संसद अवराेधले आलाेचना भएपछि ओलीको पत्रकार सम्मेलनः निशानामा गृहमन्त्री, सुनिल शर्माको बचाउ

संसद अवराेधले आलाेचना भएपछि ओलीको पत्रकार सम्मेलनः निशानामा गृहमन्त्री, सुनिल शर्माको बचाउ

A+ A A-

लगातार संसद अवराेध गरेपछि आलाेचना खेपिरहेकाे प्रमुख प्रतिपक्षी दल नेकपा एमालेले आइतबार विशेष पत्रकार सम्मेलन गर्दै संसद अवराेधबारे प्रस्टीकरण दिएकाे छ । एमाले अध्यक्ष केपी शर्मा ओलीले एक क्वीन्टल सुन प्रकरणमा किन उच्चस्तरीय छानबिन समिति गठन हुनुपर्ने हाे भन्ने विषयमा आफ्ना तर्कहरू पेस गरेका छन् ।

पछिल्लो समय एमालेले निरन्तर रूपमा संसद अवरुद्ध पार्दै आएको छ । जनप्रतिनिधिले जनताको आवाज उठाउने मूल थलो संसदलाई नै एमालेले बन्धक बनाएको भन्दै चौतर्फी आलोचना भइरहेको छ । संसद अवरुद्ध पारेको विषयमा एमाले रक्षात्मक बनिरहेको बेला ओलीले पत्रकार सम्मेलन आयोजना गरेका हुन् ।

त्यसो त एमाले नेताहरूले संसद अवरुद्ध पारेको विषयमा प्रतिक्रिया दिइनै रहेका छन् । ओलीले पनि विभिन्न कार्यक्रममा यसबारे टिप्पणी गरिरहेका छन् । आइतबारको पत्रकार सम्मेलनमा ओलीले मूलतः उपप्रधानमन्त्री तथा गृहमन्त्री नारायणकाजी श्रेष्ठलाई निशाना बनाएर सरकारको आलोचना गरे ।

उनले आफूहरूले नभएर सरकारले नै संसद अवरोध गरेको जिकिर गरे । अनि अहिलेको संसदले संसदीय मर्यादा राख्न नसकेको टिप्पणी गरे । ‘संसद प्रतिपक्षले अवरोध गरेको भनेर आरोप लगाएको छ । संसद अवरुद्ध सत्ता पक्षले गरेको हो । अहिलेको संसदले संसदीय मर्यादा राख्न सक्दैन,’ उनले भने ।

पछिल्लो समय सरकारले सुशासनको अभियान सुरु गरिएको प्रतिक्रिया दिँदै आएको छ । तर, ओलीले सरकारले नै भ्रष्टाचार गरेको तर्क गरे । एक क्विन्टल सुन प्रकरणमा सरकारले टुप्पो टुप्पो मात्र हेरेको टिप्पणी गरे । यो सरकारले सुन प्रकरणमा गहिरो छानबिन गर्न नचाहनुमा उसको संलग्नता रहेको देखाएको दाबी गरे ।

अनि कांग्रेस सांसद सुनिल शर्माको बचाउ गरे । शर्माले गृह र अर्थमन्त्रीको राजीनामा मागेपछि प्रतिशोध साधेर उनलाई पक्राउ गरिएको ओलीको टिप्पणी थियो । ‘सुनिल शर्माको सटिर्फिकेट अहिले किन छानबिन गर्नुपरेको ? सुनिल शर्माले मन्त्रीमाथि छानबिन गर्न भनेपछि उनको सटिर्फिकेटको छानबिन गर्नु गलत हो । शर्मालाई पक्राउ गर्नुभन्दा पहिला सभामुखलाई किन जानकारी गराएन ?' ओलीले भने, 'कार्यकर्तालाई उजुरी हाल्न लगाएर तर्साउने, सांसदलाई त यस्तो गरिहरहेको छन् भने अरुको अवस्था के होला ?’

तर, अदालतले उनलाई छाडिदिएको उनले बताए । ‘अदालतले तत्काल किन छोड्यो सुनिल शर्मालाई ?' उनले पत्रकार सम्मेलनमा प्रतिप्रश्न गरे, 'सुनिल शर्मा जत्तिको अपस्पताल चलाएर बसेको सांसद के देश छोडेर भाग्ला, किन सरकारले हतार हतार समातेर कारबाही गर्न खोज्यो ?'

