राजनीतिक परिर्वतन अब आर्थिक विकासका परिणत हुने भनेका थिए ।

भाषण कम काम धेरै गर्ने भने पनि प्रधानमन्त्री प्रचण्डले भाषण नगरेको दिन छैन । उनी उद्घाटन गर्न कोशी प्रदेशदेखि सुदूरपश्चिमको खप्तडसम्म पुगेकै छन् । राष्ट्रिय गौरवका आयोजनाको, ठूलाठूला आयोजनाको उद्घाटनमा जानु त ठीकै पनि होला तर उनी उद्योग वाणिज्य संघका कार्यक्रमदेखि गाउँपालिका भवन, विद्यालयका भवन उद्घाटन गर्नसम्म भ्याइरहेका छन् ।

जबकि प्रधानमन्त्रीले त सरकारका दैनिक कामहरूमा बढी चासो र चिन्ता जनाउनुपर्ने हो । १९ साउनमा प्रधानमन्त्री प्रचण्डले प्रधानमन्त्री कार्यालयलाई स्मार्ट र सेन्टर अफ एक्सिलेन्सको रूपमा विकास गर्नुपर्ने बताएका थिए ।

प्रधानमन्त्री तथा मन्त्रिपरिषद्‌को कार्यालय सिंहदरबारमा आयोजित मन्त्रालयस्तरीय समस्या समाधान समितिको बैठकमा उनले प्रधानमन्त्री तथा मन्त्रिपरिषद्‌को कार्यालय देशको सर्वोच्च कार्यकारी कार्यालय हो भन्दै यहाँबाट हुने कार्यसम्पादनको प्रतिबिम्बले सिङ्गो देशको कार्यप्रगति र सरकारको प्रतिबिम्ब झल्किने बताएका थिए । उनले अहिलेसम्म हामीले केही विषयमा परिणाम निकाले पनि धेरै विषयमा हामी नतिजामुखी हुन नसक्दा हामीमाथि जनस्तरबाट प्रश्न उठ्ने गरेकाे स्वीकारेका थिए ।

उनले भनेका थिए, ‘प्रधानमन्त्री कार्यालय जगेडा कर्मचारी थन्क्याउने थलो भनेर जसरी बिम्ब स्थापना गर्न खोजिएको छ, त्यसलाई चिर्न पनि जरुरी छ । यसबीच हामीले गरेका कैयौँ निर्णय तथा निर्देशनहरू अझै प्रभावकारी कार्यान्वयन हुन सकेका छैनन् । यसरी निर्णय हुने तर कार्यान्वयन नहुने परिपाटीबाट हामी मुक्त हुने कि नहुने यो विषय नै आजको मुख्य प्रश्न बनेर हाम्रासामु खडा छ ।’

सिंहदरबार जान्नन् अनि काम भएन भन्छन्

प्रधानमन्त्री तथा मन्त्रिपरिषद्‌को कार्यालय सिंहदरबारमा आयोजित मन्त्रालयस्तरीय समस्या समाधान समितिको बैठकमा बोल्दै प्रचण्डले भनेका थिए, ‘अहिले म प्रधानमन्त्री भएर आएको ७ महिना बितिसकेको छ । प्रधानमन्त्री तथा मन्त्रिपरिषद्‌को कार्यालय देशको सर्वोच्च कार्यकारी कार्यालय हो । यहाँबाट हुने कार्यसम्पादनको प्रतिबिम्बले सिङ्गो देशको कार्यप्रगति र सरकारको प्रतिबिम्ब झल्किन्छ । त्यसैले हामी स्मार्ट र सेन्टर अफ एक्सिलेन्सको रूपमा विकास हुन जरुरी रहेको छ ।’

अहिले प्रधानमन्त्री कार्यालयले नै नतिजा निकाल्न नसकेको प्रधानमन्त्री स्वयम्‌ले स्वीकारेका छन् । तर, यो नतिजा निकाल्न नसक्नुमा कसको दोष हो ? प्रधानमन्त्रीले उत्तर दिएका छैनन् । समय दिनुपर्ने ठाउँमा समय दिन नसक्दा प्रधानमन्त्री कार्यालयले परिणाम भनेजस्तो दिन नसकेको हुन सक्छ । प्रधानमन्त्री दिनदिनै उद्घाटन र भाषणमा व्यस्त भएपछि कसरी हुन्छ, देशको कार्यनिकायको काम परिणाममुखी ?

