ठूलो आवाजले निम्तिन्छ कानको समस्या (भिडियो)

A+ A A-

पछिल्लो समय धेरै ठाउँमा हर्न निषेध लेखिएको देख्न सकिन्छ । तर, किन यसो गरिएको कतिपयलाई थाहा नहुन सक्छ ।

विज्ञहरूका अनुसार ठूलोठूलो आवाजले कानमा समस्या निम्त्याउन सक्छ । नेपालमा हर्न निषेधित गरिएको केही वर्ष मात्रै भए पनि विकसित मुलुकहरूमा ठूलाठूला ध्वनिलाई व्यावसायिक स्वास्थ्यको जोखिम (अकुपेसनल हेल्थ हाजार्ड) मा राख्ने गरेका छन् ।

धेरै ठूलो आवाजमा वा धेरै फ्रिक्वेन्सीले गर्दा कान कराउने समस्यादेखि लिएर कानको नसामा समेत समस्या देखिन सक्ने नाक, कान तथा घाँटी रोग विशेषज्ञ डा. प्रियङ्का गुप्ता बताउँछिन् ।

उनी भन्छिन्, ‘ठूलो आवाजका कारण निम्तिने समस्यालाई हामी नोइज इन्डियुस्ट हेयरिङ लस (एनआईएचएल) भन्छौँ । अहिले यो अकुपेसनल हेल्थ हजाडभित्र पर्छ । ठूलो आवाज आउने ठाउँमा काम गर्नुपर्ने अवस्थालाई व्यावसायिक स्वास्थ्यको जोखिम ( अकुपेसनल हेल्थ हाजार्ड) भन्न गरिन्छ ।’

ठूलो आवाज भएका ठाउँमा काम गर्ने व्यक्तिहरूको कानमा दीर्घकालीन समस्या निम्तिन सक्छ ।

ठूलो–ठूलो आवाजले गर्दा कानको नसामा असर पर्छ । यसो हुँदा कान कराउने समस्या हुन्छ । कसैलाई यसकै कारण चक्कर लाग्ने समस्या पनि देखिन सक्छ । र, कतिलाई कान नै नसुन्ने समस्या पनि हुन सक्छ । कान नसुन्ने समस्या कसैलाई केही समयमा निको हुन सक्ने सम्भावना भने हुन्छ ।

ठूलो आवाजका कारण कान नसुन्ने अवस्थामा उपचारले केही बिरामीलाई निको बनाउन सके पनि अधिंकाशलाई निको पार्न नसकिने डा. गुप्ता बताउँछिन् ।

ठूलो आवाज भएको ठाउँमा काम गर्दा के गर्ने ?

यस्तो ठाउँमा काम गर्नुपर्ने व्यक्तिहरूले ‘इयर प्लग’को प्रयोग गर्न सकिन्छ । ठूलो आवाज सुनिसकेपछि केही निश्चित समयसम्म त्यस्तो आवाज नसुन्ने वा आराम गर्ने गर्नुपर्छ । र, त्यस्तो ठाउँमा काम गर्ने व्यक्तिले नियमित रूपमा नाक, कान तथा घाँटीको डाक्टरसँग परामर्श लिइरहनुपर्छ ।

डा. गुप्ताका अनुसार यदि कुनै व्यक्तिको कानको नसा सुकेको छ । र, त्यस्ता व्यक्ति ठूलो आवाज भएको ठाउँमा काम गरिरहेका छन् भने उनीहरूको कानमा थप समस्या उत्पन्न हुन सक्छ ।

त्यसैले नियमित डाक्टरको परामर्श लिइरहनुपर्छ । कानमा समस्या भएका व्यक्तिले कानमा पानी पार्नु हुँदैन । जथाभावी कानमा औषधिको प्रयोग गर्नु हुँदैन ।

इयर फोनले पनि निम्त्याउँछ समस्या

इयरफोनका कारण पनि कानमा समस्या हुन सक्ने डा. गुप्ताको भनाइ छ । त्यस्तै, कानको जालीमा समस्या भएका व्यक्तिहरूले इयरफोन प्रयोग गर्दा कान पाक्न सक्छ ।

उनी भन्छिन्, ‘आफूलाई आवश्यक परेको बेलामा मात्र ठिक्कको आवाजमा इयर फोनको प्रयोग गर्नुपर्छ ।’ तर, इयर फोन लामो समयसम्म ठूलो–ठूलो आवाजमा प्रयोग भने गर्नु हुँदैन । यसो गर्दा कानमा समस्या उत्पन्न हुन सक्छ ।