गृहमन्त्री श्रेष्ठमाथि निशाना साँध्दै ओलीले अब उनले रोष्ट्रममा जाने भनेको राजीनामा दिनका लागि मात्र भएको टिप्पणी गरे । तर लाजै नमानी रोष्ट्रममा उभिएर श्रेष्ठले प्रश्न गरेको ओलीले तर्क गरे ।

ओलीले आफ्नो पालमा ३३ किलो सुन फेला पार्न नसके पनि त्यसका आरोपितलाई जेल हालेको भन्दै जस लिए । ‘३३ किलो सुन पत्ता लगाउन सकेनौँ, तर आरोपिलाई जेल हालेका छौँ । ३३ किलो सुन हाम्रो सरकार बन्नु भन्दा पहिला नै आएको हो । मैले सुन नभेट्टाए पनि उनीहरूमाथि कारबाही गर्‍यौँ,' ओलीले भने, 'अहिले पनि जेल रहेको छन् । सुन बाहिर पठाएको रहेछ । पत्ता लगाउन सकिएन ।’

एमाले सरकारमा जाँदैन

एमाले सरकारमा जान हतारिएको कतिपयको टिप्पणीका बीच ओलीले आफ्नो पार्टी सरकारमा सामेल हुन नचाहेको दाबी गरे । एमालेले सरकार ढाल्न पटक-पटक प्रयास गरेको समाचार बाहिरिएको थियो । यद्यपि, कांग्रेसले एमालेसँग सहकार्य गर्न नचाहेको बताइएको थियो ।

शनिबार मात्र ओलीले ८८ सिट भएको कांग्रेसलाई ३२ सिट भएको माओवादीले चलाइरहेको आरोप लगाएका थिए । उनले कुकुरले पुच्छर हल्लाउने हो पुच्छरले कुकुर हल्लाउने होइन भन्दै कांग्रेसलाई व्यङ्ग्य हानेका थिए ।

‘सत्तामा एमालेको ध्यान छैन । देशको चिन्ता छ । देशको आर्थिक अवस्था बिग्रेको छ । मानिसहरू सडकमा आएका छन्,’ ओलीले भने ।

प्रधानमन्त्रीको राजीनामा

ओलीले यति सारो भ्रष्ट सरकार चलाउनुभन्दा प्रधानमन्त्रीले राजीनामा दिनु राम्रो हुने बताए । प्रधानमन्त्री पुष्पकमल दाहाल प्रचण्डले भ्रष्टाचार गरेको नबताए पनि गृहमन्त्री र अर्थमन्त्रीले भ्रष्टाचार गरेर सुन तस्करी गरेको र त्यही कारण प्रधानमन्त्रीले पनि राजीनामा दिनुपर्ने उनको भनाइ थियो ।

‘यति भ्रष्ट सरकार चलाउनुभन्दा राजीनामा दिनुपर्थ्यो । उल्टै प्रश्न पो गर्छन् रोस्ट्रममा उभिएर,' गृहमन्त्रीप्रति लक्षित गर्दै ओलीले भने, 'बानी परेपछि लाज हुँदैन घिन हुँदैन भन्ने वीरवल अकवरको कथा छ । त्यो खोजेर पढ्नुहोला ।’

गृहमन्त्री र अर्थमन्त्रीले राजीनामा नदिएर कसरी बस्न सकेको भन्दै आश्चर्य मानेको उनले बताए । ‘मन्त्री भएर राष्ट्रिय झण्डा हल्लाएर कसरी हिँड्न सकेका होलान् ? लाज मान्नुपर्ने हो । तर पनि अहिलेसम्म मन्त्री भएर बसेका छन्,’ ओलीले भने, ‘उहाँले त दादागिरी शैलीमा मन्त्रालय चलाउनुभएको छ । लाजै नमानी झण्डा हल्लाएर हिँडिरहनुभएको छ ।’

पूर्वराष्ट्रपति भण्डारी एमालेमा फर्कने चर्चा

पत्रकार सम्मेलनका क्रममा ओलीले पूर्वराष्ट्रपति विद्यादेवी भण्डारी पुनः एमालेमा फर्कने प्रसङ्ग पनि उठाए । एमालेको एउटा पक्ष पूर्वराष्ट्रपति भण्डारीलाई पार्टीमा ल्याउनुपर्छ भन्ने लबिङमा रहेको बताइएको छ । तर, ओलीले पार्टीमा ७० वर्षे उमेर हद हटाएर नेताहरूलाई पार्टी प्रवेश गराएपछि विवाद सुरु भएको छ ।

अध्यक्षको दाबेदार रहेका नेताहरूको बाटो बन्द हुने भएपछि एमालेमा ओली र विद्या समूह बन्न थालेको चर्चाबीच ओलीले उक्त कुरा उठाएका हुन् ।

‘पूर्वराष्ट्रपति विद्या भण्डारीज्यू एमालेको उपाध्यक्ष हुन् । हाम्रो आदरणीय व्यत्तित्व हुन् । विष्णु पौडेलले मात्र होइन, मैले पनि कुरा गरेको छु,’ ओलीले भने, ‘पार्टीमा आउनुपर्‍यो भनेर कार्ड नै लिएर गएको भन्ने हल्ला चलाइयो । ओली छउन्जेल पार्टी टुक्राटुक्रा हुने हल्ला चलाउन थाले ।’