प्रधानमन्त्री आफैँ प्रधानमन्त्री कार्यालय सिंहदरबारमा धेरै समय बिताउँदैनन् । बाहिरबाहिर उद्घाटन गर्न र प्रमुख अतिथि हुने कार्यक्रममा गइरहन्छन् । केही कार्यक्रम त बालुवाटारमा नै आयोजना हुने गरेका छन् । प्रधानमन्त्रीलाई बोलाएपछि विद्यालयका भवन उद्घाटनदेखि क्याम्पसको भवन उद्घाटन पनि गर्दै आएका छन् ।

११ असारमा प्रचण्ड धादिङको गजुरीमा आदर्श बहुमुखी क्याम्पसको भवन उद्घाटन गर्न पुगे । त्यहाँ आफूले नेतृत्व गरेको सरकारको आयु पाँच वर्ष नै हुने र यही गठबन्धनको नेतृत्वमा देश विकासको युगतर्फ जाने दाबी गरे । असार १५ गते कास्की पोखरामा अन्तर प्रदेश मुख्यमन्त्री बैठकको समापन समारोहमा प्रमुख अतिथि बने ।

त्यही दिन प्रचण्डले पोखरामा नै कास्कीको अन्नपूर्ण गाउँपालिका वडा नं २ का स्थानीय जनतासँग अन्तर्क्रिया गरेका थिए । स्थानीय जनतासँगको अन्तर्क्रियामा उनले गाउँको अवस्था, खेतीबाली, मौसमलगायतका विषयमा सोधखोज गरेका थिए ।

सो अवसरमा प्रधानमन्त्रीले अन्नपूर्ण–२ का साथै हेम्जाका स्थानीयहरूसँग समेत अन्तर्क्रिया गरेका थिए । जुन प्रधानमन्त्रीको पार्टीको जनमत बढाउने अभियान पनि हो । सरकार चलाउनु र पार्टीको पक्षमा जनमत बढाउनु प्रधानमन्त्रीको काम देखिन्छ ।

कहिले, कहाँ के गरे ?

