पछिल्लो २४ घण्टामा सुदूरपश्चिममा ३४ जनामा डेंगी संक्रमण पुष्टि

A+ A A-

सुदूरपश्चिम प्रदेशमा पछिल्लो २४ घण्टामा ३४ जनामा डेंगी संक्रमण पुष्टि भएको छ ।

सुदूरपश्चिम स्वास्थ्य निर्देशनालयका अनुसार नौवटा जिल्लामा फैलिएको डेंगीका कारण संक्रमित हुनेको संख्या बढीरहेको हो । पछिल्लो २४ घण्टामा ३४ जना संक्रमित फेला परेसँगै प्रदेशमा डेंगी संक्रमित हुनेको संख्या पाँच सय १३ पुगेको छ । सोमबारसम्म प्रदेशभर डेंगी संक्रमितको संख्या चार सय ७९ थियो ।

दार्चुलामा शुक्रबारसम्ममा डेंगी संक्रमितको संख्या एक सय ९४ पुगेको छ । त्यसपछि डेंगी संक्रमित बढी हुनेमा प्रदेशको दोस्रो स्थानमा कैलाली पुगेको छ । वर्षा सुरु भएसँगै क्रमिक रूपमा प्रदेशका तराई जिल्लामा डेंगी संक्रमण फैलिने क्रम जारी छ । तराई जिल्लामा डेंगी फैलाउने लाभ्रा खोज तथा नष्ट अभियान सञ्चालन गरिए पनि संक्रमितको संख्या बढ्ने क्रम जारी रहेको निर्देशनालयले जनाएको छ ।

प्रदेशको कैलालीमा २०२३ को जनवरीदेखि जुनसम्म १० जनामा संक्रमण देखिएकोमा जुलाईमा १६ र अगस्टमा ८३ जनामा संक्रमण पुष्टि भएसँगै संक्रमितको संख्या एक सय नौ पुगेको छ । कञ्चनपुरमा जुनसम्म ३४ जनामा देखिएकोमा जुलाईमा २३ र अगस्टमा २९ जना गरी ८६ जनामा डेंगी संक्रमण देखिएको छ ।

डेंगी संक्रमण क्रमिक रूपमा पहाडी तथा हिमाली जिल्लामा पनि बढ्ने क्रम जारी रहेको छ । हिमाली जिल्ला दार्चुलामा जुनसम्म डेंगी संक्रमित बढ्दै गए पनि अहिले घट्दो क्रममा छ । जुनसम्म एक सय ८८ जनामा संक्रमण देखिएकोमा जुलाईमा तीन र अगस्टमा ५ गरी एक सय ९४ जनामा डेंगी संक्रमण देखिएको निर्देशनालयले जनाएको छ । जुनसम्म बाजुराको चार जनामा डेंगी संक्रमण देखिएकोमा अगस्टमा २८ जनामा संक्रमण देखिएसँगै संक्रमितको संख्या ३२ पुगेको छ । हिमाली जिल्ला बझाङमा यो अवधिमा ११ जनामा संक्रमण देखिएको निर्देशनालयका सूचना अधिकारी ओम जोशीले जानकारी दिए ।

पहाडी पाँच जिल्लामा पनि डेंगी संक्रमण फैलिने क्रम जारी रहेको निर्देशनालयले जनाएको छ । प्रदेशको डोटीमा यो अवधिमा १४, बैतडीमा ६ र अछाममा ५२ जनामा संक्रमण देखिएको छ भने डडेल्धुरामा यो अवधिमा नौ जनामा डेंगु संक्रमण देखिएको छ ।

लामखुट्टेको लार्भा लामो समयसम्म पानी जमिरहने ठाउँमा हुर्कने गरेकाले त्यस्तो ठाउँमा हरेक हप्ता सरसफाइ गर्ने कार्य भइरहेको निर्देशनालयका सूचना अधिकारी जोशीले बताए ।

प्रकाशित मिति: मंगलबार, भदौ ५, २०८० १७:५३