एसिया कपअघि खतरनाक मोडमा पाकिस्तानी बलिङ आक्रमण, नेपाली ब्याटरलाई सताउन सक्ने पाकिस्तानी ‘ट्रियो’

एसिया कपअघि खतरनाक मोडमा पाकिस्तानी बलिङ आक्रमण, नेपाली ब्याटरलाई सताउन सक्ने पाकिस्तानी ‘ट्रियो’

A+ A A-

नेपालले क्रिकेटमा पहिलोपटक खेल्न लागेको प्रतियोगिता हो, एसिया कप । र, नेपालले कुनै ठूलो टिमसँग खेल्न लागेको पनि यो पहिलोपटक नै हुनेछ । ३० अगस्टमा सुरु हुने एसिया कप नेपालको सपना हो । पाकिस्तान आयोजक रहेको यो प्रतियोगिता अहिले हाइब्रिड मोडलमा हुँदै छ । नेपाल समूह चरणमा दुई खेल खेल्दा पाकिस्तान र श्रीलंकाको भ्रमण गर्नेछ । विश्वक्रिकेटकै बलिया टिम भारत र पाकिस्तानसँग नेपालले पहिलोपटक एकदिवसीय क्रिकेट खेल्दै छ ।

३० अगस्टमा पाकिस्तानको मुल्तानमा हुने पहिलो खेलको तयारीका लागि नेपाली टिम मंगलबारै पाकिस्तान प्रस्थान गरिसकेको छ । २७ अगस्टसम्म नेपालले पाकिस्तानको कराँचीमा अभ्यास गर्नेछ, त्यसपछि मुल्तान पुग्नेछ ।

नेपालले पाकिस्तानसँग खेल्नुअघि नेपाली ब्याटरलाई त्रासमा राख्ने एक खबर आएको छ । अहिले पाकिस्तान र अफगानिस्तानबीच तीन खेलको ओडीआई सिरिज श्रीलंकामा भइरहेको छ । स्पिनर बलरलाई सहयोगी बन्ने सब कन्टिनेन्टलको पिचमा पाकिस्तानी फास्ट बलिङ आक्रमणको ट्रियोले अफगानिस्तानविरुद्ध गरेको प्रदर्शन कुनै सपनाभन्दा कम छैन ।

श्रीलंकाको हम्बनटोटामा पाकिस्तानले पहिला ब्याटिङ गर्दा अफगान स्पिनर चम्किएका थिए । इतिहासमै अफगानिस्तानले पहिलोपटक पाकिस्तानलाई ओडीआईमा अलआउट गर्दा स्पिनरत्रय मुजिबउर रहमानले तीन, राशिद खान र मोहम्मद नाबीले दुई/दुई विकेट लिए । पाकिस्तान २०१ रन बनाउँदा अलआउट भयो । विश्वका नम्बर एक ब्याटर पाकिस्तानी कप्तान बाबर आजम शून्यमै आउट भए । लाग्यो, यो खेल अफगानिस्तानले जित्छ ।

तर, पाकिस्तानी आक्रमणको आँधीबेहरी आउन बाँकी नै थियो । पहिलो ओभरमै विकेट लिन माहिर मानिएका पाकिस्तानी लेफ्टहेन्ड फास्ट बलर शाहिन शाह अफ्रिदीले टिमको तेस्रो तथा आफ्नो दोस्रो ओभरमै दुई विकेट लिए । यो त कास्टिङ मात्र थियो ।

त्यसपछि बलिङ आक्रमणमा आएका अर्का फास्ट बलर नसिम शाहले पनि अफगानी ब्याटरलाई रन बनाउन दिएनन् र एक विकेट लिए । चार रनमै अफगानिस्तानले तीन विकेट गुमायो । १८ रन जोड्दा अर्का फास्ट बलर ह्यारिस रउफले पहिलो विकेट लिए । त्यसपछि त उनले विकेट मात्र लिए । उनले पाँच विकेट लिए । ५९ रन बनाउँदा अफगानिस्तान अलआउट भयो । समकालीन सबैभन्दा तीव्र गतिका बलर रउफको बलिङ स्पिड १५० किलोमिटर प्रतिघण्टाको छ । नसीम शाहले पनि १५० को गतिमा बलिङ गर्छन् । शाहिन शाह अफ्रिदीको सटिक योर्करको जवाफ अहिलेसम्म कुनै ब्याटरले पाएका छैनन् ।

अफ्रिदी, रउफ र शाह अहिले विश्वक्रिकेटकै सबैभन्दा उम्दा फास्ट बलर हुन् । नेपाली ब्याटरले ३० अगस्टमा यी बलरको सामना गर्दै छन् । फास्ट बलिङमा नेपाली ब्याटरको कमजोरी विश्वकप छनोट खेल्न जिम्बाब्वे भ्रमण गर्दा देखिइसकेको छ । वेस्ट इन्डिज र नेदरल्यान्ड्सका बलरले फास्ट सर्टपिच बलिङ गर्दा नेपाली ब्याटर निरीह बनेका थिए, त्यतिबेला ।

वेस्ट इन्डिजभन्दा पाकिस्तानी बलरको स्तर निकै माथि छ । ३० अगस्टमा नेपाली ब्याटरले यी बलरविरुद्ध सम्हालिएर खेल्नुपर्ने हुन्छ ।

प्रकाशित मिति: बुधबार, भदौ ६, २०८० १४:१८