४ भदौमा भरतपुर चितवनमा २२०/१३२ किलोभोल्ट (केभी) सबस्टेसन र हेटौँडा–भरतपुर–बर्दघाट २२० केभी डबल सर्किट प्रसारण लाइनको उद्घाटन ।
३ भदौमा कर्णाली प्रदेश स्थापना तथा शहीद दिवस कार्यक्रमको सुर्खेतमा उद्घाटन ।
२ भदौमा १७औँ राष्ट्रिय सूचना दिवसका अवसरमा कार्यक्रमका प्रमुख अतिथि र कार्यक्रमको उद्घाटन ।
२ भदौमा नै पार्टी केन्द्रीय कार्यालय पेरिसडाँडा शहीद रामवृक्ष यादवको २९औँ स्मृति दिवस समारोह उद्घाटन ।
१ भदौमा मुलुकी संहिता दिवस, २०८० का अवसरमा सम्माननीय प्रमुख अतिथि ।
१ भदौमा नै नेपाल विद्युत् प्राधिकरणको ३८औँ वार्षिकोत्सव समारोहको उद्घाटन तथा प्रमुख अतिथि ।
३२ साउनमा रामेछापको दोरम्बामा जनयुद्धको समयमा सामूहिक हत्या गरेका कलाकारहरूको २०औँ दोरम्बा हत्याकाण्ड स्मृति दिवस तथा श्रद्धाञ्जलीसभालाई सम्बोधन गरे ।
३० साउनमा अनौपचारिक क्षेत्रमा रहेका श्रमिक तथा स्वरोजगारमा रहेका व्यक्तिको सामाजिक सुरक्षा योजनाको शुभारम्भ कार्यक्रम समारोहको उद्घाटन काठमाडौंमा ।
२९ गते साउनमा माओवादी केन्द्रको बागमती प्रदेश कमिटीको बैठक उद्घाटन तथा प्रमुख अतिथि बने ।
२४ गते साउनमा २९औँ आदिवासी दिवसका अवसरमा आयोजित कार्यक्रमको उद्घाटन ।
१९ गते साउनमा प्रधानमन्त्रीले आफ्नो कार्यालयमा नै बसेर छलफल गरेका थिए । प्रधानमन्त्री कार्यालयलाई सेन्टर अफ एक्सिलेन्सको रूपमा विकास गर्ने बताएका थिए ।
१७ गते साउनमा माओवादी केन्द्रको चौथो पूर्ण बैठकको उद्घाटन गरेका थिए ।
१४ गते साउनमा गोरखाका वाम बुद्धिजीवी माधव मरहट्ठाको जीवनीमा आधारित ‘माधव सर’ पुस्तकको लोकार्पण कार्यक्रममा प्रमुख अतिथि बने ।
१४ गते साउनमा नै समाजवादी मोर्चा सम्लिती विद्यार्थी संगठनहरूको समाजवादी मोर्चा विद्यार्थी संगठनको कार्यक्रमको प्रमुख अतिथि बने ।
२५ गते असारमा प्रधानमन्त्री पुष्पकमल दाहाल ‘प्रचण्ड’ले पुष्पलाल प्रतिष्ठानद्वारा आयोजित पुष्पलाल राष्ट्रिय पुरस्कार २०७९ समर्पण समारोहलाई सम्बोधन गरे ।
२२ असारमा जनतासँग प्रत्यक्ष जोडिने कर्मचारीहरूलाई प्रशासक होइन, जनसेवक भएर काम गर्न निर्देशन दिए ।
२२ असारमा नै पोखरा स्वास्थ्य विज्ञान प्रतिष्ठानको छैटौँ सभा बैठकलाई सम्बोधन गरे ।
२० असारमा अखिल नेपाल महिला संघ (क्रान्तिकारी) प्रथम राष्ट्रिय युवा भेला काठमाडौंमा सम्बोधन गरे ।
२० असारमा काठमाडौंको कीर्तिपुरमा अखिल क्रान्तिकारी स्ववियु काउन्सिलको राष्ट्रिय भेलालाई सम्बोधन गरे ।
१८ असारमा गिरिजाप्रसाद कोइराला मेमोरियल कलेजको १२औँ वार्षिक उत्सव तथा गिरिजाप्रसाद कोइरालाको सतवार्षिकी समारोहलाई सम्बोधन गरे ।
१७ असारमा स्व. प्रकाश दाहाल स्मृति तेस्रो राष्ट्रिय खुल्ला महिला तथा पुरुष बक्सिङ प्रतियोगिताको उद्घाटन गरे ।
