अभियुक्तहरू झुटको खेती गर्दै छन्

A+ A A-

प्रियजनहरू, ज्यान मार्ने उद्योगका अभियुक्तहरू एकपछि अर्को गरी झुटको खेती गर्दै छन् । पार्टी नेतालाई मिस ब्रिफिङ गर्दै छन् । यो अहिले नेविसंघ असन्तुष्ट पक्षले गरिरहेको भनिएको आन्दोलन अभियुक्त योगेन्द्र रावल, रूपेश साह र दीपकराज ओझाले गरिरहेको आन्दोलन हो । उनीहरूलाई केन्द्रीय सदस्य चाहिएको छ । हामीलाई केन्द्रीय सदस्य किन नबनाएको भनेर महामन्त्री तथा पार्टी सभापतिका घर घेर्छौं भनेर भयको भाषा बोलेको पनि प्रस्टै देखियो । तिनले पार्टी नेतालाई कति गुमराहमा राखेका छन् भन्ने कुरा बुझ्न तपाईंले कानुनमन्त्रीको सार्वजनिक टिप्पणी सुन्दा हुन्छ । कांग्रेसभित्रका कतिपय नेताका दुःख पनि कानुनमन्त्रीका जस्तै दुःख छन् ।

अपराधीहरूले आफ्नो कुकर्मलाई जस्टिफाई गर्न श्रद्धेय नेता विश्वेश्वरप्रसाद कोइरालाको नाम बेचे । भ्रम निवारण गर्न मैले कानुनमन्त्रीका दु:ख शीर्षकमा लामो लेख नै लेखेको छु । प्रेम चलाउनेले बीपीको जीवनी कोर्सबाट हटाएका कारण ऊ मुठभेडमा परेको हो भन्ने उसको भाष्य मिथ्या सावित भएपछि अहिले ब्याच्लर चौथो वर्षको कोर्स सोसल मिडियामा पोस्ट गर्दै नयाँ झुट पस्कँदै छन् ।

प्रियजनहरू, त्रिवि समाजशास्त्र विभागमा केवल मास्टर्स डिग्री मात्र पढाइ हुन्छ । ब्याच्लर्स डिग्री त्रिविमा पढाइ हुँदैन । अपराधी तथा तिनका संरक्षक जोकोहीलाई मास्टर्सको कोर्समा पहिला बीपीको समाजवाद भएको र पछि मैले हटाएको कुनै प्रमाण छ भने देखाउनुस् । मेरो खुला चुनौती भयो । नभए तिमीहरूको 'नन्सेन्स' बन्द गर्नुहोस् । रह्यो कुरा अपराधीहरूले सोसल मिडिया र केही पत्रिकामा पोस्ट गरेको Sociology of Development and Democracy भन्ने नाम गरेको पेपरको । त्यो ब्याच्लर चौथो वर्षको पेपर हो । यो विषयसँग मेरो लिनुदिनु केही पनि छैन । ब्याच्लरमा पढाइ हुने कोर्स आरआर, पाटन वा त्रिचन्द्रको वा विभागको कुन शिक्षकले बनायो, मलाई थाहा पनि छैन । म डिग्रीलाई पढाउँछु, ब्याच्लरलाई होइन ।

फेरि त्यसैमा मैले अहिलेसम्म कुनै पाठ्यक्रम पनि बनाएको छैन । मैले त मेरा श्रद्धेय गुरु चैतन्य मिश्रले निर्माण गरेको पाठ्यक्रम पढाइरहेको मात्रै हो । फेरि त्यतिबेला जतिबेला अपराधीहरूले ममाथि सांघातिक आक्रमण गरे, म कुनै विषय समितिमा पनि थिइनँ । म बीसौँ वर्षदेखिका समाजशास्त्रका पाठयक्रम ल्याइदिन्छु । के कसैले मलाई बीपीको समाजवाद वा कुनै जीवनी वा कुनै पनि किताब त्यहाँ पहिला कोर्समा भएको देखाउन सक्छ ? अनि पाठ्यक्रममा हुँदै नभएको कुरा मैले कसरी हटाएँ ?पाठ्यक्रममै भए पनि मजस्तो सामान्य शिक्षकलाई त्यसरी हठात् हटाउने सुविधा हुँदैन । कोर्सबाट कुनै किताब हटाउने वा थप्ने आफ्नै विशिष्ट प्रक्रिया, पद्धति र परम्परा हुन्छ । यो त सामान्य कमनसेन्स भएको मान्छेले पनि थाहा पाउने कुरा हो ।

