विश्वकप जितेर स्पेन फर्कियाे महिला टोली, चुम्बन विवादपछि माफी मागियो

A+ A A-

विश्वकप विजेता बनेका स्पेनिस महिला राष्ट्रिय फुटबल टोली स्वदेश फर्किएकाे छ । स्पेन अवतरण गर्नासाथ महिला विश्वकप जित्ने टोलीलाई राजधानी मड्रिडमा भव्य स्वागत गरिएको छ ।

उनीहरूलाई राजधानीमा हजारौँ समर्थक तथा शुभचिन्तकहरूले स्वागत गर्दै हौसला प्रदान गरे । अस्ट्रेलियाको स्टेडियम अस्ट्रेलियामा स्पेन र इंगल्याण्डबीच फाइनल खेल हुँदा ओल्गा कार्मोनाले २९ औं मिनेटमा गरेको गोल नै उपाधिका लागि निर्णायक बनेको थियो ।

कामोर्ना तिनै खेलाडी हुन् जसलाई विश्वकप जितेपछि मात्र उनको पिताको मृत्युको खबर सुनाइएको थियो । गत शुक्रबार नै उनको बुबाको मृत्यु भएको थियो । उनकाे परिवार पिताको अन्त्येष्टी सकेर अस्ट्रेलिया फाइनल हेर्न पुगिसकेकाे थियाे ।

विश्वकपमा कार्मोनाको प्रदर्शन नखस्कियोस भनेर उनलाई बुबाको मृत्युकाे खबर विश्वकपपछि मात्र सुनाइएको थियो । स्पेनले विश्वकप जितेको, कार्मोनाले गोल हानेको र उनका पिताको मृत्युबाहेक पनि अर्को एक कुराले स्पेनिस फुटबलमा तरंग ल्याएको छ ।

विश्वकप जितेपछि स्पेनी फुटबल महासंघका अध्यक्ष लुइस रुबियालेसले महिला टिमकी खेलाडी जेनी हर्मोसोलाई ओठमा चुम्बन गरेको विषय पनि चर्चामा छ । लुइसले जेनीलाई जबर्जस्ती चुम्बन गरेको र त्यो यौन हिंसा भएको भन्दै स्पेनभित्रै आलोचना भइरहेको छ ।

जेनीले आफूलाई लुइसले गरेको क्रियाकलाप मन नपरेको पनि बताएकी छिन् । यसबीचमा लुइसले भने गल्ती भएको भन्दै माफी मागेका छन् । उनले स्पष्टीकरण दिँदै भनेका छन्,‘मैले खुसी व्यक्त गर्न चुम्बन गरेँ । तर यस कार्यले धेरैको चित्त दुखाएको छ जसकारण यो मेरो गल्ती हो र मैले यो गल्तीबाट पाठ सिक्नेछु ।’

स्पेनका सँस्कृति तथा खेलकुद मन्त्री मिकेल आइस्टाले पनि चुम्बनको घटनालाई अस्वीकार्य भएको बताएका थिए ।

प्रकाशित मिति: बुधबार, भदौ ६, २०८० १४:५८