१७ असारमा पुनः प्रधानमन्त्रीले देश र जनतालाई साक्षी राखेर इतिहासले सम्झिने काम गर्ने भाषण गरे । इन्ट्रा नेसनल वेलफेयर एण्ड सपोर्ट फाउन्डेसनद्वारा आयोजित विश्वभरिका नेपाली प्रतिभाहरूसँगको भेटघाटमा उक्त कुरा बताए ।
१७ असारमा भक्तपुरमा नारायणविलास जोशीको ३४औँ स्मृति दिवसको सन्दर्भमा आयोजित स्मृति प्रतिष्ठान भवनको उद्घाटन गरे ।
१६ असारमा कास्की पोखरा पुगेर पार्टीका उपलब्ध केन्द्रीय सदस्यहरूसँग छलफल गरे ।
१५ असारमा पोखरामा अन्तरप्रदेश मुख्यमन्त्री बैठकको समापनसत्रलाई सम्बोधन गरे ।
९ असारमा काठमाडौंस्थित नेपाल प्रज्ञा प्रतिष्ठानको ६६औँ वार्षिक उत्सवको उद्घाटन गरे । प्रमुख अतिथि बने ।
८ असारमा नेपाल उद्योग परिसंघको २०औँ वार्षिक साधारणसभा बानेश्वर, काठमाडौंमा उद्घाटन गरे ।
असार ८ गते नै ह्वा–वे एमएनसी डिजिटल नेपाल कन्क्लेभ २०२३ का प्रमुख अतिथि बने । कार्यक्रमको उद्घाटन गरे ।
६ असारमा अन्तर्राष्ट्रिय योग दिवस २०८० को समारोहमा पनि प्रमुख अतिथि बने ।
४ असारमा चारवटा पार्टी मिलेर बनेको समाजवादी मोर्चाको घोषणासभामा सहभागी बने ।
४ असारमा नै बाढीपहिरो प्रभावित क्षेत्रको अवलोकन गर्न प्रधानमन्त्री प्रचण्ड संखुवासभाको तुम्लिङ्टार गए ।
२ असारमा मेलम्ची खानेपानी आयोजनाबारे स्थलगत अवलोकनका क्रममा हेलम्बु गाउँपालिका–१, अम्बाथानस्थित परियोजना मुहान तथा बाँधको निरीक्षण गरे ।
१ असारमा भूमे पर्वको अवसरमा नेपाल मगर संंघद्वारा खुल्लामञ्चमा आयोजित सभालाई सम्बोधन गरे ।
असारमा १९ वटा कार्यक्रमको उद्घाटन र निरीक्षण ।
३१ जेठ मा दैलेखमा ग्यास उत्खननको निरक्षण गरे ।
३१ जेठ दाङमा माओवादी केन्द्रको जिल्ला समन्वय समितिद्वारा आयोजित अगुवा कार्यकर्ता भेलालाई सम्बोधन गरे ।
३१ जेठमा पूर्वशिक्षामन्त्री एवं नेकपा (माओवादी केन्द्र) का दिवङ्गत नेता डीआर पौडेलको चौथो स्मृति दिवस समारोहलाई सम्बोधन गरे ।
२७ जेठमा नुवाकोटको लाँकुरी भञ्ज्याङस्थित पञ्चकन्या गाउँपालिकाको प्रशासनिक भवनको उद्घाटन गरे ।
२७ जेठमा नेपाल अर्केष्ट्राको उद्घाटन गरे । प्रधानमन्त्री पुष्पकमल दाहाल ‘प्रचण्ड’ले काठमाडौं महानगरपालिका सम्पदा तथा पर्यटन समिति र ज्यापू महागुथीद्वारा संयुक्त रूपमा आयोजित नेपाल अर्केष्ट्रा–११४३ उद्घाटन गरे ।
२६ जेठमा प्रधानमन्त्रीद्वारा पशुपति क्षेत्रको निरीक्षण अवलोकन अवलोकन गरे ।
२६ जेठमा नै प्रधानमन्त्री प्रचण्डले काठमाडौंमा आयोजित रिटर्नी सेन्टर नेपालको प्रथम राष्ट्रिय भेलाको उद्घाटन गरे ।
२५ जेठमा लुम्बिनी केबलकारको उद्घाटन समारोहमा सहभागी हुन बुटवल पुगे । लुम्बिनी केबलकारका अध्यक्ष चन्द्रप्रसाद ढकाल हुन् ।