त्यसैले मैले बीपीको समाजवाद वा जीवनी कोर्सबाट हटाएका कारण वा नराखिदिएका कारण उनीहरूले ममाथि आक्रमण गरेका होइनन्, अपराधीले बीपीको नाम बेचेको अपराधलाई ढाकछोप गर्न, त्यसबाट जोगिन हो । अपराधीहरूले बीपीको नाम अपराध ढाकछोप गर्नका निम्ति बेच्दा तिनलाई कारबाही हुनुपर्ने हो ।

अपराध पनि कसरी घटायो भन्दा हरि आचार्य र योगेन्द्र रावलले बाहिरबाट पेसेवर गुन्डा परिचालनसमेत गरे । हप्तौँ मेरो रेकी गरे । मेरो पछि लागे । ताल्चा खुलेको हप्तौँपछि घटना घटाए । त्यो पनि अफिसबाहिर बाटोघाटोमा ढुकी नितान्त एक्लो, निहत्था भएको मौका छोपेर । अब हेर्नुस् न, टेक्सास इन्टरनेसनल कलेज रातो पुल पढ्ने रुपेश शाहले पढाइ छाडेर बसेका रविनकुमार लामा, षयुज श्रेष्ठ, निरज रानामगरलाई लिएर आएको थियो ।

यी त्रिविका मात्र होइनन्, कहीँका पनि विद्यार्थी होइनन् । यी सबै पटके अपराधी हुन् । रुपेश साह स्वयम् विभिन्न अपराधमा संलग्न पटके अपराधी हो । उसले मलाई प्रहार गर्नका निम्ति हरि आचार्यबाट बीस हजार रुपैयाँ सुपारी लिएको थियो । घटना सुनियोजित थियो । ६ जना सोझै अपराधमा संलग्न अपराधी हुन् ।

यिनलाई ठाउँ दिनुपर्ने केन्द्रीय सदस्यमा होइन, कारागारमा हो । ज्यान मार्ने उद्योगका अभियुक्तले खुलेआम आन्दोलनको नेतृत्व गर्नु, हामीलाई केन्द्रीय सदस्यमा नसमेटिए हामी देखाइदिन्छौँ भनेर हाँक दिनुजस्तो कानुनी शासन र लोकतन्त्रमाथिको मजाक अरु के हुन सक्छ ?

रह्यो कुरा दीपक ओझाको । ऊ पनि घटनाको मतियार हो । जसले घटना अघिपछि रुपेश साहसँग मात्र १९० पटक फोन गरेको फोन ट्र्याकिङ चार्टले देखाउँछ । अरु पटकेसँग पनि त्यति नै कुरा गरी उसले तिनलाई भगाउन सहयोग गरेको छ । फोन ट्र्याकिङ चार्टले पनि त्यो देखाउँछ । उनीहरूले नै आफ्नो बयानमा भनेका छन् । यदि ऊ घटनामा संलग्न थिएन भने पेसेवरसँग यतिका पटक किन फोन गरेको त ?

नेविसंघ अध्यक्ष दुजाङ शेर्पाले अपराधीलाई केन्द्रीय समितिमा ठाउँ नदिएर त प्रशंसनीय काम नै गर्नुभएको छ । अझ गर्नुपर्ने त यिनलाई साधारण सदस्यबाट समेत निष्कासन हो । अपराधीको आशक्ति श्रद्धेय नेता बीपीप्रति होइन, केन्द्रीय सदस्य पदप्रति हो, ताकि केन्द्रीय सदस्य भएर विश्वविद्यालयमा ताल्चा मारेर भयको खेती पुनः गरी कलेजका सम्बन्धन, नियुक्ति, सरुवा, बढुवा र भागवण्डाबाट आर्थिक लाभ लिन सकियोस् ।

यिनलाई ठाउँ दिनुपर्ने केन्द्रीय सदस्यमा होइन, कारागारमा हो । ज्यान मार्ने उद्योगका अभियुक्तले खुलेआम आन्दोलनको नेतृत्व गर्नु, हामीलाई केन्द्रीय सदस्यमा नसमेटिए हामी देखाइदिन्छौँ भनेर हाँक दिनुजस्तो कानुनी शासन र लोकतन्त्रमाथिको मजाक अरु के हुन सक्छ ? अभियुक्तले संगठनभित्र विधि र पद्धतिको पाठ पढाउने यो कस्तो विरोधाभाष हो ?