देउवा कड्केपछि गृहमन्त्रीले साेधे- आज सभापतिज्यूलाई के भएछ ?

A+ A A-

सरकारमा रहेको सबैभन्दा ठूलो दल नेपाली कांग्रेस सरकारसँग सन्तुष्ट छैन । कांग्रेसको संस्थापनइतर समूह सरकारको कार्यशैलीप्रति असन्तुष्ट रहे पनि पछिल्लो समय सभापति शेरबहादुर देउवासमेत रुष्ट छन् ।

नक्कली भुटानी शरणार्थी प्रकरणमा कांग्रेस नेता बालकृष्ण खाँण पुर्पक्षका लागि थुनामा छन् भने सुन प्रकरणमा मुछिएका माओवादी नेता कृष्णबहादुर महराबारे अनुसन्धान गर्ने आँट सरकारले गरेका छैन । यही विषयमा गृहमन्त्री नारायणकाजी श्रेष्ठसँग देउवा असन्तुष्ट छन् ।

सत्ता गठबन्धनको हितविपरीत हुने भएकाले कांग्रेस सभापति देउवा सुन तस्करी प्रकरणमा पनि छानबिन समिति बनाउनुपर्छ भनेर खुल्न सकेका छैनन् । सरकारले साउन १८ गते सुन तस्करी प्रकरणको छानबिन राजस्व अनुसन्धान विभागमार्फत नै प्रभावकारी भइरहेको भन्दै अर्को समिति आवश्यक नभएको बताएको थियो । सञ्चार तथा सूचना प्रविधि मन्त्री तथा सरकारका प्रवक्ता रेखा शर्माले यो प्रकरण अनुसन्धानका लागि अर्को समिति बनाउँदा भइरहेको अनुसन्धान पनि प्रभावित हुने बताएकी थिइन् ।

मन्त्रिपरिषद्को निर्णय आइसकेपछि कांग्रेस त्यसको विपक्षमा जान सक्ने अवस्था थिएन । साउन अन्तिम सातामा कांग्रेस संसदीय दलकाे निर्णय पनि उस्तै आयो– सुन प्रकरणमा अर्को छानबिन समिति आवश्यक छैन । यद्यपि पार्टीभित्र संस्थापनइतर समूह भने न्यायिक छानबिन समितिको पक्षमा थियो ।

साउन १० पछि प्रमुख प्रतिपक्षी एमालेले उच्चस्तरीय छानबिन समितिको माग गर्दै लगातार सदन अवरुद्ध गर्दै आएको छ । एमाले कडा प्रतिपक्षी हो भन्ने बुझेका देउवा छानबिन समितिको पक्षमा थिए । ‘सभापतिज्यू छानबिन समिति बनाउन तयार हुनुहुन्छ । संसदको अवरोध खोल्न एमालेको माग सम्बोधन गर्न तयार हुनुहुन्छ,’ एक कांग्रेस सांसदले शिलापत्रसँग भनेका थिए, ‘यस विषयमा सरकारका अन्य दलसँग परामर्श गरिरहनुभएको छ ।’

प्रधानमन्त्री पुष्पकमल दाहाल प्रचण्डसँग सम्पर्कमा रहिरहेका देउवाले गठबन्धनको धारणा बुझेर पार्टी संसदीय दलबाट छानबिन समितिको विपक्षमा निर्णय गराए । कांग्रेस छानबिन समितिको पक्षमा गएको भए गठबन्धनमा बेमेल रहेको सन्देश जान्थ्यो ।

तर, एमालेको ढिपीका अगाडि केही नलाग्ने बुझेको गठबन्धन छानबिन समितिको लागि तयार देखिएको छ । मध्यमार्गी बाटो पहिल्याउने प्रयासमा दलहरू छन् । सोमबार सिंहदरबारमा भएको सर्वलीय बैठकमा उच्चस्तरीय छानबिन समितिको कार्यदिशा बनाउन दलहरू सहमत भएको एमाले प्रमुख सचेतक पदम गिरीले जानकारी दिए । समिति बनाउन कांग्रेस प्रमुख सचेतक रमेश लेखक, एमाले संसदीय दलका उपनेता सुवास नेम्वाङ, माओवादी प्रमुख सचेतक हितराज पाण्डेलाई जिम्मा दिइएको छ । समितिको ड्राफ्ट बनेपछि आज २ बजे शीर्ष नेताको बैठकले टुंगो लगाउने भनिएको छ ।

यद्यपि आज बिहान राष्ट्रपति रामचन्द्र पौडेलले बोलाएको सर्वदलीय बैठकमा एमाले अनुपस्थित छ । उसले छानबिन समितिको लागि कांग्रेसको ‘ग्रीन सिग्नल’ उपयोग गर्दै सरकारलाई दबाबमा राख्ने रणनीति लिएको छ । कांग्रेस सभापति देउवाले विभिन्न माध्यमबाट एमालेसँग छलफल गरिरहेका छन् । उपसभापति तथा उपप्रधानमन्त्री पूर्णबहादुर खड्कालाई देउवाले सदन अवरोधबारे वार्ता गर्न खटाएका छन् ।

त्यसअघि, आइतबार प्रधानमन्त्री प्रचण्डले बोलाएको राष्ट्रिय दलहरूको बैठकमा देउवा गृहमन्त्री श्रेष्ठविरुद्ध खनिएका बैठकमा सहभागी एक नेताले बताए । ‘पटक–पटक नै उहाँ (देउवा) आक्रोशित हुनुभयो । कांग्रेसलाई थुन्ने अनि आफ्नो मान्छे बचाउने भन्दै उहाँ गृहमन्त्रीमाथि खनिनुभयो,’ ती नेताले भने ।

बैठकमा देउवाले महरा बाउछोरालाई किन बचाएको भन्दै प्रश्न गरेको ती नेताले बताए । ‘नाम के हो रे भन्दै महरा बाउछोराको नाम मिडियामा आएको र उनीहरूलाई पक्राउ नपरेको भन्दै आक्रोश पोख्नुभयो,’ ती नेताले भने । देउवाको आक्रोश मत्थर नभएपछि गृहमन्त्री नारायणकाजी श्रेष्ठले पनि आज सभापतिज्यूलाई के भएछ भन्दै वातावरण सामान्य बनाउन खोजेका थिए ।

प्रकाशित मिति: मंगलबार, भदौ ५, २०८० १०:३४