२४ जेठमा पहिलो खप्तड अन्तर्राष्ट्रिय अध्यात्मिक सम्मेलनको उद्घाटन गरे । उनी उद्घाटन गर्न खप्तड क्षेत्र पुगेका थिए । उक्त सम्मेलनमा भारतबाट योग गुरु रामदेव र कृष्ण आचार्य पनि सहभागी थिए ।
६ जेठमा कान्तिपुर मिडियाद्वारा राजधानीमा आज आयोजित हाफ म्याराथनको उद्घाटन गरे ।
२७ वैशाखमा दिवंगत वामपन्थी नेता निर्मल लामाको २३औँ स्मृति दिवसको उद्घाटन ।
२६ वैशाखमा काभ्रे जिल्लाको महाभारत गाउँपालिकामा सडक तथा ग्रामीण विद्युतीकरण कार्यक्रमको शिलान्यास गरे ।
२२ वैशाखमा २५६७औँ बुद्ध जयन्ती तथा लुम्बिनी दिवसको लुम्बिनीमा उद्घाटन ।
१८ वैशाखमा सोमबार बिहान मौलाकालिका केबलकार प्रालिद्वारा निर्मित मौलाकालिका केबलकारको उद्घाटन गरे ।
११ वैशाखमा काठमाडौंको कमलादीमा अखिल नेपाल ट्रेड युनियन महासंघको आठौँ राष्ट्रिय महाधिवेशन उद्घाटन र सम्बोधन गरे ।
१० वैशाखमा नेपाल कम्युनिस्ट पार्टी स्थापना दिवसको अवसरमा राजधानीमा नेकपा (एकीकृत समाजवादी)द्वारा आज आयोजित ‘नेपाली कम्युनिस्ट आन्दोलनः उपलब्धि, चुनौती र संभावना’ विषयक विचार गोष्ठी कार्यक्रमलाई सम्बोधन गरे ।
९ वैशाखमा नरबहादुर कर्माचार्य स्मृति प्रतिष्ठानको दोस्रो वार्षिक केन्द्रीय सभालाई सम्बोधन ललितपुरमा सम्बोधन गरे ।
९ वैशाखमा गोकर्णमा बाह्रखरी मिडियाले आयोजना गरेको कर्पोरेट गल्फ तथा आर्थिक परिसंवाद कार्यक्रमलाई सम्बोधन गरे ।
६ वैशाखमा तनहुँको डुम्रे बजारमा क्षेत्र नं.–१ को सत्ता गठबन्धनको चुनावी सभालाई सम्बोधन गरे ।
४ वैशाखमा सिंहदरबारमा उद्योग–वाणिज्य प्रवर्द्धन संवाद परिषद्‌को बैठकलाई सम्बोधन गरे ।
२८ चैतमा राजधानीमा आयोजित नेपाल उद्योग वाणिज्य महासंघको ५७औँ वार्षिक साधारणसभा उद्घाटन गरे ।
२१ चैतमा प्रधानमन्त्री प्रचण्डले मन्त्रीपरिषदमा नै खादामालामा भुल्ने समय नभएकाले जनताको पक्षमा काम गर्न निर्देशन दिएका थिए । मन्त्रीहरूले अहिले नै बधाई लिने बेला नभएको बताएका थिए ।
१८ चैतमा प्रधानमन्त्री प्रचण्डले खेलकुद पूर्वाधार नीति संवाद २०७९ को उद्घाटन र सम्बोधन गरे ।
१७ चैतमा नेपाल राष्ट्रिय कर्मचारी संगठनको राष्ट्रिय सम्मेलनलाई उद्घाटन र सम्बोधन गरे ।
१७ चैतमा माओवादी केन्द्रको भ्रातृ संगठन अखिल नेपाल महिला संघ (क्रान्तिकारी) को केन्द्रीय समितिको बैठकलाई सम्बोधन गरे ।
१७ चैतमा भरतपुर विमानस्थलको नयाँ टर्मिनल भवन निर्माणको शिलान्यास तथा विमानस्थल विस्तार कार्यक्रमको उद्घाटन र सम्बोधन गरे ।
१५ चैतमा काठमाडौं महानगरपालिकाद्वारा आयोजित न्यायिक समितिको पहिलो राष्ट्रिय सम्मेलनको उद्घाटन र सम्बोधन गरे । यो सम्मेलन नेपालमा पहिलो पटक भएको थियो । जसमा देशभरिका ७५३ वटा स्थानीय तह जसमा महानगरपालिका, उपमहानगरपालिका, नगरपालिका र गाउँपालिकाका उपप्रमुख एवं उपाध्यक्षज्यूहरू सहभागी थिए ।
