केन्जोको मोहनी रुप (फोटो फिचर)

A+ A A-

पत्रैपत्र परेको फूल फूल्ने केन्जो (पदमचाल) देखेर मोहित नहुने सायदै छन् । कतिपय प्रत्यक्ष देखेर मख्ख पर्छन् भने कतिपय फोटो भिडियो हेरेर लोभिन्छन् ।

केन्जो प्रत्यक्ष देख्नलाई हिमाली क्षेत्र पुग्नुपर्छ । तिम्बुङ पोखरीको भित्तापट्टी केन्जो देखेर फिदिमबाट त्यहाँ पुगेका सन्दिप केरुङ मख्ख परे । केन्जोको छेउमा उभिनु त्यति सहज थिएन । चट्टान भएको भिरालो पहाडमा फूलेको केन्जोनजिक पुग्न केही कठिन त हुन्छ नै ।

पोखरी नजिकै हिँडेपछि केन्जो नजिकबाट देखेर फोटो खिच्न भ्याएँ । तिम्बुङ पोखरी जाने धेरैको पोखरीपछि महत्वपूर्ण ध्येय केन्जो हेर्ने र तस्वीर लिने हुन्छ । यस्तै ध्येय राख्नेमध्येका जुगल केरुङ डाँडामै पुगेर केन्जोसँग सेल्फी खिच्न भ्याए ।
बाटोमा जादाँ जादै ताप्लेजुङको कालीखोला निवासी भीम भण्डारीको सल्लाह थियो केन्जोसँग फोटो खिच्न नभुल्नु है ।

पत्रैपत्र परेको पिरामिड जस्तो केन्जो निक्कै सुन्दर देखिन्छ । साउन फूल्न थाल्ने यो फूलको सौन्दर्यतामा नलोभिने सायदै हुन्छन् । पाँचथर, ताप्लेजुङ, संखुवसभा जस्ता जिल्लामा केन्जो देख्न पाइन्छ ।

ठूला पात भएको कन्जो फूल्दा पिरामिड जस्तो देखिन्छ । टावरजस्तो फूल । तलमोटो, उचाइ बढ्दै जाँदा सानो सानो हुँदै जाने । केन्जोको फोटो धेरैले घरमा, क्यालेन्डरमा सजाएका छन् । कतिपयले डाँडैभरी टावर समेत भन्ने गरेका छन् ।
यतिबेला उच्च पहाडी, हिमाली क्षेत्रमा अनेक किसिमका फूल फुलेका छन् । यीमध्ये विशेष प्रकारको फूलको रुपमा केन्जो रहेको छ । कतै भित्तामा कतै चउरमा फूलेको देखिन्छ । यो फूलमा औषधिको गुण हुने गरेको बताइन्छ ।

लेकाली चौर र अग्ला डाँडा निकै आर्कषक देखिएर फूलेको भेटिन्छ । केन्जोलाई नेपालीमा पदमचाल भनिन्छ । पूर्वको चर्चित तिम्बुङ पोखरी क्षेत्रमा यो भेटिन्छ । टाढाबाट हेर्दा टावरजस्तो सेतो फूलेको वनस्पति लहरै देखिन्छ ।

यसको व्याख्या पहिलोपल्ट ब्रिटिस बोटानिस्ट सर जेसेफ डाल्टन हुकरले गरेको भेटिन्छ । हुकरको पुस्तक कञ्चनजङ्घा जुहार भनेर नेपालीमा समेत अनुवाद भएको छ । उनले ‘हिमालयन जर्नल्स नोट्स अफ न्याचुरलिस्ट’मा व्याख्या गरेका छन् । सन् १८४९ तिर सिक्किमको लाछेन उपत्यकामा यो वनस्पति देखेको लेखेका छन् ।

‘पदमचाललाई मैले पहिलो पल्ट १ माइल टाढाबाट देखेँ । लाछेन उपत्यकाको १४ हजार फिट उचाइमा अवस्थित कालो पहाडलाई यसले अत्यन्त सुन्दर बनाएको थियो । अप्ठ्यारा ठाउँमा थिए । तीन फिट जति अग्लो यस वनस्पति पिरामिड टावरको रूपमा ठिंग उभिएको थियो,’ उनले लेखेका छन् ।

पदमचाल तीन हजार दुई सयदेखि चार हजार पाँच सय मिटरसम्म उचाइमा पाइने वन्यजन्तू र वनस्पतीसम्बन्धी अध्ययेता सोनाम टासी लामा बताउँछन् । नेपाल, भारत र भुटानमा यो वनस्पति भेटिएको छ । यसलाई कृत्रिम तरिकाले युरोपमा पनि उमारिएको तथ्य भेट्न सकिन्छ ।