१३ चैतमा नेपाल पर्यटन तथा होटल व्यवस्थापन प्रतिष्ठान (नाथम)को स्वर्ण जयन्ती समारोहको उद्घाटन र सम्बोधन गरे ।
९ चैतमा सामुदायिक रेडियो प्रसारक संघ (अकोराब) को राष्ट्रिय सम्मेलनको उद्घाटन गरे ।
८ चैतमा वैदेशिक रोजगारीमा रहेका श्रमिकहरू तथा स्वरोजगारमा रहेका व्यक्तिहरूलाई सामाजिक सुरक्षा कोषका योजनाहरूमा आबद्ध गराउनेसम्बन्धी समारोहको प्रमुख अतिथि भएर उद्घाटन गरे ।
७ चैतमा नेकपा (माओवादी) केन्द्रको पाँचदिने पार्टी केन्द्रीय स्कुल पेरिसडाँडामा सुरुवात गरे ।
७ चैतमा अन्तर्राष्ट्रिय जातीय भेदभाव उन्मूलन दिवसका उद्घाटन गरे ।
७ चैतमा गोरखाको हर्मीमा पन्थडिही–कटहरे–हर्मी–साहिलटार सडक स्तरोन्नति कार्यको शिलान्यास गरे ।
६ चैतमा प्रधानमन्त्री प्रचण्डले संसदमा विश्वासको मत लिए ।
३० फागुनमा नेपाल नगरपालिका सङ्घको ३०औँ वार्षिकोत्सवका उद्घाटन गरे ।
२९ फागुनमा एकीकृत अखिल नेपाल शिक्षक संगठन केन्द्रीय समितिको छैटौँ राष्ट्रिय महाविधेशन काठमाडौंमा उद्घाटन गरे ।
२९ फागुनमा काठमाडौंको पद्मोदय माध्यमिक विद्यालयको हीरक जयन्ती समारोहको उद्घाटन र सम्बोधन गरे ।
२८ फागुनमा काठमाडौंको प्रज्ञा भवनमा आयोजित नेपाल निर्माण व्यवसायी महासंघको २४औँ साधारणसभाको उद्घाटन र सम्बोधन गरे ।
२३ फागुनमा काठमाडौं सोलुखोला दुधकोशी जलविद्युत् परियोजनाको उद्घाटन गरे ।
२३ फागुनमा काठमाडौंको गोकर्णमा एसियन एथलेटिक्स एसोसिएसनको तत्वावधान तथा नेपाल एथलेटिक्स संघको आयोजनामा आयोजित १६औँ एसियन क्रस कन्ट्री च्याम्पियनसिपको उद्घाटन र सम्बोधन गरे ।
२१ फागुनमा काठमाडौंमा शहीद तथा बेपत्ता योद्धा सन्तति फाउन्डेसनले आयोजना गरेको अन्तर्क्रिया कार्यक्रममा सम्बोधन गरे ।
१९ फागुनमा काठमाडौंमा सातौँ अन्तर्राष्ट्रिय आयुर्वेद महासभाको उद्घाटन गरे ।
१८ फागुनमा नेपाली कांग्रेसका वरिष्ठ नेता रामचन्द्र पौडेललाई राष्ट्रपतिमा विजयी गराउने आठ दलका सांसदहरूको संयुक्त भेलालाई काठमाडौंमा सम्बोधन गरे ।
प्रधानमन्त्री प्रचण्डले पुस २६ गतेको प्रतिनिधिसभामा एमाले अध्यक्षद्वारा व्यक्त विचारले आफूहरूलाई सोच्न बाध्य बनाए बताए । २६ गते पुसमा ओलीले संसदमा आफूले गरेको संसद विघटन ठीक थियो भनेका थिए ।
१६ फागुनमा ललितपुरको च्यासल रङ्गशाला उद्घाटन गरे ।
१५ फागुनमा बालुटारबाटै गोरखाको विकास हाइड्रोको विद्युतीय माध्यमबाट उद्घाटन गरे ।
१४ फागुनमा जनयुद्धका शहीद तथा बेपत्ता योद्धाका परिवारहरूसँग अन्तर्क्रिया गरे । २०५२ साल फागुन १४ गते गोरखाका १४ वर्षीय दिलबहादुर रम्तेललाई प्रहरीले गोली हानी हत्या गरेको छ । माओवादीले त्यस दिनबाट शहीद सप्ताह मान्दै आएको छ ।
११ फागुनमा काठमाडौंको टुँडिखेलमा आयोजित राष्ट्रिय सेवा दलद्वारा सञ्चालित १७औँ ब्याच सिनियर डिभिजन तालिमको दीक्षान्त कवाजलाई सम्बोधन गरे ।
८ फागुनमा नेकपा माओवादी केन्द्रको गण्डकी प्रदेश समितिको छैटौँ पूर्ण बैठकको प्रमुख अतिथि बने र बैठकलाई सम्बोधन गरे ।
७ फागुनमा राष्ट्रिय समाचार समिति (रासस)को ६२औँ वार्षिकोत्सव समारोहलाई सम्बोधन गरे ।
१ फागुनमा कञ्चनपुरको महेन्द्रनगरमा सुरु भएको कञ्चनपुर उद्योग वाणिज्य संघद्वारा आयोजित सुदूरपश्चिम प्रदेशस्तरीय औद्योगिक व्यापार मेला तथा कञ्चनपुर पर्यटन महोत्सवको उद्घाटन गरे ।
१ फागुनमा कञ्चनपुरको दोधरा–चाँदनी नगरपालिकामा आयोजित कार्यक्रमलाई पनि सम्बोधन गरे ।
१ फागुनमा गोदावरी नगरपालिका–५ को गेटामा निर्माण भएको मेडिकल कलेजको स्थलगत अनुगमन निरीक्षण गरे ।
२३ माघमा महान्यायाधिवक्ता कार्यालयको अवलोकन तथा निरीक्षणका गर्नुका साथै सम्बोधन गरे ।
२२ माघमा आदिवासी जनजाति आयोगले काठमाडौंको भृकुटीमण्डपमा आयोजित वार्षिकोत्सवको उद्घाटन र आदिवासी जनजाति अध्ययन पुस्तकको लोकार्पण गरे ।
२० माघमा सिन्धुपाल्चोकको जुगल गाउँपालिका–५, चनौटेस्थित जनवादी गणतन्त्र चीनको सहयोगमा रत्नराज्य माध्यमिक विद्यालयको नवनिर्मित भवनको उद्घाटन गरे ।
१९ माघमा नेपाल ललितकला प्रज्ञा प्रतिष्ठानले नक्शालमा आयोजना गरेको गठबन्धन नामक चित्रकला तथा प्रतिकला प्रदर्शनी कार्यक्रमको उद्घाटन गरे ।
१५ माघमा मानवअधिकारका लागि महिला एकल महिला समूहद्वारा काठमाडौंमा आयोजित कार्यक्रमको उद्घाटन तथा सम्बोधन गरे ।
१५ माघमा शहीद गंगालाल राष्ट्रिय हृदय केन्द्र बाँसबारी काठमाडौंको २७औँ वार्षिकोत्सव समारोहलाई सम्बोधन गरे ।
९ माघमा २२औँ सशस्त्र प्रहरी दिवस २०७९ को समारोहलाई सम्बोधन गरे ।
८ माघमा २८५९औँ तामाङ ल्होसारको उपलक्ष्यमा काठमाडौंको टुँडिखेलमा आयोजना सोनाम ल्होसार समारोहलाई सम्बोधन गरे ।
७ माघमा काठमाडौंमा ‘राइट टु प्रोटेन रन’ हाफ म्याराथुन पुरस्कार वितरण समारोहमामा सम्बोधन गरे । पुरस्कार वितरण गरे ।
१ माघमा राष्ट्रिय योग दिवस २०७९ दिवसका अवसरमा भक्तपुरमा आयोजित कार्यक्रमलाई सम्बोधन गरे ।
३० पुसमा काठमाडौंमा नेकपा (माओवादी केन्द्र) का ज्येष्ठ नागरिक सल्लाहकार मञ्चका केन्द्रीय सदस्य भुवनप्रसाद श्रेष्ठद्वारा लिखित ‘कम्युनिस्ट आन्दोलनका प्रेरक भुवन दाइ’ पुस्तकको लोकर्पण गरे ।
२९ पुसमाललितपुरमा आयोजित नेपाल हस्तकला महासंघको ४२औँ वार्षिक साधारणसभालाई सम्बोधन गरे ।
२७ पुसमा नेपाल उद्योग वाणिज्य संघ गोरखाले आयोजना गरेको गोरखा महोत्सवको उद्घाटन र सम्बोधन गरे ।
२६ पुसमा संसदमा पहिलोपटक विश्वासको मत मागे । उक्त दिन उनले प्रचण्ड बहुमत पाए ।
१७ पुसमा पोखरा अन्तर्राष्ट्रिय विमानस्थलको उद्घाटन गरे ।